Read koho Hebrơ 7 Bible Online

Hebrơ 7 - koho bible

Hebrơ 7

¹Melcijedek do la bơtau Salem dê, cau gơnoar ơn phan duh khoai Yàng Tom Trồ Hơđang Rlau Jơh dê, neh lik wă rò Abraham mơ ai lơngai khai in tòm tŭ khai rê bơh tòmlơh geh pha lin mơ ală bơtau.

²Abraham kung ai dô pơnah jơt tòm jơh ală phan khai neh dòp geh mơ ơn bơtau in. Jat jơnau gơtha Melcijedek sơnròp ngan la “bơtau song ring,” kung la bơtau Salem dê, hơ̆ la “bơtau ring lơngai.”

³Khai ò gơs bèp, ò gơs mè, ò gơs jơi bơtiàn, ò gơs ngai deh, ò gơs ngai chơt, gen kung be Kòn Yàng Tom Trồ dê, khai kư̆ lơh gơs cau gơnoar ơn phan duh khoai gam sùm sùm.

⁴Sền tĕ, bơtau Salem màng ryŭ ò git lơh! Abraham la ồng pàng tiơng pơnro bol he dê, neh ơn dô pơnah jơt tòm ală phan khai neh tòmpìt geh.

⁵Mơ tai, tòm ală kòn sau Lebi dê, cau lơi neh dòp geh gơnoar broă cau gơnoar ơn phan duh khoai, gen lơh jat bơta boh lam mơ dòp dô pơnah jơt bơh di làng bol, hơ̆ la bơh di oh mi bol khai dê, bulah ală cau hơ̆ kung bơh jơi Abraham mơ gơlik gơs.

⁶Mơya, bơtau ne, ò di bal mơ jơi cau Lebi mơya neh dòp dô pơnah jơt Abraham dê mơ ai lơngai khai in la cau gơs jơnau ho pơgon.

⁷Cau gơs gơnoar hơđang ai lơngai cau ơm hơđơm in, hơ̆ la jơnau ò pơndang.

⁸Mơya đah ală cau dòp dô pơnah jơt la cau òs chơt, ai Melcijedek la cau gơs jơnau lơh cơng lah khai gam kis be jơnau Sră Goh bơto.

⁹Behơ̆ gen, rgơi đơs lah să tòm Lebi, la cau dòp dô pơnah jơt hơ̆ kung bơh Abraham mơ ơn dô pơnah jơt sơl,

¹⁰bơh tòm tŭ Melcijedek lòt rò Abraham, gen tŭ hơ̆ Lebi gam ơm tòm kơndul ồng pàng.

¹¹Mơ dilah bơta wil tơl ngan gơlik gơs bơh gơnoar broă cau gơnoar ơn phan duh khoai Lebi dê (bơh làng bol dòp leng bơta boh lam tòm tŭ khai ơm tòm tiah gơnoar hơ̆), gen mbe lơh pal gơs dô nă cau gơnoar ơn phan duh khoai ndai, jat jơi Melcijedek mơ ò di jat jơi Arôn taih?

¹²Bơh gơnoar broă cau gơnoar ơn phan duh khoai neh tòmgơl rau, gen bơta boh lam kung pal tòmgơl sơl.

¹³Mơ tài bơh Bơtau hơ̆ mơ gơs jơnau đơs la bơh jơi bơtiàn ndai, mơ bơh tòm jơi bơtiàn hơ̆ ò gơs cau lơi duh broă dê cơnòng duh khoai.

¹⁴Loh làng ngan lah Yàng bol he dê deh bơh jơi Juda; bơh jơi bơtiàn hơ̆ Môise ò đơs bơta lơi bơh gơnoar broă cau gơnoar ơn phan duh khoai.

¹⁵Bơta hơ̆ la loh làng rlau tai, tòm tŭ gơs dô nă cau gơnoar ơn phan duh khoai ndai bơtào tơngguh, kung be Melcijedek,

¹⁶mơ gơlik gơs cau gơnoar ơn phan duh khoai, ò jat jơnau gơnoar sồr bơta boh lam dê bơh jơi kòn mơnus, mơya jat gơnap gơnoar bơta kis ò gơs lồi.

¹⁷Bơh neh gơs jơnau lơh cơng bơh Kơnràñ lah: “Mê la cau gơnoar ơn phan duh khoai gam sùm sùm, Jat mpồl Melcijedek.”

¹⁸Behơ̆ gen, tài bơh bơta boh lam lài òr ò tơl pràn mơ ò kwơ gen neh sang lòi,

¹⁹(bơh bơta boh lam ò lơh wil tơl broă lơi ò), gen cèng tơmut dô bơta gơn kơnòm niam rlau, mơ kơnòm di bơta hơ̆ bol he lòt tus rềp hơ Yàng Tom Trồ.

²⁰Mơ tai, bơta hơ̆ ò gơlik gơs dilah ò đơs jơnau srat să, ai ală cau gơnoar ơn phan duh khoai ndai neh bơtào gơs mơ ò gơs jơnau srat să,

²¹mơya Yàng Jesu neh gơlik gơs cau gơnoar ơn phan duh khoai bơh jơnau ho nền tòm tŭ Yàng Tom Trồ đơs mơ Kơnràñ lah: “Yàng neh srat să, ò tòmgơl nùs, Mê la cau gơnoar ơn phan duh khoai gam sùm sùm,”

²²Gen Yàng Jesu neh gơlik gơs Bơtau Đơng Kơ̆ dô bơta ho bal niam rlau dê.

²³Ai ală cau gơnoar ơn phan duh khoai ne, bulah oă cau mơya bơh bơta chơt kơryan, gen bol khai ò rgơi duh broă sùm.

²⁴Mơya tài bơh Yàng Jesu la Bơtau kis sùm sùm, gen tàng Kơnràñ dòp geh gơnoar broă ơn phan duh khoai ò gơs tòmgơl.

²⁵Tài bơh hơ̆, tàng Kơnràñ rgơi dong klàs wil tơl ală cau kơnòm di Kơnràñ mơ lòt tus rềp hơ Yàng Tom Trồ, bơh Kơnràñ gam kis sùm sùm nàng hòi dan ala bol khai in.

²⁶Yàng Jesu la cau gơnoar dờng lam bồ ơn phan duh khoai bol he pal càng; Kơnràñ la sàng goh, ò gơs tiah geh lah pơrhơng, ò ƀơ̆ wàm, cah is bơh ală cau glài, geh yò tơngguh rlau mơ ală tap trồ.

²⁷Kơnràñ ò di be ală cau gơnoar dờng lam bồ ơn phan duh khoai ne, la cau kòp ngai pal ơn phan duh khoai tài bơh glài bol khai dê, tơnơ̆ bơh glài làng bol dê; bơh Kơnràñ neh lơh broă hơ̆ dô dơ̆ tơl rau, tòm tŭ Kơnràñ ơn să tòm Kơnràñ.

²⁸Bơh bơta boh lam pồ bơtào ală cau lơbơn lơño lơh gơs ală cau gơnoar dờng lam bồ ơn phan duh khoai, mơya jơnau ho nền tus tơnơ̆ mơ bơta boh lam, gen pồ bơtào Kòn la Bơtau neh geh wil tơl gam sùm sùm.