Read koho Ală Kwang Cahrña 1 Bible Online

Ală Kwang Cahrña 1 - koho bible

Ală Kwang Cahrña 1

¹Tơnơ̆ mơ tŭ Jôsue chơt, làng bol Israel lùp Yàng Jehôwa lah: “Ñcau tòm bol hi rơp guh lài nàng tòmlơh mơ làng bol Kanaan taih?”

²Yàng Jehôwa ho lah: “Cau Juda pal guh lài; Añ neh jào lơgar tòm tê bol khai dê.”

³Gen cau Juda đơs mơ cau Simeôn oh mi khai lah: “Guh tĕ mơ bol hi tòm ù tiah neh tòmpà ai bol hi in nàng tòmlơh mơ cau Kanaan; gen bol hi kung rơp lòt bal mơ bol mê mut tòm pơnah ù tiah oh mi dê.” Behơ̆, cau Simeôn lòt bal mơ bol khai.

⁴Tòm tŭ cau Juda brồ lơh, Yàng Jehôwa jào phi cau Kanaan mơ cau Pheres tòm tê bol khai dê; bol khai tơnchơt jơt rbô nă cau tòm Bejek.

⁵Bol khai tus hơ Adôni Bejek tòm Bejek, mơ tòmlơh mơ geh pha rlau mơ cau Kanaan bal mơ cau Pheris.

⁶Adôni Bejek dô; mơya bol khai ting jat mơ kup geh khai, koh ràs tê me mơ ràs jơng me khai dê.

⁷Gen Adôni Bejek đơs lah: “Poh jơt nă cau bơtau neh kong koh jơh ràs tê me mơ ràs jơng me, dòñ sa phan hơđơm cơnòng añ jê, Yàng Tom Trồ neh sal wơl bơta añ neh lơh.” Bol khai lam bơtau hơ̆ tus hơ Jerusalem mơ khai chơt tềng hơ̆.

⁸Gen cau Juda brồ lơh Jerusalem mơ ai gơ, tơnchơt làng bol mơ đào mơ chu ƀòn mơ ồs.

⁹Tơnơ̆ mơ hơ̆, cau Juda mù nàng tòmlơh mơ cau Kanaan ơm tòm tiah kơh mơnơm, tiah Negep mơ tiah jơng mơnơm đah mattơngai mut.

¹⁰Bol khai lòt tòmlơh mơ cau Kanaan ơm tòm Hebrôn (lài òr sơnđan la Kiriat Arba); mơ pha rlau mơ Sesai, Ahiman mơ Thalmai.

¹¹Bơh tềng hơ̆, bol khai lòt tòmlơh mơ làng bol ơm tòm Debir (lài òr sơnđan la Kiriat Sepher).

¹²Gen Kalep đơs lah: “Cau lơi brồ lơh mơ tòmpìt ai Kiriat Sepher, gen añ rơp ai khai in bau mơ Aksah kòn ùr añ jê.”

¹³Mơ Ôtniel kòn klau Kenas, oh Kalep di, tòmpìt ai ƀòn hơ̆; gen Kalep ai Aksah kòn ùr khai dê Ôtniel in bau.

¹⁴Tòm tŭ khai neh tus mơ Ôtniel rau, khai chồl Ôtniel dan mơ bèp khai dô bă sre. Tòm tŭ khai mù bơh alàng gen Kalep lùp khai lah: “Ñchi ai kòñ taih?”

¹⁵Khai ho lah: “Dan ai añ in dô nơm phan pà; bèp neh ai añ in ù tiah tòm Negep, gen kung dan ai tĕ añ in ală croh dà Gullotmayim.” Gen Kalep ai khai in ală croh dà hơđang mơ hơđơm.

¹⁶Jơi bơtiàn Hôbap cau Kenit, hơ̆ la kòn sau po bèp Môise dê; bơh ƀòn Gòl tơô guh bal mơ cau Juda nàng ơm digùl làng bol tòm ƀlàng ngềt ngơt, tòm tiah Negep rềp mơ Arat. Gen bol khai lòt mơ ơm bal mơ cau Amalek.

¹⁷Gen cau Juda lòt bal mơ oh mi bol khai la cau Simeôn mơ brồ lơh cau Kanaan ơm tòm Jephat, mơ bol khai tơnroh jơh hir ƀòn dờng hơ̆; gen tàng cau sơnđan tiah la Hôrmah.

