Read koho I Jang 5 Bible Online

I Jang 5 - koho bible

I Jang 5

¹Cau lơi dòn Yàng Jesu la Bơtau Krist gen khai la kòn Yàng Tom Trồ dê, mơ cau lơi kòñ gơboh di Bơtau tơnggơs, gen kung kòñ gơboh di ală cau Kơnràñ neh tơnggơs.

²Bơh bơta do bol he git he kòñ gơboh di ală kòn Yàng Tom Trồ dê, hơ̆ la tòm tŭ bol he kòñ gơboh di Yàng Tom Trồ mơ lơh jat ală bơta sồr lam Kơnràñ dê.

³Kòñ gơboh dê Yàng Tom Trồ hơ̆ la bol he prap gàr ală bơta sồr lam Kơnràñ dê; bơta sồr lam Kơnràñ di ò di la kơnjơ̆.

⁴Bơh bơta lơi tơnggơs bơh Yàng Tom Trồ gen pha lin rlau mơ dunnia; mơ bơta pha lin rlau mơ dunnia, hơ̆ la bơta dòn bol he dê.

⁵Ñcau la cau pha lin rlau mơ dunnia, hơ̆ la mìng cau dòn Yàng Jesu la Kòn Yàng Tom Trồ.

⁶Yàng Jesu Krist la Bơtau neh ai dà mơ mhàm mơ lòt tus; ò di mìng ai dà lơm ò, mơya ai dà mơ mhàm;

⁷Yàng Hwềng lơh cơng, tài bơh Yàng Hwềng la jơnau song.

⁸Bơh gơs pe bơta lơh cơng: Yàng Hwềng, dà mơ mhàm; jơh pe bơta hơ̆ dô bă bal.

⁹Dilah bol he dòp jơnau lơh cơng jơi kòn mơnus dê, gen jơnau lơh cơng Yàng Tom Trồ dê la dờng màng rlau; do la jơnau lơh cơng Yàng Tom Trồ dê, hơ̆ la jơnau lơh cơng bơh Kòn Kơnràñ.

¹⁰Cau lơi dòn di Kòn Yàng Tom Trồ, gen gơs jơnau lơh cơng hơ̆ tòm să tòm he; ai cau lơi ò dòn Yàng Tom Trồ, gen kòp Kơnràñ be la cau đơs blac, tài bơh ò dòn jơnau Yàng Tom Trồ neh lơh cơng bơh Kòn Kơnràñ dê.

¹¹Jơnau lơh cơng hơ̆ la Yàng Tom Trồ neh ai bơta kis gam sùm sùm bol he in, mơ bơta kis hơ̆ ơm tòm Kòn Kơnràñ.

¹²Cau lơi gơs Yàng Kòn gen gơs bơta kis; cau lơi ò gơs Kòn Yàng Tom Trồ dê gen ò gơs bơta kis.

¹³Añ cih bơta do oh mi in, la cau dòn di sơnđan Kòn Yàng Tom Trồ dê, tồ oh mi in git he gơs bơta kis gam sùm sùm

¹⁴Do la bơta dòn nền bol he gơs tòm Kơnràñ, hơ̆ la dilah bol he jat nùs kòñ Kơnràñ dê mơ dan bơta lơi, gen Kơnràñ iat bol he.

¹⁵Dilah bol he git lah bulah he dan bơta lơi, Kơnràñ kung iat bol he, gen bol he kung git he neh dòp geh rau ală bơta he neh dan.

¹⁶Dilah cau lơi gŏ oh mi he tìs glài, la glài ò di pal chơt, gen hòi dan tĕ khai in, mơ Yàng Tom Trồ rơp ai bơta kis khai in; hơ̆ la ai ală cau tìs glài ò di pal chơt. Kung gơs glài pal chơt; hơ̆ ò di la bơh glài hơ̆ mơ añ đơs pal hòi dan.

¹⁷Jơh ală bơta lơh tìs la tồi glài, mơya gơs glài ò di pal chơt.

¹⁸Bol he git lah cau lơi tơnggơs bơh Yàng Tom Trồ, gen ò tìs glài; mơya Bơtau tơnggơs bơh Yàng Tom Trồ sền gàr khai, cà ràk ò rgơi ƀư di khai.

¹⁹Bol he git lah he bal mơ Yàng Tom Trồ, ai jơh dunnia ơm hơđơm gơnoar cà ràk.

²⁰Bol he git lah Kòn Yàng Tom Trồ dê neh lòt tus, Kơnràñ neh ai bơta git wă bol he in nàng bol he in dòp git Bơtau song ngan, mơ bol he ơm tòm Bơtau song ngan, la ơm tòm Yàng Jesu Krist, Kòn Kơnràñ dê. Hơ̆ la Yàng Tom Trồ Bơtau song ngan mơ la bơta kis gam sùm sùm.

²¹Ơ ală kòn, kơrmap gàr tĕ să he bơh rùp ràk.