Read koho Jakơ 1 Bible Online

Jakơ 1 - koho bible

Jakơ 1

¹Jakơ, dĭ gơna Yàng Tom Trồ mơ Yàng Jesu Krist dê, pơyoa jơnau còp să jơt bàr jơi bơtiàn ơm nrah nring làm bă tiah.

²Ơ oh mi añ jê, tòm tŭ oh mi tìp li bơta gơlòng bòl glar gen sền tĕ jơh ală bơta hơ̆ be la bơta hòn chò dờng,

³bơh git lah bơta lòng bơta dòn oh mi dê gơlik gơs bơta kơ̆ nùs.

⁴Mơ bơta kơ̆ nùs pal gơlik cồng nha wil tơl tồ oh mi in geh dờng wil tơl, ò siơ̆u dô bơta lơi.

⁵Dilah tòm oh mi gơs cau lơi siơ̆u bơta jak chài, dan tĕ mơ Yàng Tom Trồ, gen Kơnràñ rơp ai, bơh Yàng Tom Trồ la Bơtau ai gòi tơl nă cau in dô bă ơnàng, ò lah pơrhơng cau lơi.

⁶Mơya pal ai bơta dòn mơ dan, bañ pin dô êt lơi, bơh cau lơi pin gen khai gơlơh be ryà dàlềng gơkòl càl khồm pơrdô tềng do tềng dă.

⁷Cau behơ̆ bañ kơlôi he rơp dòp geh phan lơi bơh di Yàng:

⁸Bơh hơ̆ la dô nă cau gơs bàr đah nùs, ò lơh nền bơta lơi.

⁹Oh mi lơi ơm tòm sèng cau dềt rhền, gen jòng să tĕ bơh bơta he geh yò tơngguh;

¹⁰cau pas gơs kung jòng să tĕ bơh bơta he geh tơnliah să, tài bơh khai rơp ro jrùh be bơkào ñhơt.

¹¹Mattơngai lik, duh trơàl, gơlơh ñhơt ro, bơkào jrùh, bơta hàng mơnĕ gơ dê roh rui jơh. Cau pas gơs kung rơp ro jrùh tòm tŭ khai gam lơh lòt tòm rài kis khai dê behơ̆ sơl.

¹²Lơngai cau in kong jai bơta gơlòng bòl glar, bơh tòm tŭ neh kong jai bơta lòng rau gen rơp dòp geh sơgơn bơtau bơta kis mơ Yàng neh ho pơgon ai cau in kòñ gơboh di Kơnràñ.

¹³Bañ gơs cau lơi tòm tŭ tìp bơta ơniai gen đơs lah: “Añ kòl Yàng Tom Trồ ơniai,” bơh Yàng Tom Trồ ò gơs tŭ lơi kòl bơta iơh lơi ơniai ò, mơ să tòm Kơnràñ kung ò ơniai cau lơi sơl.

¹⁴Mơya kòp nă cau kòl tòm bơta ơniai tòm tŭ gơs bơta hàm kòñ is chồl bơtrut he.

¹⁵Chòp bơta hàm kòñ is gơ kung be bun gen deh tồi glài; dơ̆ tồi glài neh tơl dờng, gen tơnggơs bơta chơt.

¹⁶Ơ oh mi kòñ gơboh añ jê, bañ gơkòl pơrlồm.

¹⁷Jơh ală bơta nđàc niam mơ bơta ai gòi wil tơl tus bơh đang jòng, gơ mù bơh di Yàng bèp la bơta àng; tòm Kơnràñ ò gơs bơta tòmgơl, kung ò gơs mƀur bơta pơrlac lơi ò.

¹⁸Kơnràñ jat nùs kòñ Kơnràñ dê mơ tơnggơs bol he kơnòm dê jơnau song, tồ bol he in gơlik be plai bồ sơnam tòm ală phan Kơnràñ neh crơng gơs.

¹⁹Ơ oh mi kòñ gơboh añ jê, oh mi pal git bơta do: Kòp nă cau pal mhar iat, òbat đơs, mơ òbat gơjrañ;

²⁰bơh bơta gơjrañ kòn mơnus dê ò lơh gơlik bơta song ring Yàng Tom Trồ dê.

²¹Behơ̆, sang tĕ jơh ală bơta ƀơ̆ ƀơl mơ bơta iơh bơsak bềng lìu, ai nùs niam lơnhơn mơ dòp jơnau Yàng neh tam tòm oh mi, la jơnau rgơi dong klàs hwềng soàn oh mi dê.

²²Lơh jat tĕ jơnau Yàng, bañ mìng iat lơm mơ pơrlồm să he.

²³Bơh dilah gơs cau lơi iat jơnau Yàng mơ ò lơh jat, gen ò gơkrơi be dô nă cau ne triang muh mat he tòm krơh,

²⁴gŏ muh mat rau gen lòt, mơ hŭi mo muh mat he la be lơi.

²⁵Mơya cau lơi sơwì nền bơta boh lam wil tơl, la bơta boh lam bơh bơta khat gơboh, mơ kư̆ lơh behơ̆, ò di iat rau gen hŭi, mơya kư̆ lơh jat, gen cau hơ̆ rơp geh lơngai lơngò tòm broă khai dê.

²⁶Dilah gơs cau lơi kơlôi lah he dòn jat jơnau song, mơ ò at bồ lơmpiat he mơya pơrlồm is nùs he, gen bơta dòn jơnau song cau hơ̆ dê la ò kwơ.

²⁷Bơta dòn jơnau song sàng goh ò ƀơ̆ ƀơl di đap Yàng Tom Trồ la Bèp, hơ̆ la còp ală cau kòn đòi mơ ală cau ùr bơnrau tòm bơta dồn sa rƀah bol khai dê, mơ kơrmap gàr să he klàs bơh bơta roh rui dunnia dê.