Read koho Ală Kwang Cahrña 16 Bible Online

Ală Kwang Cahrña 16 - koho bible

Ală Kwang Cahrña 16

¹Gơs dô ngai ne, Samsôn lòt tus hơ Gaja: tềng hơ̆ khai gŏ dô nă cau ùr dri. Khai mut mơ bic mang mơ cau ùr hơ̆.

²Cau yal mơ làng bol Gaja lah: “Samsôn neh tus tềng do.” Gen bol khai gơrwàng gùt dar tiah hơ̆ mơ ơm kơp jơh mang di mpồng ƀòn dờng. Bol khai ơm kơp jơh mang hơ̆ mơ kơlôi lah: “Bol he kơp tĕ jơl tus àng drim, gen he rơp tơnchơt khai.”

³Mơya Samsôn mìng bic tềng hơ̆ jơl tus digùl mang. Gen khai guh mơ tă mpồng ƀòn dờng bal mơ bàr nơm jrong mpồng, dus tă jơh bal mơ gai kal mpồng, khai tui gơ di pơnì mơ cèng tus hơđang bồ mơnơm ơm di đap Hebrôn.

⁴Tơnơ̆ hơ̆, khai kòñ gơboh dô nă cau ùr tòm thòng Sôrek, khai sơnđan la Delila.

⁵Ală cau kwang at bồ làng bol Philistin tus đơs mơ cau ùr hơ̆ lah: “Pơndòm tĕ Samsôn nàng git bơta lơi lơh khai in gơlik pràn kơldang dờng behơ̆, mơ lơh mbe lơi nàng hi pha rlau mơ khai, tồ bol hi rgơi cap khai mơ kup khai dòn duh. Kòp nă bol hi rơp ai ai in dô rbô dô rhiang pet priă.”

⁶Behơ̆ Delila đơs mơ Samsôn lah: “Dan yal añ in git bơta lơi lơh mê in gơlik pràn kơldang dờng behơ̆, mơ mbe rgơi cap mê nàng kup mê dòn duh.”

⁷Samsôn ho khai lah: “Dilah gơs cau cap añ mơ poh dang che rsiang ris àtak dê, gen añ rơp gơlik lơbơn kung be cau ală ndai.”

⁸Gen ală cau kwang at bồ làng bol Philistin dê cèng Delila in poh dang che rsiang gam ris àtak dê, mơ khai ai gơ nàng cap Samsôn.

⁹Neh gơs cau ơm kơp òm tòm ơdŭ dơlam hìu, Delila hòi khai lah: “Ơ Samsôn, cau Philistin brồ kup mê!” Mơya Samsôn gơltac che rsiang hơ̆ kung be dô dang che jrềng tòm tŭ gơtup dê ồs. Behơ̆ bơta ndơp ndơr bơh bơta pràn kơldang khai dê òhềt git.

¹⁰Gen Delila đơs mơ Samsôn lah: “Mê neh bơrsèl añ mơ đơs blac mơ añ. Tŭ do dan yal añ in mbe cau rgơi kup cap mê.”

¹¹Samsôn đơs lah: “Dilah cau cap añ mơ che tơrme òhềt cau ngui, gen añ rơp gơlik lơbơn kung be cau ndai.”

¹²Gen Delila ai che tơrme mơ cap khai. Neh gơs cau kơp òm tòm ơdŭ dơlam hìu, khai hòi lah: “Ơ Samsôn, cau Philistin brồ kup mê!” Mơya Samsôn gơltac ală che dờng bơh di tê khai gơlơh kung be dô dang che brài.

¹³Gen Delila đơs mơ Samsôn lah: “Jơl tus di tŭ do mê neh bơrsèl añ mơ đơs blac mơ añ. Dan yal añ in mbe cau rgơi cap mê.” Samsôn ho khai lah: “Dilah ai tàñ poh nơm sŏ car hơđang bồ añ di jrong tàñ ồi mơ ai gai tàñ lơh tat kơ̆ gơ mơ dô nơm gai jơrmơng, gen añ rơp gơlik lơbơn kung be cau ndai.” Behơ̆, tòm tŭ khai bic lơhă gen Delila ai poh nơm sŏ car hơđang bồ khai dê mơ tàñ di jrong tàñ ồi.

¹⁴Tòm tŭ khai bic lơhă, Delila tàñ poh nơm sŏ car hơđang bồ Samsôn di pơrnồt brài hơđang gai jơrmơng jrong tàñ ồi, mơ ai gai kơt kơ̆ wơl, gen hòi lah: “Ơ Samsôn, cau Philistin brồ lơh mê gen.” Mơya khai kah rngal, bŭi gai jơrmơng jrong tàñ ồi bal mơ pơrnồt brài.

¹⁵Gen Delila đơs mơ khai lah: “Mbe mê rgơi đơs lah: ‘Añ kòñ gơboh di ai,’ tòm tŭ nùs mê ò ring lơngai mơ añ? Mê neh bơrsèl añ pe dơ̆ mơ do, mơ ò yal añ in git bơta lơi neh lơh mê in gơlik pràn kơldang dờng behơ̆.”

