Read koho I Pier 3 Bible Online

I Pier 3 - koho bible

I Pier 3

¹Kung behơ̆ sơl, ơ ală cau la bau ùr, dòn duh tĕ bau klau ai di, tồ dilah gơs bau klau lơi ò dòn jat jơnau Yàng, bulah bol ai ò ai jơnau Yàng nàng bơto bol khai, mơya bol khai kung rgơi kơnòm di bơta lơh lòt bol ai dê mơ gơlik gơs cau dòn,

²bơh neh gŏ bơta lơh lòt bol ai dê la sàng goh mơ duh rngòt.

³Ală cau ùr bañ sơmpô să đah bơdìh, be bơka sŏ, dò wan ală phan màh, mơ soh ală ồi ào màng,

⁴mơya ai tĕ hwềng nùs niam lơnhơn mơ ring lơngai nàng sơmpô đah dơlam nùs, hơ̆ la bơta sơmpô ò ồm lề mơ màng ngan di đap Yàng Tom Trồ.

⁵Bơh ală cau ùr sàng goh rài yau gơn kơnòm di Yàng Tom Trồ, bol khai kung neh sơmpô să he behơ̆ sơl, mơ dòn duh bau klau he,

⁶be Sara dòn bơr Abraham, sơnđan khai la cau tòm. Tŭ do ală bol ai la kòn ùr Sara dê dilah bol ai lơh bơta niam gen ò rngòt di bơta lơi.

⁷Kung behơ̆ sơl, ơ ală cau la bau klau, ơm tĕ dô bă di pal mơ bau ùr he, ki ngàm di khai la cau lơbơn rlau mơ he, bơh khai bal mơ oh mi rơp pơrdòn bơta nđàc bơta kis dê, behơ̆ ò gơs bơta lơi kơryan bơta hòi dan oh mi dê.

⁸Lồi tơnơ̆, jơh tơl nă oh mi pal gơs dô nùs kơlôi bal, nđàc sơngit bal, kòñ gơboh di oh mi, gơs nùs lơbơn niam mơ pơndêt să.

⁹Bañ ai bơta iơh sal wơl bơta iơh, kung bañ ai bơta lah sơrpah sal wơl bơta lah sơrpah; mơya gơpơrlơ̆ wơl, pal ai lơngai, bơh bơta hơ̆ mơ oh mi geh hòi sac nàng pơrdòn bơta lơngai lơngò.

¹⁰Bơh, “Cau lơi kòñ gơboh bơta kis Mơ kòñ gŏ ală ngai niam, Gen pal kơrmap gàr lơmpiat bañ đơs jơnau iơh bơsak, Mơ sơndồi bañ đơs jơnau lac lèo,

¹¹Pal pleh di bơta iơh mơ lơh bơta niam, Pal jòi bơta ring lơngai mơ ting jat bơta hơ̆.

¹²Bơh mat Yàng wèt sền cau song ring, Tồr Kơnràñ kòñ iat jơnau hòi dan bol khai dê; Mơya muh mat Yàng sòdră di cau lơh iơh.”

¹³Dilah oh mi ngac ngar lơh bơta niam, gen ñcau kòñ lơh iơh di oh mi taih?

¹⁴Mơya dilah oh mi bơh bơta song ring mơ pal kong bòl glar jê sồt, gen gơs lơngai. Bañ rngòt, kung bañ dơrcul nùs bơh broă iơh bol khai lơh di he.

¹⁵Mơya duh rngòt tĕ di Bơtau Krist la sàng goh mơ bơtào Kơnràñ lơh gơs Yàng tòm nùs oh mi dê. Pal sùm sùm rcang sir nàng ho wơl mơ cau lơi lùp bơh bơta gơn kơnòm tòm oh mi, mơ lơh bơta hơ̆ dô bă niam lơnhơn mơ duh rngòt.

¹⁶Kơrmap gàr tĕ nùs tồr oh mi dê dô bă niam, nàng tòm tŭ ală cau đơs iơh bơh bơta lơh lòt niam oh mi dê tòm Bơtau Krist, gen bol khai pal ƀàssìl.

¹⁷Bơh dilah nùs kòñ Yàng Tom Trồ dê la behơ̆, gen chan lơh bơta niam mơ kong bòl glar jê sồt la niam rlau mơ lơh bơta iơh.

¹⁸Bơh Bơtau Krist kung tài bơh tồi glài mơ kong chơt dô dơ̆ tơl rau, Kơnràñ la Bơtau song ring kong ala cau ò song ring in, nàng lam bol he tus hơ Yàng Tom Trồ; Kơnràñ neh kong chơt đah pơnah poac să, mơya geh kis đah pơnah hwềng.

¹⁹Tòm hwềng hơ̆, Kơnràñ neh lòt bơto yal ală hwềng in kòl tòm tiah ơm jàm,

²⁰hơ̆ la ală cau ò dòn bơr tòm rài yau, tòm tŭ Yàng Tom Trồ kong ơt gơn tòm rài Nôe tòm tŭ khai pơng ơhò; tòm ơhò hơ̆ gơs mìng dô êt cau, la phàm nă lơm, geh dong klàs bơh dà.

²¹Dà hơ̆ lơh rùp sơnio bơh bơta ƀaptem tòm tŭ do dong klàs oh mi, ò di la tă sang bơta ngkòr ngkàc poac să dê ò, mơya la dô bơta rac dan mơ Yàng Tom Trồ nàng gơs nùs tồr niam, kơnòm di bơta kis wơl Yàng Jesu Krist dê,

²²la Bơtau neh guh hơ trồ, tŭ do ơm nggui đah ma Yàng Tom Trồ; ală cau gơnrơh, ală gơnoar at bồ, mơ ală gơnoar pràn dòn duh Kơnràñ.