Read koho II Pier 1 Bible Online

II Pier 1 - koho bible

II Pier 1

¹Simôn Pier, la dĭ gơna mơ cau gơnoar bơto dờng Yàng Jesu Krist dê, pơyoa ală cau neh dòp dô bơta dòn kas màng be bol he tòm bơta song ring Yàng Tom Trồ mơ Yàng dong klàs bol he dê la Yàng Jesu Krist.

²Dan bơta nđàc mơ bơta lơngap lơngai geh ai bơtơl bềng lìu oh mi in kơnòm di bơta dòp git Yàng Tom Trồ mơ Yàng Jesu la Yàng bol he dê.

³Gơnap gơnoar sàng goh Yàng Tom Trồ dê neh ai bol he in jơh ală bơta gơrê bal mơ bơta kis mơ bơta duh rngòt, kơnòm di bơta dòp git Kơnràñ la Bơtau neh hòi sac bol he tòm bơta gơklŏ mơ bơta kơ̆ dơn Kơnràñ dê.

⁴Kung bơh bơta gơklŏ mơ bơta kơ̆ dơn hơ̆, Kơnràñ neh ai bol he in jơnau ho pơgon màng ngan mơ dờng ngan Kơnràñ dê, nàng kơnòm di bơta hơ̆ oh mi geh pleh klàs bơh di bơta ồm lề tòm dunnia gơlik bơh nùs hàm kòñ is, mơ geh pơnah tòm nùs Yàng Tom Trồ dê.

⁵Tài bơh hơ̆ oh mi pal jơh nùs bơtơl bơta kơ̆ dơn hơđang bơta dòn, bơtơl bơta git jak hơđang bơta kơ̆ dơn,

⁶bơtơl bơta git kơrhia hơđang bơta git jak, bơtơl bơta ơt ơl hơđang bơta git kơrhia, bơtơl bơta duh rngòt hơđang bơta ơt ơl,

⁷bơtơl bơta gơboh gơbài di oh mi hơđang bơta duh rngòt, bơtơl nùs kòñ gơboh hơđang bơta gơboh gơbài di oh mi.

⁸Bơh dilah ală bơta hơ̆ gơs tơl tòm oh mi mơ tơngkah tơngkañ, gen rơp dong oh mi gơs kwơ mơ gơlik cồng nha tòm bơta dòp git Yàng Jesu Krist bol he dê.

⁹Bơh cau lơi siơ̆u ală bơta hơ̆ gen gơlik gơs be cau mìng gŏ rềp, cau jơngo, neh hŭi lah khai neh geh rào goh bơh ală tồi glài yau khai dê.

¹⁰Behơ̆, ơ oh mi, jơh nùs tĕ rlau tai nàng lơh nền cê bơh bơta Yàng hòi sac mơ sac rwah he; dilah lơh bơta hơ̆ gen oh mi ò gơs tŭ lơi gơtup tìs.

¹¹Behơ̆ oh mi rơp geh ai mut dô bă dờng ơnàng tòm lơgar gam sùm sùm Yàng dê mơ Yàng Dong Klàs bol he dê la Yàng Jesu Krist.

¹²Behơ̆ tàng añ gơs nùs kòñ tơngkah sùm ală bơta hơ̆ oh mi in, bulah oh mi neh git loh mơ ơm kơ̆ cê tòm jơnau song mơ oh mi neh gơs.

¹³Añ gam ơm tòm să jan do kàr lơi, gen añ kơlôi ngan la añ ai jơnau bơto tơngkah nàng chồl nùs oh mi,

¹⁴bơh añ git lah ò gam jŏ tai añ rơp sang să jan do, be Yàng Jesu Krist bol he dê neh yal añ in git.

¹⁵Añ jơh nùs lơh bơta hơ̆ nàng tơnơ̆ mơ tŭ añ neh sang rài rau gen oh mi kung rgơi kư̆ kah sùm ală bơta hơ̆.

¹⁶Tòm tŭ bol hi yal oh mi in git bơh gơnap gơnoar mơ bơta tus wơl Yàng Jesu Krist bol he dê, gen bol hi ò jat jơnau gơlềng gơlàng bơh dơngoh kơlôi cau dê, mơya mat tòm bol hi dê neh gŏ bơta ryŭ ryơm Kơnràñ dê.

¹⁷Bơh Kơnràñ neh dòp geh bơta màng ryŭ mơ bơta gơklŏ bơh Yàng Tom Trồ la Bèp, mơ gơs jơnau bơh tiah gơklŏ jòng ngan đơs mơ Kơnràñ lah: “Do la Kòn kòñ gơboh Añ jê, niam nùs Añ tòm ală bơta,”

¹⁸bơh să tòm bol hi kung neh kơno jơnau hơ̆ tus bơh trồ, tòm tŭ bol hi ơm bal mơ Kơnràñ hơđang mơnơm sàng goh.

¹⁹Bol he gơs ală jơnau đơs hwơr sơlo kơ̆ nền rlau tai. Oh mi pal kơlôi nền bơh jơnau hơ̆, be ồs đèng pơnđàng sòl tòm tiah klam jơngo jơl tus di tŭ rìng àng, mơ sơmañ bềng àng drim lik tòm nùs oh mi dê.

²⁰Sơnròp ngan pal git lah ò gơs jơnau gơnoar hwơr lơi tòm Sră Goh la bơh nùs is cau dê mơ yal tơlik ò,

²¹bơh ò gơs jơnau gơnoar hwơr lơi bơh nùs is dô nă cau lơi mơ gơs, mơya hơ̆ la bơh Yàng Hwềng Goh lơh rngoh rngac mơ cau neh đơs jơnau Yàng Tom Trồ dê.