Read koho Hebrơ 8 Bible Online

Hebrơ 8 - koho bible

Hebrơ 8

¹Tòm ală bơta bol he đơs bơh nti, bơta dờng màng la be do: Bol he gơs dô nă cau gơnoar dờng lam bồ ơn phan duh khoai behơ̆, neh nggui đah ma sơbàn Bơtau ryŭ ryơm hơđang ală tap trồ,

²la Cau duh broă tòm tiah sàng goh, tòm hìu duh khoai ngan hơđang trồ, bơh Yàng neh bơtào gơs ò di bơh kòn mơnus.

³Jơh ală cau gơnoar dờng lam bồ ơn phan duh khoai neh geh pồ bơtào nàng ơn phan pơdơng mơ phan ơn duh khoai, gen tàng Cau do kung pal gơs phan nàng ơn sơl.

⁴Dilah Kơnràñ ơm tòm ù, gen Kơnràñ ò geh gơlik gơs cau gơnoar ơn phan duh khoai, bơh neh gơs ală cau gơnoar ơn phan duh khoai nàng ơn phan pơdơng jat bơta boh lam sồr.

⁵Bol hơ̆ duh broă jat sơnoa rnoas mơ rùp ală bơta hơđang trồ dê, be Môise tòm tŭ khai rơp bơtào gơs Hìu Ing Duh Khoai, gen geh Yàng Tom Trồ nting mơ khai lah: “Kơrhia tĕ, lơh jơh ală bơta jat sơnoa rnoas neh sơnio mê in hơđang mơnơm.”

⁶Mơya tŭ do Yàng Jesu neh gơs gơnoar broă dờng màng rlau, kung be Kơnràñ neh lơh gơs Bơtau Đơng Kừh dô bơta ho bal niam rlau, bơtào hơđang mơnàng ală jơnau ho pơgon niam rlau.

⁷Bơh dilah bơta ho bal sơnròp neh gơs wil tơl rau, gen ò càng bơtào gơs bơta ho bal dơ̆ bàr.

⁸Mơya Yàng Tom Trồ lah pơrhơng làng bol Juda mơ đơs lah: “Di ngan, ală ngai rơp tus, Añ rơp bơtào dô bơta ho bal pa bal mơ hìu Israel mơ hìu Juda,

⁹ò di be bơta ho bal Añ neh bơtào bal mơ ồng pàng bol khai, Tòm ngai Añ neh at tê tề lam bol khai lik bơh lơgar Ejiptơ; Bơh bol khai ò dòn song lơh jat bơta ho bal Añ jê, Gen tàng Añ sang lòi bol khai,” hơ̆ la jơnau Yàng đơs.

¹⁰Yàng đơs tai lah: “Do la bơta ho bal Añ rơp bơtào bal mơ hìu Israel, Tơnơ̆ mơ ală ngai hơ̆: Añ rơp ơn bơta boh lam Añ jê tòm dơngoh bol khai dê, Mơ cih gơtòm nùs bol khai; Añ rơp la Yàng Tom Trồ bol khai dê, Mơ bol khai rơp la làng bol Añ jê.

¹¹Bol khai ò càng bơto cau gơp ƀòn he dê. Mơ bơto kòp nă oh mi he lah: ‘Dòp git tĕ Yàng,’ jơh tơl nă bol khai rơp git Añ, Bơh cau dềt jơl tus di cau dờng, rơp dòp git Añ.

¹²Bơh Añ rơp ai nùs kòñ nđàc nàng toh ală bơta tồi glài iơh bơsak bol khai dê, Ò kah ală tồi glài bol khai dê tai.”

¹³Bơh neh sơnđan bơta ho bal do la pa, gen Yàng Tom Trồ neh lơh bơta ho bal sơnròp gơlik gơs yau. Mơ bơta lơi la yau, klar, gen gơ rơp roh thit mo.