Read koho Jakơ 4 Bible Online

Jakơ 4 - koho bible

Jakơ 4

¹Mbơh tus ală bơta kơlìn mơ bơta tòmlơh tòm oh mi taih? Hơ̆ ò di la bơh nùs hàm kòñ is òs tòmlơh tòm ală pơnah să jan oh mi dê ò ơ?

²Oh mi hàm kòñ mơ ò rgơi geh, gen oh mi tơnchơt cau. Oh mi hòm kòñ ir mơ ò rgơi dòp geh phan lơi, gen oh mi tòmlơh mơ gơs bơta kơlìn. Oh mi ò geh phan lơi tài bơh ò hòi dan.

³Oh mi hòi dan mơ ò dòp geh tài bơh dan tìs jơnau, nàng ngui jat nùs hàm kòñ is he dê.

⁴Ơ ală cau ò dòn song ne! Oh mi ò git lah lơh bơyô mơ dunnia hơ̆ la tòmdră mơ Yàng Tom Trồ ò ơ? Gen tàng cau lơi kòñ lơh bơyô mơ dunnia gen cau hơ̆ gơlik gơs cau sò tơm mơ Yàng Tom Trồ.

⁵Hala oh mi kơlôi Sră Goh đơs ò kwơ tòm tŭ đơs be do: “Hwềng mơ Kơnràñ neh ai ơm tòm nùs bol he, đềt mềr mơ bol he tian gơs ƀoah pơrñat.”

⁶Mơya Kơnràñ ai bol he in bơta nđàc oă rlau tai. Behơ̆ tàng Sră Goh cih lah: “Yàng Tom Trồ tòmdră mơ cau pơnhừ să, mơya ai bơta nđàc cau tơnliah să in.”

⁷Behơ̆ dòn duh tĕ Yàng Tom Trồ. Tòmdră tĕ mơ cà ràk, gen gơ rơp pleh ngài di oh mi.

⁸Tus tĕ rềp mơ Yàng Tom Trồ gen Kơnràñ rơp tus rềp mơ oh mi. Ơ ală cau glài, rào tĕ tê he; ơ ală cau gơs bàr đah nùs, lơh tĕ sàng goh nùs he.

⁹Moat jrùng tĕ, rac ròc mơ ñìm rac tĕ; gơl tĕ bơta ñŏ gơlik bơta ñìm, gơl tĕ bơta hòn chò gơlik bơta moat jrùng.

¹⁰Tơnliah tĕ să he di đap Yàng, gen Kơnràñ rơp yò tơngguh oh mi.

¹¹Ơ oh mi, bañ đơs joh di gơp. Cau lơi đơs joh di oh mi he hala cahrña di oh mi he, hơ̆ la đơs joh di bơta boh lam, mơ cahrña di bơta boh lam. Mơya dilah mê cahrña di bơta boh lam gen mê ò di la cau lơh jat, mơya la cau cahrña di bơta boh lam.

¹²Gơs mìng dô Bơtau bơtào gơs bơta boh lam, mơ cahrña, hơ̆ la Bơtau rgơi dong klàs mơ rgơi tơnroh. Ai mê la ñcau mơ khin cahrña dê cau gơp ƀòn he taih?

¹³Tŭ do, ơ oh mi la cau đơs lah: “Ngai do hala ngai hìng bol hi rơp lòt tus hơ ƀòn dờng ne, ơm tềng hơ̆ dô nam, kă bro mơ jòi cồng nha.”

¹⁴Mơya oh mi ò git ngai hìng rơp gơlik be lơi! Bơta kis oh mi dê la ñchi taih? Bơh oh mi be dà tŭ, gơlik tòm dô êt jŏ gen roh thit.

¹⁵Di ngan oh mi pal đơs lah: “Dilah Yàng kòñ mơ bol hi gam kis, gen bol hi rơp lơh broă do broă ne.”

¹⁶Mơya oh mi jòng să, pơnhừ să. Jơh ală bơta jòng să behơ̆ la iơh.

¹⁷Gen tàng cau lơi git broă niam pal lơh mơ ò lơh gen tìs glài.