Read koho II Pier 2 Bible Online

II Pier 2 - koho bible

II Pier 2

¹Mơya, kung be tòm làng bol neh gơs cau gơnoar hwơr ma blac bơtào tơngguh, gen kung rơp gơs cau bơto ma blac tòm oh mi sơl; bol khai rơp bơto òm ală gùng duh khoai tìs mơ tơnroh cau, tian gơs pơndang sang Yàng neh rwat bol khai; bol khai cèng is bơta roh rui mhar ngan să tòm bol khai in.

²Bulah behơ̆, gơs oă cau rơp jat ală bơta bung jang bol khai dê; tài bơh bol khai mơ gùng jơnau song rơp kong cau dơñŏ tơnhial.

³Bol khai rơp bơh nùs hàm hà mơ ngui jơnau blac pơrlồm nàng sa kwì di oh mi, mơya bơta lơh nền glài di bol khai bơh lài òr ò di òbat tus, mơ bơta roh rui ơm gơn bol khai kung be cau ò bic.

⁴Bơh dilah Yàng Tom Trồ ò pơlai ală cau gơnrơh neh tìs glài, mơya neh sơrbì bol khai tòm brah tìng, krơ̆ tòm tiah klam jơngo, lòi jàm tus di tơngai cahrña.

⁵Dilah Kơnràñ ò pơlai dunnia yau òr, mìng sền gàr Nôe la cau bơto yal jơnau song ring bal mơ poh nă cau ndai, tòm tŭ Kơnràñ sồr dà kŏ tus tòm dunnia ò duh rngòt hơ̆.

⁶Dilah Kơnràñ neh lơh nền glài ƀòn dờng Sôdôm mơ Gômôrơ gơlik gơs bùh, nàng lòi krơh ală cau in ò duh rngòt tòm rài tơnơ̆.

⁷Mơ dilah Kơnràñ dong tă Lot la cau song ring, neh kơlôi moat ngan bơh bơta lơh lòt bung jang ală cau iơh bơsak dê,

⁸(bơh cau song ring do kis digùl bol khai kòp ngai hwềng soàn song ring khai dê jê sồt moat jrùng bơh ală broă tìs khat gơboh bol khai dê).

⁹Gen Yàng git mbe dong tă ală cau duh rngòt klàs bơh ală bơta gơlòng bòl glar, mơ git mbe krơ̆ jàm ală cau ò song ring tòm bơta lơh glài jàm jơl tus di ngai cahrña,

¹⁰lài ngan la ală cau lơh lòt jat nùs hàm kòñ is ngkòr ngkàc poac să dê, mơ sền òsơp di ală gơnoar Yàng dê.

¹¹Bol khai dờng nùs, lơh be tơl, ò rngòt đơs bơrsèl tơnhial di ală gơnoar dờng ryŭ. Bulah ală cau gơnrơh, la cau gơs gơnoar pràn mơ gơnap gơnoar dờng rlau, kung ò ai jơnau bơrsèl tơnhial nàng yă ală gơnoar dờng ryŭ hơ̆ di đap Yàng sơl.

¹²Mơya bol khai kung be phan poan jơng ò gơs dơngoh kơlôi, mìng tơnggơs jat bơta òs, lòi cau in kup lơh poac; bol khai jak đơs bơrsèl tơnhial di ală bơta bol khai ò git wă, gen bol khai rơp kong tơnroh tòm bơta roh rui bal mơ bol gơ;

¹³bol khai kong bòl glar jê sồt bơh broă ò song ring bol khai dê. Bol khai hừh nùs tòm bơta ñô sa kơnhơl gơlềng gơlàng tòm trồ ngai; bol khai la tềl ƀơ̆ ƀơl ngkòr ngkàc, ai lơh chò hòp tòm bơta blac pơrlồm tòm tŭ ñô sa khat gơboh bal mơ oh mi.

¹⁴Gar mat bol khai dê bềng bơta rềs àr bơrnàn, tìs glài ò git dil, pơndòm ơniai ală cau ò kơ̆ cê, nùs bol khai bềng bơta hàm hà. Bol khai la ală cau pal kong srat sơntơm.

¹⁵Bol khai neh sang gùng song mơ lòt tìs nrah, jat gùng Balaam kòn klau Beô dê, la cau hàm kòñ jền tơngai bơh broă iơh bơsak,

¹⁶mơya khai neh kong lah pơrhơng tài bơh bơta tìs glài khai dê, bơh gơs dô nơm alàng kloat ai jơnau kòn mơnus mơ đơs nàng kơryan bơta hàm kòñ sơnrồng sơnrang cau gơnoar hwơr hơ̆ dê.

¹⁷Ală cau hơ̆ kung be ală croh ò gơs dà, be dà tŭ kòl càl dờng khồm pơrdô; bơta klam jơngo cik la bơta neh rcang lòi bol khai in.

¹⁸Bol khai đơs ală jơnau blac pơrlồm nàng jòng să, ngui ală bơta hàm kòñ is poac să dê mơ bơta bung jang nàng pơndòm ơniai ală cau pa klàs bơh di ală cau lơh lòt tìs nrah.

¹⁹Bol khai ho ai bơta khat gơboh cau in, mơya să tòm bol khai la dĭ gơna bơta ồm lề dê; bơh cau lơi kòl bơta lơi at bồ, gen cau hơ̆ la dĭ gơna bơta hơ̆ dê.

²⁰Dilah bol khai neh kơnòm dê bơta dòp git Yàng la Yàng Dong Klàs bol he dê la Yàng Jesu Krist, mơ geh lik klàs bơh bơta ngkòr ngkàc dunnia dê rau, mơ dilah gơkòl ală bơta hơ̆ kơt wơl mơ at bồ tai, gen bơta lồi dut bol khai dê rơp gơlik iơh rlau mơ lài òr.

²¹Chan bol khai ò gơs tŭ lơi git gùng bơta song ring dê la niam rlau mơ neh git rau mơya tơnơ̆ wơl pơrlac sang bơta sồr lam sàng goh neh bơto yal bol khai in.

²²Neh gơtơntus bol khai in tòm toh be jơnau pơnđik song ngan lah: “So liap wơl phan gơ neh hă; sur neh tơnum rau gen pùng wơl tòm bŏ.”