¹⁸Cau Juda kung tòmpìt ai Gaja bal mơ ù tiah gơ dê, Askalôn mơ ù tiah gơ dê, Ekrôn bal mơ ù tiah gơ dê.

¹⁹Yàng Jehôwa ơm bal mơ cau Juda. Bol khai tòmpìt ai tiah lơgar kơh mơnơm lơh gơs sre brê, mơya bol khai ò rgơi ting bơtrơh làng bol ơm tòm tiah ƀlàng ring; tài bơh bol hơ̆ gơs rơndeh lòs tòmlơh.

²⁰Hebrôn neh ai Kalep jat be Môise neh ho, mơ khai neh ting bơtrơh pe nă kòn klau Anak bơh di ƀòn hơ̆.

²¹Mơya, cau Benjamin ò rgơi ting bơtrơh cau Jebusit ơm tòm Jerusalem; gen tàng cau Jebusit gam ơm tềng hơ̆ bal mơ cau Benjamin jơl tus di ngai do.

²²Jơi bơtiàn Jôsep kung guh brồ lơh ƀòn Betel; mơ Yàng Jehôwa ơm bal mơ bol khai.

²³Tòm tŭ jơi bơtiàn Jôsep sồr cau sền rwang Betel (lài òr sơnđan la Lus).

²⁴Ală cau sền rwang lơgar gŏ dô nă cau klau lik bơh ƀòn dờng gen bol khai đơs mơ khai lah: “Dan sơnio bol hi in gùng mut tòm ƀòn dờng, gen bol hi rơp gơwèt niam mơ mê.”

²⁵Behơ̆ khai sơnio bol khai in gùng mut tòm ƀòn; bol khai ai đào tơnroh ƀòn, mơya bol khai lòi cau hơ̆ jơh hìu nhă khai dê kis.

²⁶Cau klau hơ̆ lòt tus hơ lơgar cau Hetit mơ bơt bơtào dô nơm ƀòn dờng tềng hơ̆, tơmoh sơnđan la Lus, mơ gam sơnđan behơ̆ jơl tus di ngai do.

²⁷Mơya cau Manase ò ting bơtrơh làng bol ơm tòm Bet San, Thaanak, Dor, Ipleam, Megidô bal mơ ală tiah jơnum làng bol gùt dar ală ƀòn dờng hơ̆, bơh cau Kanaan kư̆ kis tòm lơgar.

²⁸Tòm tŭ Israel gơlik pràn kơldang, gen bol khai kup làng bol Kanaan duh broă, mơya ò tŭ lơi ting bơtrơh jơh bol khai.

²⁹Cau Epraim kung ò ting bơtrơh cau Kanaan ơm tòm Gejer; mơya cau Kanaan kư̆ ơm tềng hơ̆ bal mơ bol khai.

³⁰Cau Jebulun kung ò ting bơtrơh cau Kanaan ơm tòm Kitrôn mơ Nahalôl; bol hơ̆ gam ơm wơl digùl bol khai, mơ bol khai kup bol hơ̆ duh broă bòl glar.

³¹Cau Aser kung ò ting bơtrơh làng bol ơm tòm Akô, Sidôn, Alap, Arsip, Helbah, Aphik, Rehôp;

³²mơ tài bơh hơ̆ làng bol Aser ơm digùl cau Kanaan tòm lơgar.

³³Cau Neptali kung ò ting bơtrơh làng bol ơm tòm Bet Semes mơ Bet Anat, mơya cau Neptali kung ơm bal mơ cau Kanaan tòm lơgar; mơ ală cau ơm tòm Bet Semes mơ Bet Anat gơlik gơs cau duh broă bol khai in.

³⁴Cau Amôr lòi cau Dan in ơm tòm lơgar mơnơm; ò ai bol khai mù ơm tòm tiah ƀlàng.

³⁵Cau Amôr kung lơh nền kư̆ ơm kơ̆ tòm mơnơm Heres, Aijalôn mơ Saalbim; mơya tê hìu Jôsep dê klơn kơnjơ̆ hơđang bol khai, mơ bol khai gơlik cau pal kong duh broă bòl glar.

³⁶Nhàr lơgar cau Amôr bơh kơh mơnơm Akrabim, bơh Sela mơ lòt guh rlau tai.