Read koho Ală Kwang Cahrña 15 Bible Online

Ală Kwang Cahrña 15 - koho bible

Ală Kwang Cahrña 15

¹Dô êt jŏ tơnơ̆, di di kơnhai toès kòi mi, Samsôn cèng dô nơm be kòn nàng lòt còp bau ùr khai dê. Khai đơs lah: “Añ kòñ tus mơ bau ùr añ tòm ơdŭ khai dê.” Mơya bèp cau ùr hơ̆ ò ai khai in mut.

²Khai đơs mơ Samsôn lah: “Añ kơlôi lah mê neh sang khai, gen tàng añ neh tòmbau khai mơ cau bơyô mê dê. Oh khai ò di hàng mơnĕ rlau mơ khai ò ơ? Bau tĕ mơ khai ala bi khai dê.”

³Samsôn đơs mơ bol khai lah: “Dơ̆ do añ gơs gơnoar lơh iơh di làng bol Philistin, añ rơp ò gơkòl lah pơrhơng.”

⁴Behơ̆ Samsôn lòt kup pe rhiang nơm pì, kơt tiang pì bal mơ yô. Khai kơt sơmpòl ồs digùl bàr nơm tiang,

⁵lồc behơ̆ khai chu ồs di ală sơmpòl mơ lòi ală pì hơ̆ dô tòm sre kòi mi ală cau Philistin dê. Khai chu kòi mi neh cap bal mơ kòi mi òhềt toès, ală suơn ño mơ ală suơn ôlibe sơl.

⁶Gen làng bol Philistin lùp lah: “Ñcau neh lơh bơta do?” Gen cau yal lah: “Samsôn bơrtơu cau Thimna dê, tài bơh cau Thimna neh tòmbau bau ùr Samsôn dê mơ dô nă cau bơyô khai dê.” Behơ̆ cau Philistin guh mơ chu cau ùr hơ̆ bal mơ bèp khai dê.

⁷Samsôn đơs mơ bol khai lah: “Tài bơh bol mê lơh behơ̆ gen añ srat să ho nền rơp ò ơm dơh wơl jơl tus di tŭ añ neh sal tê hơđang bol mê.”

⁸Khai brồ lơh bol hơ̆ mơ tơnchơt oă ngan cau. Gen khai mù ơm tòm rgồng lŭ Etam.

⁹Làng bol Philistin guh mơ lơh sàl tòm Juda mơ phà kơñau ƀòn Lehi.

¹⁰Cau Juda đơs mơ bol khai lah: “Ñchi bơh tài bol mê guh tòmlơh mơ bol hi taih?” Bol khai ho lah: “Bol hi tus nàng kup cap Samsôn mơ lơh di khai kung be khai neh lơh di bol hi.”

¹¹Gen pe rbô nă cau Juda mù tus hơ cìr rgồng lŭ Etam mơ đơs mơ Samsôn lah: “Mê ò git lah cau Philistin at bồ hơđang bol he ò ơ? Ñchi mê neh lơh bol hi in taih?” Khai ho lah: “Be bơta bol khai neh lơh di añ gen añ lơh di bol khai behơ̆ sơl.”

¹²Bol hơ̆ đơs mơ khai lah: “Bol hi neh mù nàng cap mê mơ jào mê tòm tê cau Philistin.” Samsôn đơs lah: “Srat să tĕ ho nền mơ añ lah să tòm bol mê rơp ò tơnchơt añ.”

¹³Bol hơ̆ đơs lah: “Di sơl, bol hi mìng cap mê mơ jào mê tòm tê bol khai lơm, bol hi rơp ò tơnchơt mê.” Behơ̆, bol hơ̆ ai bàr dang che pa mơ cap khai, mơ lam khai lik bơh rgồng lŭ.

¹⁴Tòm tŭ khai neh tus rềp di Lehi, gen làng bol Philistin driau dờng mơ ràn tus hơ khai. Hwềng Yàng Jehôwa dê tus hơđang khai pràn ngan. Ală che cap di tê khai gơlik kung be jrềng ồs sa, che cap gơrung jơh bơh di tê khai.

¹⁵Gen khai gŏ dô nơm ntìng kàng pa alàng dê, gen khai tus rềp dòñ gơ mơ tơnchơt dô rbô nă cau klau mơ ntìng hơ̆.

¹⁶Gen khai đơs lah: “Bơh dô nơm ntìng kàng alàng, añ rơndap gơs oă gơnru, bơh dô nơm ntìng kàng alàng, añ neh tơnchơt dô rbô nă cau klau.”

¹⁷Tòm tŭ khai neh đơs sir rau gen khai sơrbì ngài ntìng kàng hơ̆. Cau sơnđan tiah hơ̆ la Ramat Lehi.

¹⁸Tơnơ̆ hơ̆ Samsôn tơhìr dà oă ngan, gen khai rac dan mơ Yàng Jehôwa mơ đơs lah: “Yàng neh ai cau dĭ gơna Kơnràñ in bơta pha lin dờng do, mơ tŭ do añ pal kong chơt tơhìr mơ dùh tòm tê ală cau ò kong siat gơltau sơl ơ?”

¹⁹Gen Yàng Tom Trồ pò dô nơm trồm lŭ tòm Lehi, gơs dà hòr lik bơh dê gơ. Tòm tŭ Samsôn neh hùc dà rau, gen hwềng nùs khai gơrê wơl, mơ khai gam kis. Behơ̆, cau sơnđan tiah hơ̆ la En Hakkôre, gam tòm Lehi tus di ngai do.

²⁰Mơ Samsôn cahrña Israel tòm ală tŭ tơngai cau Philistin at bồ tòm bàr jơt nam.