Read koho Ală Kwang Cahrña 11 Bible Online

Ală Kwang Cahrña 11 - koho bible

Ală Kwang Cahrña 11

¹Jepthe cau Galaat la kòn klau dô nă cau ùr dri, khai la dô nă cau ling pràn kơldang ngan. Bèp khai la cau Galaat.

²Bau ùr Galaat deh khai in ală kòn klau, mơ tòm tŭ ală kòn klau hơ̆ neh dờng, gen bol khai bơtrơh Jepthe mơ đơs mơ khai lah: “Mê rơp ò geh pơrdòn pơnah phan jơtài lơi tòm hìu nhă bol hi dê, tài bơh mê la kòn klau dô nă cau ùr ndai dê.”

³Behơ̆ Jepthe dô bơh di ală oh mi khai dê, mơ ơm tòm ƀòn Tôp. Tềng hơ̆ gơs ală cau gơlềng gơlàng tus ơm gùt dar Jepthe mơ lòt phà kơñau jat khai.

⁴Tơnơ̆ hơ̆, làng bol Ammôn lơh kơlìn tòmlơh mơ Israel,

⁵Mơ tòm tŭ cau Ammôn tòmlơh mơ cau Israel, ală cau kwang kra ƀòn Galaat dê lòt nàng rò Jepthe bơh ƀòn Tôp,

⁶bol khai đơs mơ Jepthe lah: “Tus tĕ lơh kwang at bồ bol hi nàng bol he tòmlơh mơ làng bol Ammôn.”

⁷Mơya Jepthe đơs mơ cau kwang kra cau Galaat lah: “Ò di bol mê jơh tơl nă neh sang añ mơ neh bơtrơh añ bơh di hìu bèp añ jê ơ? Ñchi bơh tài tŭ do bol mê tus hơ añ tòm tŭ bol mê gơtìp bơta bòl glar taih?”

⁸Ală kwang kra ƀòn Galaat đơs mơ Jepthe lah: “Bulah behơ̆, tŭ do bol hi neh rê wơl hơ mê, nàng mê lòt mơ bol hi tòmlơh mơ làng bol Ammôn, mê rơp at bồ hơđang jơh làng bol Galaat.”

⁹Jepthe đơs mơ ală kwang kra ƀòn Galaat lah: “Dilah bol mê cèng añ rê hìu wơl nàng tòmlơh mơ làng bol Ammôn mơ Yàng Jehôwa jào phi bol khai tòm tê añ, gen añ rơp at bồ bol mê!”

¹⁰Ală cau kwang kra Galaat ho wơl lah: “Yàng Jehôwa rơp lơh cơng digùl bol he, bol hi rơp lơh ngan be mê đơs.”

¹¹Behơ̆, Jepthe lòt bal mơ ală cau kwang kra Galaat dê, mơ làng bol bơtào khai gơs cau at bồ bol khai. Khai đơs wơl ală jơnau neh đơs di đap Yàng Jehôwa tòm Mispa.

¹²Gen Jepthe sồr cau kong sồr lòt tus hơ bơtau Ammôn mơ lùp lah: “Ñchi jơnau gơs digùl mê mơ añ mơ mê neh tus tòmlơh tòmdră mơ lơgar bol hi taih?”

¹³Bơtau Ammôn ho wơl mơ cau kong sồr Jepthe dê mơ lah: “Hơ̆ la tài bơh tòm tŭ Israel lik bơh lơgar Ejiptơ, bol khai neh pìt ai lơgar añ jê bơh Arnôn tus hơ Jabok mơ ai tơn tus hơ Jordan. Tŭ do tơm wơl tĕ tiah hơ̆ añ in dô bă ring lơngai.”

¹⁴Jepthe sồr cau kong sồr lòt tai tus hơ bơtau làng bol Ammôn mơ đơs lah:

¹⁵“Jepthe đơs be do: Israel ò gŏ pìt ai lơgar Môap hala lơgar làng bol Ammôn dê ò.

¹⁶Mơya tòm tŭ làng bol Israel lik bơh lơgar Ejiptơ gen bol khai lòt gan ƀlàng ngềt ngơt tus hơ Dàlềng Pơrhê, mơ tus hơ Kades.

¹⁷Tŭ hơ̆ bol khai sồr cau kong sồr lòt tus hơ bơtau Edôm mơ đơs lah: ‘Dan ai bol hi in gơnoar lòt gan lơgar bơtau dê.’ Mơya bơtau Edôm ò ai, bol khai kung sồr cau kong sồr lòt tus hơ bơtau Môap, mơ khai kung ò ai sơl. Behơ̆ Israel ơm wơl tòm Kades.

¹⁸Gen bol khai lòt tòm ƀlàng ngềt ngơt jat nhàr lơgar Edôm mơ lơgar Môap, lòt gan rò gah đah mattơngai lik lơgar Môap dê, mơ lơh sàl đah ne Arnôn. Bol khai ò mut tòm tiah Môap, tài bơh Arnôn la nhàr lơgar Môap dê.

¹⁹Tơnơ̆ tai gen Israel sồr cau kong sồr lòt tus hơ Sihôn la bơtau làng bol Amôr at bồ tòm Hesbôn mơ đơs lah: ‘Dan lòi bol hi lòt gan lơgar ồng dê nàng tus hơ lơgar bol hi dê.’

²⁰Mơya Sihôn ò dòn jơnau Israel dê, mơ ò ai bol khai lòt gan lơgar khai dê. Khai pơjum jơh mpồl ling khai dê mơ lòt lơh sàl tòm Jahas nàng tòmlơh mơ Israel.

