Read koho Hebrơ 12 Bible Online

Hebrơ 12 - koho bible

Hebrơ 12

¹Behơ̆ gen, bơh bol he neh gơs oă cau lơh cơng gơrwàng gùt dar be dô puk mhwal dờng ngan, bol he kung pal sơrbì sang jơh ală bơta be phan àñ kơnjơ̆ bal mơ tồi glài gơđềt di he, pal kơ̆ cê ntoat jat bơta ntoat pơrlòng neh ràng tơlik di đap bol he;

²sền song tĕ di Yàng Jesu, la Bơtau sơnròp mơ lơh wil tơl bơta dòn, bơh bơta hòn chò neh ơn di đap Kơnràñ, mơ kong jai chi pơng, sền òsơp di bơta bơtat bơtròh, mơ ơm nggui đah ma sơbàn Yàng Tom Trồ dê.

³Behơ̆, oh mi sền kơlôi tĕ di Bơtau neh kong jai jơnau sòdră bơh ală cau glài dê, tồ ală oh mi in ò bòl glar hala gơplơ̆ nùs.

⁴Oh mi tòmdră mơ tồi glài tian gơs òhềt hòr mhàm;

⁵mơ oh mi neh hŭi jơnau bơto tơngkah kung be bơto tơngkah kòn lah: “Ơ kòn, bañ sền òsơp di bơta lơh glài tơmàl Yàng dê, Mơ bañ gơplơ̆ nùs tòm tŭ Kơnràñ lah pơrhơng;

⁶Bơh Kơnràñ lơh glài tơmàl di cau lơi Kơnràñ kòñ gơboh, Cau lơi Kơnràñ dòp la kòn gen ai gai ai mơng.”

⁷Oh mi kong lơh glài tơmàl, hơ̆ la Yàng Tom Trồ kòp oh mi be kòn, bơh gơs kòn lơi mơ bèp ò lơh glài tơmàl sơl ơ?

⁸Mơya dilah oh mi klàs di bơta lơh glài tơmàl mơ kòp nă pal kong, gen oh mi la kòn tir, ò di la kòn ngan.

⁹Mơ tai, bol he neh gơs bèp đah poac să lơh glài tơmàl, mơ bol he duh rngòt di bol khai, tơ ài lah Bèp đah hwềng gen bol he ò dòn duh sơlo rlau tai nàng geh kis ò ơ?

¹⁰Bơh bèp đah poac să jat nùs bol khai dê mơ lơh glài tơmàl bol he dô êt jŏ; mơya Bèp đah hwềng soàn lơh glài tơmàl nàng gơs kwơ màng bol he in, tồ bol he in geh pơnah bal tòm bơta sàng goh Kơnràñ dê.

¹¹Ngan ală bơta lơh glài tơmàl tòm tŭ do gơlơh be bòl glar, ò di chò hòp ò; mơya tơnơ̆ wơl gơlik ală plai song ring lơngap lơngai ală cau in neh kong bơtê behơ̆.

¹²Behơ̆ pò tĕ ală tê lơbơn lơño oh mi dê mơ lơh pràn kơldang tĕ ală gơltang mprơm oh mi dê.

¹³Lơh tĕ gùng song jơng oh mi in, nàng cau gơlte ò gơtup gơglih jơng, mơ geh sơmbòi la niam rlau.

¹⁴Ting jat tĕ bơta ring lơngai gơwèt mơ tơl nă cau, bal mơ bơta gơlik gơs sàng goh, bơh dilah ò gơlik gơs sàng goh gen ò gơs cau lơi rơp gŏ Yàng.

¹⁵Kơrhia tĕ, rngòt gơs cau lơi tòm oh mi ò tus dòp bơta nđàc Yàng Tom Trồ dê, mơ bơta sràt bơtang gơhòn be ryas mơ lơh nggồr nggàc tòm oh mi, mơ bơh hơ̆ lơh oă cau ndai gơlik gơs ngkòr ngkàc;

¹⁶bañ gơs cau lơi tìs glài rềs àr bơrnàn, hala cau jat dunnia be Esau, khai tac gơnoar kòn tơnhoa khai dê, mìng dòp dô nơm phan sa lơm.

¹⁷Ngan behơ̆, oh mi git lah tơnơ̆ wơl tòm tŭ khai kòñ geh pơrdòn lơngai lơngò, mơya kòl sang lòi, bulah khai ñìm rac mơ jòi kung ò bàn bơta tòmgơl nùs bèp khai dê.

¹⁸Mơ tai, oh mi ò di lòt tus hơ dô nơm mơnơm cau rgơi ƀư mơ gơs ồs sa hơng, kung ò tus hơ mhwal jù, klam jơngo, càl rbut,

¹⁹ntas kơlwòk, jơnau đơs, la jơnau cau lơi kơno gen kung dan bañ đơs jơnau lơi mơ bol khai tai.

²⁰Bơh bol khai kong ò jai jơnau gơnoar do: “Bulah phan poan jơng tup di mơnơm do, gơ kung rơp kong cơm mơ lŭ.”

²¹Bơta bol khai gŏ hơ̆ rngòt rngơt ngan, tian gơs Môise đơs lah: “Añ rngòt mơ rơm să ngan.”

²²Mơya oh mi neh tus hơ mơnơm Siôn, tus hơ ƀòn dờng Yàng Tom Trồ gam kis sùm, la Jerusalem hơđang trồ, tus hơ tơlak tơmàn cau gơnrơh jơnum bal,

²³tus hơ Hìu Jum Goh ală kòn tơnhoa dê neh cih sơnđan mat hơđang trồ, tus hơ Yàng Tom Trồ la Kwang Cahrña tơl nă cau, tus hơ hwềng soàn ală cau song ring dê neh geh wil tơl,

²⁴tus hơ Yàng Jesu la Bơtau Đơng Kừh bơta ho bal pa dê, tus hơ mhàm rsìh la mhàm đơs niam rlau mơ mhàm Abel dê.

²⁵Oh mi kơrhia tĕ, bañ sềt tồr mơ Bơtau ơm đơs. Bơh dilah ală cau ne neh ò bài iat cau bơto tơngkah tòm ù gen ò geh pleh klàs, tơ ài lah bol he pơrlac sang Bơtau bơto tơngkah bơh đang trồ gen mbe rgơi pleh klàs.

²⁶Tòm tŭ hơ̆ jơnau Bơtau hơ̆ neh lơnggơr ù tiah, mơya tòm tŭ do Kơnràñ ho pơgon lah: “Gam dô dơ̆ tai, Añ ò di mìng lơh lơnggơr ù tiah, mơya kung lơh lơnggơr trồ sơl.”

²⁷Mơ ală jơnau, “gam dô dơ̆ tai,” yal tơlik lah ală phan òs lơnggơr la ală phan neh geh crơng gơs rơp kòl pơrdô jơh, tồ ală phan ò tŭ lơi lơnggơr gen rơp geh gam wơl.

²⁸Behơ̆ gen, bơh bol he dòp geh dô nơm lơgar ò tŭ lơi lơnggơr, gen pal kah bơta nđàc, mơ ai nùs ki ngàm duh rngòt nàng duh broă Yàng Tom Trồ dô bă niam nùs Kơnràñ;

²⁹bơh Yàng Tom Trồ bol he dê la be ồs chu pơrguc.