¹⁶Lồi dut, tơnơ̆ mơ tŭ Delila ai jơnau đơs lơh pơnjê Samsôn tòm oă ngai sùm, gen khai bòl glar ngan mòr chơt.

¹⁷Behơ̆ khai yal tơlik jơh ală bơta ndơp ndơr khai dê, mơ đơs mơ Delila lah: “Pềs koah ò tŭ lơi geh gan hơđang bồ añ, bơh añ la cau Najire Yàng Tom Trồ in bơh tòm kơndul mè. Dilah cau koah bồ añ gen bơta pràn kơldang añ rơp lik bơh añ, mơ añ rơp gơlik lơbơn kung be cau ndai.”

¹⁸Tòm tŭ Delila gŏ Samsôn neh yal khai in jơh ală bơta ndơp ndơr rau, gen khai pơyoa jơnau hòi ală cau kwang at bồ làng bol Philistin, mơ đơs lah: “Tus wơl tĕ dô dơ̆ do tai, khai neh yal añ in jơh ală bơta ndơp ndơr khai dê rau.” Gen ală cau kwang at bồ cau Philistin rê wơl hơ Delila, mơ cèng priă tòm tê bol khai.

¹⁹Cau ùr hơ̆ pơndòm Samsôn bic di bơnô khai, khai hòi dô nă cau klau mơ khai koah jơh poh nơm sŏ car di bồ Samsôn mơ sơntòm lơh bòl glar khai in. Bơta pràn kơldang khai dê neh lik bơh khai.

²⁰Gen cau ùr hơ̆ hòi lah: “Ơ Samsôn, cau Philistin brồ kup mê!” Samsôn kah rngal mơ đơs lah: “Añ rơp lik lòt be lài, mơ rtơs să khai lòt khat gơboh.” Mơya khai ò git la Yàng Jehôwa neh sang lòi khai.

²¹Ală cau Philistin kup khai, kơlwĕ mat khai mơ cèng khai mù hơ Gaja, mơ tơndò khai in mơ gơsàng kòng mơ sồr khai pơdar mpal lŭ piah tòm hìu jàm.

²²Mơya sŏ di bồ khai rơp sơntòm hòn wơl tơnơ̆ mơ tŭ cau neh koah.

²³Tŭ do ală cau kwang at bồ Philistin pơjum bal nàng ơn dô nơm phan ơn duh khoai dờng yàng Dagôn bol khai in, nàng lơh chò hòp bal, bơh bol khai đơs lah: “Yàng bol he dê neh jào Samsôn cau sò tơm bol he dê tòm tê bol he.”

²⁴Tòm tŭ làng bol gŏ khai gen bol khai jòng ro yàng bol khai dê mơ đơs lah: “Yàng bol he dê neh jào cau sò tơm he dê tòm tê bol he, la cau neh lơh roh gơprah lơgar he mơ neh tơnchơt oă cau bol he dê.”

²⁵Tòm tŭ nùs bol khai hòn chò ngan ò git lơh, gen bol khai driau dờng lah: “Cèng tĕ Samsôn nàng khai lơh bơta kơnhơl bol he in.” Behơ̆ bol khai cèng tơlik Samsôn bơh dê hìu jàm nàng khai lơh bơta kơnhơl bol khai in. Cau lòi khai ntào digùl ală jrong hìu duh khoai;

²⁶gen Samsôn đơs mơ cau tề di tê khai lah: “Dan mê ơn añ di tiah mơ añ rgơi ƀư dê ală jrong sơndră hìu duh khoai.”

²⁷Mơ tai, hìu duh khoai gơs bềng ală cau klau mơ cau ùr, jơh ală kwang at bồ cau Philistin gơs tềng hơ̆, mơ hơđang rkàng hìu gơs pơgap pe rbô nă cau klau mơ cau ùr ơm sền Samsôn lơh bơta kơnhơl.

²⁸Gen Samsôn hòi dan mơ Yàng Jehôwa lah: “Ơ Jehôwa Yàng Tom Trồ dan kah wơl añ! Ơ Yàng Tom Trồ dan lơh añ in geh pràn kơldang mìng dô dơ̆ do tai lơm, nàng añ in mìng lơh dô dơ̆ bơta sal tê di làng bol Philistin nàng tơm wơl bàr đah mat añ jê.”

²⁹Gen Samsôn pò tê at bàr nơm jrong sơndră digùl hìu duh khoai. Khai ai jơh pràn chồl ală jrong hơ̆, tê ma chồl dô nơm mơ tê kiau chồl dô nơm.

³⁰Samsôn đơs lah: “Dan lòi añ in chơt bal mơ cau Philistin!” Gen khai chồl jơh pràn mơ hìu duh khoai gơtơrlơm hơđang jơh ală cau kwang at bồ mơ hơđang jơh ală cau ơm tòm hơ̆. Behơ̆ ală cau khai tơnchơt tòm tŭ khai chơt oă rlau mơ ală cau khai tơnchơt tòm tŭ khai gam kis.

³¹Lồc behơ̆, ală oh mi khai mơ jơh hìu nhă bèp khai dê mù ai ƀồc khai, mơ cèng tơp digùl Jôra mơ Estaôl tòm bơtô ƀồc Manôa bèp khai dê. Samsôn neh cahrña Israel tòm bàr jơt nam.