²¹Jehôwa Yàng Tom Trồ Israel dê jào phi Sihôn mơ jơh mpồl ling khai dê tòm tê Israel. Israel lơh alah ală bol hơ̆ mơ kup ai jơh lơgar làng bol Amôr dê,

²²bol khai ai jơh lơgar hơ̆ bơh Arnôn tus hơ Jabok mơ bơh ƀlàng ngềt ngơt tus hơ Jordan.

²³Behơ̆ tŭ do Jehôwa Yàng Tom Trồ Israel dê neh lơh ơlah làng bol Amôrit bơh di ù bol khai dê di đap Israel la làng bol Kơnràñ dê, bol mê kòñ tòmpìt ù tiah bol khai dê ngan sơl?

²⁴Ngan ò di bol mê neh dòp ù tiah bơh Kemôs yàng mê dê neh ai bol mê in ò ơ? Ngan ò di bol hi la ală cau pal dòp ală phan mơ Jehôwa Yàng Tom Trồ ai bol hi in ò ơ?

²⁵Mê gơs pràn rlau mơ Balak kòn klau Jippor bơtau Môap sơl ơ? Gơs tŭ lơi khai neh tòmdră mơ Israel mơ gơs tŭ lơi khai neh lòt tòmlơh mơ bol khai sơl ơ?

²⁶Tòm pe rhiang nam Israel at bồ Hesbôn, Arôer, ală tiah pơjum ƀòn gùt dar bal mơ jơh ală ƀòn dờng rò gah dà Arnôn, ñchi bơh tài mê ò ai wơl tòm tŭ hơ̆?

²⁷Añ ò di la cau neh tìs mơ mê mơya mê neh lơh bơta tìs mơ añ tòm bơta bơtào tòmlơh mơ añ. Dan Yàng Jehôwa la Bơtau Cahrña rơp cahrña lơh nền ngai do bơh bơta tòmlơh digùl làng bol Israel mơ làng bol Ammôn.”

²⁸Bulah behơ̆, bơtau làng bol Ammôn ò bài iat jơnau Jepthe sồr đơs mơ khai.

²⁹Gen Hwềng Yàng Jehôwa dê tus hơđang Jepthe. Khai lòt làm Galaat mơ Manase, tus hơ Mispa tòm Galaat, mơ bơh hơ̆ khai lòt tòmlơh mơ làng bol Ammôn.

³⁰Jepthe srat să ho pơgon mơ Yàng Jehôwa lah: “Dilah Kơnràñ jào phi làng bol Ammôn tòm tê añ,

³¹gen tòm tŭ añ geh pha tòmlơh mơ làng bol Ammôn mơ rê hìu, dilah phan lơi lik bơh di mpồng hìu añ jê nàng wă rò añ, gen phan hơ̆ rơp gơrê bal mơ Yàng Jehôwa, añ rơp ơn phan hơ̆ lơh gơs phan ơn duh khoai chu pơrguc.”

³²Gen Jepthe lòt tus tòmlơh hơ làng bol Ammôn, mơ Yàng Jehôwa jào phi bol hơ̆ tòm tê khai.

³³Khai tơnroh bàr jơt nơm ƀòn dờng bơh Arôer tus hơ tiah gùt dar Minnit, ngài tus hơ Abel Keramim. Behơ̆ Israel pha rlau mơ làng bol Ammôn.

³⁴Tòm tŭ Jepthe rê tus di hìu khai dê tòm Mispa; kòn ùr khai dê lik lòt wă rò khai, tòmya mơ sơnggơr dềt. Khai la kòn dô nă Jepthe dê, rlau mơ khai Jepthe ò gơs kòn klau hala kòn ùr lơi ndai tai ò.

³⁵Tòm tŭ Jepthe gŏ kòn ùr khai dê gen khai crè ào tòm khai mơ đơs dờng lah: “Ơ hơh! Ơ kòn ùr añ jê, nđàc sơngit añ, ai neh lơh bòl glar moat jrùng ngan añ in, tài bơh añ neh srat să ho pơgon mơ Yàng Jehôwa mơ añ ò rgơi tòmgơl jơnau ho pơgon hơ̆.”

³⁶Kòn ùr khai ho wơl lah: “Ơ bèp añ jê, bèp neh pò bơr srat să ho pơgon mơ Yàng Jehôwa, dan lơh tĕ añ in jat be jơnau bèp neh ho pơgon, bơh Yàng Jehôwa neh sal tê di ală cau sò tơm bèp dê la di làng bol Ammôn.”

³⁷Khai đơs tai lah: “Mơya dan bèp ai añ in dô bơta añ dan do, dan ai añ in bàr kơnhai nàng lòt hơđang mơnơm mơ ñìm bal mơ ală bơyô añ tài bơh añ rơp ò tŭ lơi bau.”

³⁸Jepthe đơs mơ khai lah: “Lòt tĕ!” Gen Jepthe ai khai in lòt bàr kơnhai. Khai mơ ală cau ơruh lòt hơđang mơnơm mơ ñìm tài bơh khai rơp ò tŭ lơi bau.

³⁹Tơnơ̆ mơ bàr kơnhai, khai rê wơl hơ hìu bèp khai, mơ bèp khai lơh di khai jat be jơnau neh srat să ho pơgon. Kòn ùr hơ̆ neh ò ròm mơ cau klau lơi. Tài bơh bơta hơ̆ gen gơs bơta òs mòng tòm Israel, hơ̆ la

⁴⁰tòm kòp nam ală cau ơruh Israel dê lòt ñìm rac tòm poan ngai nàng kah wơl kòn ùr Jepthe dê la cau Galaat.