Read koho Ală Kwang Cahrña 13 Bible Online

Ală Kwang Cahrña 13 - koho bible

Ală Kwang Cahrña 13

¹Làng bol Israel lơh bơta iơh bơsak tai di đap Yàng Jehôwa, gen Yàng Jehôwa jào phi bol khai tòm tê cau Philistin tòm poan jơt nam.

²Gơs dô nă cau tòm Jôra, sơnđan la Manôa, tòm jơi bơtiàn cau Dan, bau ùr khai kơnền ò gơs kòn.

³Cau gơnrơh Yàng Jehôwa dê tơlik mat mơ cau ùr hơ̆ mơ đơs lah: “Bulah ai la kơnền ò deh kòn, mơya ai rơp bun mơ deh dô nă kòn klau.

⁴Tŭ do kơrhia tĕ bañ ñô tơrnòm hala alak, mơ kung bañ sa phan lơi ò goh,

⁵tài bơh ai rơp bun mơ deh dô nă kòn klau. Bañ ngui pềs koah nàng koah bồ khai, tài bơh kòn dềt hơ̆ rơp gơs cau Najire ơn is Yàng Tom Trồ in bơh di tŭ deh, mơ khai rơp sơntòm dong tă làng bol Israel bơh di tê làng bol Philistin.”

⁶Gen cau ùr hơ̆ tus yal bau klau khai in lah: “Dô nă cau Yàng Tom Trồ dê neh lòt tus hơ añ, muh mat khai gơlơh be dô nă cau gơnrơh Yàng Tom Trồ dê, gơlơh rngòt rngơt ngan. Añ ò lùp khai tus bơh lơi mơ khai kung ò yal añ in git sơnđan mat khai dê sơl.

⁷Mơya khai neh đơs mơ añ lah: ‘Ai rơp bun mơ deh dô nă kòn klau, gen tàng bañ ñô tơrnòm hala alak, mơ kung bañ sa phan lơi ò goh, bơh kòn dềt hơ̆ rơp gơs dô nă cau Najire Yàng Tom Trồ in, bơh di ngai deh tus di ngai chơt khai dê.’”

⁸Gen Manôa hòi dan mơ Yàng Jehôwa lah: “Ơ Yàng Jehôwa, añ dan Kơnràñ ai cau Yàng Tom Trồ dê mơ Kơnràñ neh sồr lòt tus mơ bol hi, tus wơl mơ bol hi nàng bơto bol hi in git ñchi bol hi pal lơh nàng ròng siam kòn dềt rơp deh hơ̆.”

⁹Yàng Tom Trồ dòp jơnau Manôa dê. Cau gơnrơh Yàng Tom Trồ dê tus wơl mơ cau ùr hơ̆ tòm tŭ khai ơm tòm ƀlàng sre; mơya Manôa bau klau khai dê ò ơm mơ khai tềng hơ̆.

¹⁰Cau ùr sơrbac sơrbang ntoat yal bau klau khai in lah: “Ne, cau neh tơlik mat mơ añ tòm ngai lài neh tus tềng do.”

¹¹Manôa ñă lòt jat bau ùr khai dê. Tòm tŭ khai tus hơ cau hơ̆ gen đơs lah: “Ngan sơl ồng la cau neh tòmbơhbơr mơ bau ùr añ?” Khai ho lah: “Ơi, hơ̆ la añ do.”

¹²Gen Manôa lùp lah: “Tòm tŭ jơnau ồng gơlik di ngan gen rài kis mơ broă lơh kòn dềt hơ̆ di rơp jat bơta sồr lam lơi taih?”

¹³Cau gơnrơh Yàng Jehôwa ho lah: “Bau ùr mê dê pal lơh jat jơh ală bơta añ neh sồr khai.

¹⁴Khai ò geh sa phan lơi tus bơh tòm ño, kung ò geh ñô tơrnòm hala alak, hala sa phan lơi ò goh; khai pal lơh jat jơh ală bơta añ neh sồr khai.”

¹⁵Manôa đơs mơ cau gơnrơh Yàng Jehôwa dê lah: “Dan ồng ơm tềng do jơl tus di tŭ bol hi rcang dô nơm be kòn yò sa ồng in.”

¹⁶Cau gơnrơh Yàng Jehôwa dê ho lah: “Bulah mê jà añ ơm wơl, añ rơp ò sa phan sa lơi mê dê ò. Mơya dilah mê kòñ rcang dô nơm phan ơn duh khoai chu pơrguc, gen ơn tĕ gơ Yàng Jehôwa in.” (Manôa ò đal git hơ̆ la cau gơnrơh Yàng Jehôwa dê).

¹⁷Manôa lùp cau gơnrơh Yàng Jehôwa dê lah: “Ñchi sơnđan ồng nàng bol hi jòng ro ồng tòm tŭ jơnau ồng dê gơlik gơs di ngan?”

¹⁸Cau gơnrơh Yàng Jehôwa dê ho lah: “Ñchi bơh tài mê lùp sơnđan añ taih? Sơnđan añ crih crài ngan!”

¹⁹Behơ̆ Manôa ai dô nơm be kòn bal mơ phan ơn duh khoai mơ kòi mbo mơ ơn gơ hơđang dô nơm pơnai lŭ nàng ơn Yàng Jehôwa in. Mơ Yàng Jehôwa lơh dô bơta crih crài tòm tŭ Manôa mơ bau ùr khai dê ơm sền.

²⁰Tòm tŭ lơmpiat ồs bơh cơnòng duh khoai guh hơđang, gen cau gơnrơh Yàng Jehôwa dê guh bal tòm lơmpiat ồs. Gen Manôa mơ bau khai blup mat tòm ù.

²¹Tòm tŭ cau gơnrơh Yàng Jehôwa dê ò tơlik mat tai mơ Manôa bal mơ bau ùr khai dê, gen Manôa đal git lah hơ̆ la cau gơnrơh Yàng Jehôwa dê.

²²Khai đơs mơ bau ùr khai dê lah: “Ngan bol he rơp chơt tài bơh bol he neh gŏ Yàng Tom Trồ.”

²³Mơya bau ùr khai ho lah: “Dilah Yàng Jehôwa kòñ tơnchơt bol he, Kơnràñ ò tŭ lơi dòp phan ơn duh khoai chu pơrguc mơ phan ơn duh khoai mơ kòi mbo bơh tê bol he, hala sơnio bol he in sền gŏ ală bơta do, hala yal bol he in ală jơnau do.”

²⁴Cau ùr hơ̆ deh dô nă kòn klau mơ tơmoh sơnđan la Samsôn. Khai rhòi dờng mơ Yàng Jehôwa ai lơngai khai in.

²⁵Hwềng Yàng Jehôwa dê rơp sơntòm chồl bơtrut tòm nùs khai tòm sàl Dan dê, digùl Jôra mơ Estaôl.