Read koho Hebrơ 3 Bible Online

Hebrơ 3 - koho bible

Hebrơ 3

¹Behơ̆ gen, ơ oh mi sàng goh la ală cau geh pơnah tòm bơta hòi sac bơh đang trồ, sền kơlôi tĕ di Yàng Jesu la Cau gơnoar bơto dờng mơ Cau gơnoar dờng lam bồ ơn phan duh khoai mơ bol he dòn dòp.

²Kơnràñ dòn song mơ Bơtau neh pồ bơtào Kơnràñ, kung be Môise dòn song tòm hìu Yàng Tom Trồ dê.

³Bơh Kơnràñ neh geh kòp la di pal gơklŏ oă rlau mơ Môise, ò gơkrơi be cau tòm bơt bơtào hìu la ryŭ ryơm rlau mơ hìu.

⁴Ngan, hìu lơi kung pal gơs cau bơt bơtào gơ, mơya Bơtau neh bơtào gơs jơh ală phan la Yàng Tom Trồ.

⁵Môise ngan neh dòn song tòm jơh hìu Yàng Tom Trồ dê be dô nă cau dĭ gơna, nàng lơh cơng bơh ală bơta rơp đơs bơh tơnơ̆.

⁶Mơya Bơtau Krist dòn song be kòn klau at bồ hìu Yàng Tom Trồ dê; mơ bol he la hìu Kơnràñ dê, dilah bol he prap kơ̆ nùs dòn nền mơ bơta jòng să bơh bơta gơn kơnòm bol he dê.

⁷Gen tàng, be Yàng Hwềng Goh đơs lah: “Ngai do dilah bol mê kơno jơnau đơs Kơnràñ dê,

⁸Gen bol mê bañ kơldang nùs, be tòm tŭ tòmdră, be tòm ngai kong gơlòng bòl glar tòm ƀlàng ngềt ngơt,

⁹La tiah ồng pàng bol mê neh lòng Añ, bulah bol khai neh gŏ ală broă Añ jê tòm poan jơt nam.

¹⁰Gen tàng Añ neh gơjrañ di jơi bơtiàn do, Mơ đơs lah: ‘Tòm nùs bol khai tìs nrah sùm, Mơ ò đal git gùng dà Añ jê.’

¹¹Tòm tŭ Añ gơjrañ dờng Añ srat să lah: ‘Bol khai rơp ò tŭ lơi geh mut tòm bơta rlô Añ jê.’”

¹²Ơ ală oh mi, kơrhia tĕ, rngòt gơs cau lơi tòm oh mi gơs nùs iơh bơsak mơ ò dòn, mơ sang lòi Yàng Tom Trồ gam kis sùm.

¹³Mơya tòm tŭ gam sơnđan la “Ngai do,” gen kòp ngai pal bơto tơngkah tĕ bal mơ gơp, rngòt gơs cau lơi digùl oh mi kòl tồi glài pơrlồm mơ gơlik kơldang nùs.

¹⁴Bơh dilah bol he prap kơ̆ nùs dòn nền bơh sơnròp bol he dê jơl tus di lồi dut, gen bol he gơlik gơs cau gơs pơnah tòm Bơtau Krist,

¹⁵be Sră Goh neh đơs lah: “Ngai do tòm tŭ bol mê kơno jơnau đơs Kơnràñ dê, Gen bol mê bañ kơldang nùs, be tòm tŭ tòmdră.”

¹⁶Ñcau la cau neh kơno gen tòmdră taih? Ò di la jơh ală cau neh geh Môise lam lik lòt bơh Ejiptơ ò ơ?

¹⁷Yàng Tom Trồ neh gơjrañ mañ di ñcau tòm poan jơt nam taih? Ò di la ală cau neh tìs glài, mơ ƀồc bol khai neh gơpừ tòm ƀlàng ngềt ngơt ò ơ?

¹⁸Kơnràñ neh srat să mơ ñcau lah bol khai rơp ò tŭ lơi geh mut tòm bơta rlô Kơnràñ dê taih? Ò di la srat să mơ ală cau ò dòn bơr ò ơ?

¹⁹Behơ̆, bol he gŏ bol khai ò rgơi mut tòm hơ̆ la tài bơh ò dòn.