Read koho Hebrơ 11 Bible Online

Hebrơ 11 - koho bible

Hebrơ 11

¹Bơta dòn la bơta git nền cê he rơp geh bơta he gơn kơnòm, la cơng tàng bơh bơta he òhềt gŏ.

²Ngan kơnòm di bơta dòn mơ ală cau rài yau neh geh lơh cơng niam.

³Bơh bơta dòn bol he git lah lơgar dunnia neh geh crơng gơs bơh jơnau đơs Yàng Tom Trồ dê, tian gơs ală phan he gŏ la phan neh gơlik gơs bơh ală phan he ò gŏ.

⁴Bơh bơta dòn Abel ơn Yàng Tom Trồ in dô nơm phan ơn duh khoai dờng màng rlau mơ phan Kain dê, mơ khai neh geh lơh cơng la song ring, bơh Yàng Tom Trồ dòp phan ơn khai dê; bơh bơta dòn, bulah khai neh chơt rau mơya gam đơs.

⁵Bơh bơta dòn Enôk geh cèng guh hơđang trồ ò gan bơta chơt; cau ò gam gŏ khai tai, bơh Yàng Tom Trồ neh cèng khai guh hơđang. Bơh lài mơ tŭ hơ̆ khai neh geh lơh cơng la niam nùs Yàng Tom Trồ.

⁶Mơ tai, dilah ò gơs bơta dòn, gen ò rgơi niam nùs Kơnràñ; bơh cau lơi lòt tus hơ Yàng Tom Trồ gen pal dòn lah gơs Yàng Tom Trồ, mơ Kơnràñ la Bơtau ai phan ƀàn ală cau in jòi jat Kơnràñ.

⁷Bơh bơta dòn Nôe geh Yàng yal lài bơh ală bơta òhềt gŏ, khai gơs nùs duh rngòt mơ lơh gơs dô nơm ơhò nàng dong klàs hìu nhă khai dê; bơh bơta dòn hơ̆ khai lơh nền glài dunnia, mơ khai gơlik gơs cau pơrdòn bơta song ring bơh bơta dòn.

⁸Bơh bơta dòn Abraham, tòm tŭ geh hòi sac, khai dòn bơr mơ lik lòt tus hơ tiah khai rơp dòp lơh gơs sre brê; khai lik lòt mơ ò git ntềng đah khai lòt.

⁹Bơh bơta dòn khai ơm ing tòm lơgar neh ho ai khai in kung be ơm tòm lơgar ndai, ơm tòm sàl bal mơ Isak mơ Jakôp la ală cau geh pơrdòn dô jơnau ho pơgon bal mơ khai.

¹⁰Bơh khai kơp gơn dô nơm ƀòn dờng gơs ală mơnàng kơ̆ nền, mơ Yàng Tom Trồ la Bơtau rcang lài mơ bơt bơtào ƀòn hơ̆.

¹¹Bơh bơta dòn, bulah Sara kơnền mơ neh jòng sơnam, mơya khai dòp gơs tơl pràn nàng deh kòn, bơh khai dòn Bơtau neh ho pơgon la Bơtau lơh jat jơnau ho Kơnràñ dê.

¹²Tài bơh hơ̆, kung bơh dô nă cau sền be neh chơt, mơya tơnggơs gal ngan be ală sơmañ hơ trồ, be bràs di gah dàlềng cau ò rgơi kòp.

¹³Jơh ală cau hơ̆ neh chơt tòm bơta dòn, òhềt dòp geh bơta neh ho pơgon, mìng đal sền mơ gơs nùs chò hòp wă rò ală bơta hơ̆ bơh tiah ngài, bol khai kòp să he la cau nac crih mơ la cau ơm ing tòm plai ù.

¹⁴Bơh ală cau đơs behơ̆ yal tơlik loh lah bol khai gam jòi dô nơm lơgar tòm.

¹⁵Ngan, dilah bol khai neh kah kơlôi bơh lơgar mơ bol khai neh lik hơ̆, gen bol khai gơs tŭ lơmpah nàng rê wơl sơl.

¹⁶Mơya tŭ do bol khai jơh nùs kơp kòñ dô nơm lơgar niam rlau, hơ̆ la lơgar hơđang trồ; gen tàng Yàng Tom Trồ ò ƀàssìl geh sơnđan la Yàng Tom Trồ bol khai dê, bơh Kơnràñ neh rcang sir bol khai in dô nơm ƀòn dờng.

¹⁷Bơh bơta dòn Abraham, tòm tŭ kong lòng ơn Isak Yàng in, khai neh dòp geh jơnau ho pơgon mơ gơs nùs rcang sir nàng ơn kòn dùl khai dê,

¹⁸bơh kòn hơ̆ mơ Yàng Tom Trồ yal lah: “Bơh tòm Isak rơp gơlik gơs jơi bơtiàn mê dê.”

