Read koho Ală Kwang Cahrña 14 Bible Online

Ală Kwang Cahrña 14 - koho bible

Ală Kwang Cahrña 14

¹Samsôn mù hơ Thimna mơ tềng hơ̆ khai gŏ dô nă cau ơruh Philistin.

²Tòm tŭ khai guh rê gen khai đơs mơ mè bèp khai dê lah: “Añ neh gŏ dô nă cau ùr tòm Thimna, tŭ do lùp tĕ añ in cau ùr hơ̆ nàng añ bau.”

³Mè bèp khai ho lah: “Digùl jơi bơtiàn mê dê hala digùl jơh làng bol bol he dê ò gơs dô nă cau ùr lơi, tàng mê pal lòt bau mơ dô nă cau làng bol Philistin ò kong siat gơltau ne ơ?” Mơya Samsôn đơs mơ bèp khai lah: “Dan lùp cau ùr hơ̆ añ in; khai niam nùs añ ngan.”

⁴Mè bèp khai ò git bơta hơ̆ tus bơh Yàng Jehôwa, Kơnràñ jòi kai nàng tòmlơh mơ làng bol Philistin, bơh tŭ hơ̆ làng bol Philistin at bồ hơđang Israel.

⁵Gen Samsôn mù hơ Thimna bal mơ mè bèp khai. Tòm tŭ bol khai tus rềp hơ ală suơn ño Thimna dê, nisơna gơs dô nơm klìu triă ơhùm di khai.

⁶Hwềng Yàng Jehôwa dê tus hơđang khai bềng gơnoar pràn tian gơs khai crè gơ mơ tê gòi kung be crè dô nơm be kòn behơ̆ sơl. Mơya khai ò yal mè bèp khai in ñchi bơta khai neh lơh.

⁷Gen khai mù tòmbơhbơr mơ cau ùr hơ̆, mơ cau ùr hơ̆ niam nùs.

⁸Dô êt jŏ tơnơ̆, tòm tŭ khai tus wơl nàng tòmbau mơ cau ùr hơ̆, khai dah sền ƀồc klìu triă, gơs dô puk sìng lơwe mơ gơs dà lơwe.

⁹Khai ai tê kơndrồp dà lơwe hơ̆ mơ sa ndang lòt ndang. Tòm tŭ khai tus mơ mè bèp khai gen khai ai dô êt, mơ bol hơ̆ kung sa sơl. Mơya khai ò yal bol hơ̆ in la khai neh tă dà lơwe hơ̆ bơh di ƀồc klìu triă.

¹⁰Bèp khai mù tus hơ hìu cau ùr hơ̆, mơ tềng hơ̆ Samsôn yò dô bơta ñô sa jat be ală cau pơnu òs lơh.

¹¹Tòm tŭ làng bol gŏ khai, bol khai cèng pe jơt nă cau pơnu nàng lơh yô mơ khai.

¹²Samsôn đơs mơ bol khai lah: “Lòi añ lơh dô jơnau pơnhồr bol mê in, dilah bol mê rgơi yal tơlik jơnau gơtha gơ dê tòm poh ngai ñô sa do, gen añ rơp ai bol mê in pe jơt nơm ào che dơmài mơ pe jơt yô ồi ào.

¹³Mơya dilah bol mê ò rgơi yal tơlik gơtha jơnau pơnhồr hơ̆ gen bol mê rơp ai añ in pe jơt nơm ào che dơmài mơ pe jơt yô ồi ào.” Bol hơ̆ đơs lah: “Yal tĕ jơnau pơnhồr mê dê nàng bol he in iat.”

¹⁴Khai ho lah: “Phan sa gơlik bơh phan sa phan, phan lơngồt gơlik bơh phan pràn kơldang.” Tòm pe ngai bol hơ̆ ò rgơi yal tơlik gơtha jơnau pơnhồr hơ̆ dê.

¹⁵Tus di ngai poan bol khai đơs mơ bau ùr Samsôn lah: “Pơndòm tĕ bau klau ai dê nàng khai yal tơlik gơtha jơnau pơnhồr hơ̆ bol hi in; dilah ò gen bol hi rơp chu ai mơ hìu bèp ai dê. Bơh ai neh jà bol hi tus tềng do nàng lơh bol hi in gơlik rƀah ơ?”

¹⁶Gen bau ùr Samsôn dê ñìm di đap khai, mơ đơs lah: “Mê gơjrañ añ, mê ò kòñ gơboh ngan di añ. Mê đơs dô jơnau pơnhồr mơ làng bol añ jê, mơya mê ò yal tơlik jơnau gơtha gơ dê añ in.” Samsôn đơs mơ khai lah: “Añ kung ò yal mè bèp añ in sơl, ñchi bơh tài añ pal yal ai in taih?”

¹⁷Ùr hơ̆ ñìm di đap khai tòm poh ngai ñô sa hơ̆. Tài bơh ùr hơ̆ yoam lah khai, tòm ngai poh khai yal bau ùr khai in. Gen cau ùr hơ̆ yal gơtha jơnau pơnhồr làng bol khai in.

¹⁸Ală cau klau tòm ƀòn dờng đơs mơ khai tòm ngai poh, lài mơ tŭ mattơngai mut lah: “Phan lơi lơngồt rlau mơ dà kròt? Phan lơi pràn rlau mơ klìu triă?” Samsôn đơs mơ bol khai lah: “Dilah bol mê ò lơòr mơ kơnrồ dra añ jê; gen bol mê ò rgơi yal tơlik gơtha jơnau pơnhồr añ jê.”

¹⁹Gen Hwềng Yàng Jehôwa dê mù hơđang khai pràn ngan, mơ khai mù hơ Askalôn mơ tơnchơt pe jơt nă cau klau tòm ƀòn hơ̆, hồ tă phan mơna bol khai dê, mơ cèng ào soh tòm bơta pơjum ai ală cau neh yal tơlik gơtha jơnau pơnhồr in. Tòm bơta gơhào gơjrañ, khai rê wơl hơ hìu bèp khai dê.

²⁰Mơ bau ùr Samsôn dê neh cau tòmbau mơ dô nă cau pơnu la cau dong khai tòm bơta tòmbau.