Read koho Ală Kwang Cahrña 12 Bible Online

Ală Kwang Cahrña 12 - koho bible

Ală Kwang Cahrña 12

¹Ală cau klau Epraim pơjum mpồl ling, bol khai tiă tus hơ Japhôn mơ đơs mơ Jepthe lah: “Ñchi bơh tài mê tiă lòt tòmlơh mơ làng bol Ammôn mơ ò hòi bol hi lòt bal mơ mê taih? Bol hi rơp chu tơn hìu mê bal mơ mê.”

²Jepthe ho lah: “Añ mơ làng bol añ jê neh pơgon tòm bơta tòmdră mơ làng bol Ammôn la cau neh rồn bơklơn bol hi kơnjơ̆ ngan, mơya tòm tŭ añ hòi bol mê, bol mê ò bài dong tă añ klàs bơh di tê bol khai.

³Tòm tŭ añ gŏ bol mê ò tus nàng dong kòl añ, gen añ phi să mơ lòt tòmlơh mơ làng bol Ammôn, mơ Yàng Jehôwa neh ai añ in pha rlau mơ bol khai. Behơ̆ gen ñchi bơh tài bol mê tus ngai do nàng tòmlơh mơ añ taih?”

⁴Behơ̆ Jepthe pơjum jơh ală cau klau tòm Galaat nàng tòmlơh mơ cau Epraim. Cau Galaat lơh alah cau Epraim, tài bơh bol khai neh đơs lah: “Bol mê cau Galaat la cau neh dô pleh bơh cau Epraim, ơm crŭ digùl cau Epraim mơ cau Manase.”

⁵Gen cau Galaat pìt ai ală tiah thòl hiòng Jordan nàng tòmdră mơ cau Epraim. Tòm tŭ gơs dô nă cau Epraim dô klàs tus đơs lah: “Dan ai añ in lòt gan,” gen cau Galaat lùp khai lah: “Mê la cau Epraim sơl?” Dilah khai ho: “Ò,”

⁶gen cau Galaat sồr khai đơs lah: “Shippulet.” Cau Epraim đơs lah: “Sippulet” tài bơh khai ò rgơi đơs tòm toh loh làng jơnau hơ̆. Gen cau Galaat kup khai mơ tơnchơt di tiah thòl hiòng Jordan dê. Poan jơt bàr rbô nă cau Epraim gơplơ̆ chơt tòm tŭ hơ̆.

⁷Jepthe at bồ Israel tòm prau nam. Lồc behơ̆ Jepthe cau Galaat chơt mơ geh tơp tòm dô nơm ƀòn dờng khai dê tòm Galaat.

⁸Tơnơ̆ mơ khai gơs Ipsan cau Betlehem cahrña cau Israel.

⁹Khai gơs pe jơt nă kòn klau mơ pe jơt nă kòn ùr. Khai tòmbau ală kòn ùr khai dê mơ ală kòn klau tòm mpồl hìu nhă ndai, mơ khai ai pe jơt nă kòn ùr bơh mpồl hìu nhă ndai tòmbau mơ ală kòn klau khai dê. Khai cahrña Israel tòm poh nam.

¹⁰Gen Ipsan chơt mơ tơp tòm Betlehem.

¹¹Tơnơ̆ mơ khai gen gơs Elôn cau Jebulun cahrña Israel tòm jơt nam.

¹²Gen Elôn chơt mơ tơp tòm Aijalôn tòm lơgar Jebulun.

¹³Tơnơ̆ mơ khai gơs Apdôn, kòn klau Hilel bơh Phirathôn, cahrña Israel.

¹⁴Khai gơs poan jơt nă kòn klau mơ pe jơt nă sau klau, bol khai hào poh jơt nơm alàng. Khai cahrña tòm Israel tòm phàm nam.

¹⁵Gen Apdôn kòn klau Hilel cau Phirathôn chơt mơ tơp tòm Phirathôn lơgar Epraim, tòm lơgar kơh mơnơm cau Amalek dê.