¹⁹Khai dòn lah Yàng Tom Trồ gơs gơnap gơnoar rgơi lơh cau chơt in kis wơl, kung ndròm be khai dòp geh wơl kòn khai dê bơh bơta chơt.

²⁰Bơh bơta dòn Isak ai lơngai Jakôp mơ Esau in mơ đơs bơh ală bơta rơp gơlik gơs.

²¹Bơh bơta dòn Jakôp, tòm tŭ mòr chơt, ai lơngai bàr nă kòn klau Jôsep in, sơnđìng să khai di gai jra mơ duh khoai.

²²Bơh bơta dòn Jôsep, tòm tŭ mòr chơt, tơngkah bơh bơta ală kòn sau Israel rơp lik lòt, mơ nting sồr bơh ală ntìng ƀồc khai dê.

²³Bơh bơta dòn mè bèp Môise, tòm tŭ pa deh gen cèng pồn tòm pe kơnhai, tài bơh bol khai gŏ kòn la mơnĕ mơnài, mơ bol khai ò rngòt di jơnau gơnoar sồr bơtau dê.

²⁴Bơh bơta dòn Môise, tòm tŭ neh dờng khai ò bài cau sơnđan khai la kòn sau bơtau Pharaôn dê.

²⁵Môise sac rwah chan kong bòl glar bal mơ làng bol Yàng Tom Trồ dê la niam rlau mơ dòp geh bơta hòn chò ing tồi glài dê.

²⁶Khai sền bơta bơtat bơtròh bơh Bơtau Krist la kas rlau mơ phan màng Ejiptơ dê, bơh khai kơp gơn phan ƀàn.

²⁷Bơh bơta dòn khai sang lơgar Ejiptơ, ò rngòt cau bơtau gơjrañ, bơh khai ntào kơ̆ be gŏ Yàng la Bơtau he ò rgơi gŏ.

²⁸Bơh bơta dòn khai bơtào gơs bơta pơjum sa Lòt Gan mơ bơta rsìh mhàm, nàng cau gơnrơh tơnroh kòn tơnhoa ò tup di cau Israel.

²⁹Bơh bơta dòn làng bol tiă Dàlềng Pơrhê be lòt hơđang tiah rañ rsơh, ai ală cau Ejiptơ tòm tŭ lòng lòt tiă gen kòl dà bŭ chơt jơh.

³⁰Bơh bơta dòn ală dơrñang theng Jerikô tơrlah jơh, tơnơ̆ mơ tŭ cau lòt gùt dar tòm poh ngai.

³¹Bơh bơta dòn cau ùr dri Rahap ò roh rui bal mơ ală cau ò dòn bơr, bơh khai neh wă rò dô bă sơrmah sơrmài ală cau lòt rwang sền lơgar.

³²Ñchi añ kòñ đơs tai taih? Bơh dilah añ đơs bơh Gideôn, Barak, Samsôn, Jepthe, Dabit, Samuel mơ ală cau gơnoar hwơr, gen ò tơl tŭ.

³³Ală cau hơ̆ bơh bơta dòn neh geh pha lin rlau mơ ală lơgar, lơh jat bơta song ring, dòp geh bơta neh ho pơgon, lềt bơr ală klìu triă,

³⁴tơnchơt ồs hơng, klàs di đào sồt, lơbơn lơño mơ gơlik pràn kơldang, tòm tŭ tòmlơh gơs nùs khin cha, ting bơtrơh mpồl ling làng bol bơdìh.

³⁵Gơs ală cau ùr neh dòp cau chơt bol khai dê kis wơl, gơs ală cau ndai kong cau lơh bòl glar jê sồt mơ ò bài cau hồ toh, bơh bol khai kòñ geh bơta kis wơl niam rlau.

³⁶Gơs ală cau ƀà kong gơlòng bòl glar be kong cau dơñŏ tơnhial, pòng pù, kơt mơ che sreng mơ kup jàm sơl.

³⁷Bol khai kong cau cơm mơ lŭ, òt koh, ơniai, sreh mơ đào, soh phan gơltau belàt, gơltau be mơ lòt nrah nring, kong rƀah lơòi, rung rài, rồn bơklơn;

³⁸bol khai lòt nrah nring tòm ƀlàng bràs, hơđang mơnơm, tòm trồm lŭ, tòm trồm ù; dunnia ò di pal bol khai in ơm.

³⁹Jơh ală cau hơ̆ bulah neh geh cau lơh cơng niam bơh bơta dòn bol khai dê, mơya bol khai òhềt dòp geh bơta Yàng Tom Trồ neh ho pơgon,

⁴⁰bơh Yàng Tom Trồ neh rcang sir bơta niam rlau bol he in, tồ rlau mơ bol he gen bol khai ò tus hơ bơta wil tơl.