Read koho Ală Kwang Cahrña 17 Bible Online

Ală Kwang Cahrña 17 - koho bible

Ală Kwang Cahrña 17

¹Gơs dô nă cau klau ơm tòm lơgar kơh mơnơm, sơnđan la Mika.

²Khai đơs mơ mè khai lah: “Dô rbô dô rhiang pet priă mơ cau neh ai bơh mè, bơh bơta hơ̆ mè neh srat rma tian gơs jơnau đơs hơ̆ neh kơno tus di tồr añ; priă hơ̆ neh gơrê mơ añ, mơya tŭ do añ rơp ai wơl mè in.” Mè khai đơs lah: “Ơ kòn klau añ jê, dan Yàng Jehôwa ai lơngai kòn in!”

³Tòm tŭ Mika tơm wơl dô rbô dô rhiang pet priă mè khai in, gen mè khai đơs lah: “Añ ơn is priă do Yàng Jehôwa in bơh tê añ, ai kòn klau añ in, nàng lơh dô nơm rùp pac sềr mơ tŏ dô nơm rùp ràk. Añ rơp ai wơl priă hơ̆ kòn in.”

⁴Behơ̆ Mika tơm wơl priă hơ̆ mè khai in, gen mè khai ai bàr rhiang pet priă mơ tong cau chài tŏ priă in nàng khai lơh dô nơm rùp pac sềr mơ dô nơm rùp ràk mơ gơ ơm tòm hìu Mika dê.

⁵Gen hìu Mika gơlik dô nơm bơmồng, mơ khai lơh dô nơm Ephot mơ ală rùp ràk, mơ bơtào dô nă tòm ală kòn klau khai dê lơh gơs cau gơnoar ơn phan duh khoai.

⁶Tòm rài hơ̆, ò gơs bơtau at bồ tòm Israel, jơh ală cau lơh jat bơta bol khai kơlôi la di.

⁷Gơs dô nă cau pơnu bơh Betlehem tòm Juda, khai la cau Lebi ơm tềng hơ̆.

⁸Cau pơnu hơ̆ lik bơh ƀòn Betlehem tòm Juda mơ lòt jòi dô bă tiah lơi khai nàng ơm. Khai tus hơ hìu Mika dê tòm tiah kơh mơnơm Epraim nàng jòi broă lơh.

⁹Mika lùp khai lah: “Mbơh mê tus taih?” Khai ho lah: “Añ la cau Lebi bơh Betlehem tòm Juda, añ lòt jòi dô bă tiah añ rgơi ơm.”

¹⁰Mika đơs lah: “Ơm tĕ mơ añ mơ lơh gơs bèp mơ cau gơnoar ơn phan duh khoai añ jê, kòp nam añ rơp ai mê in jơt pet priă, ồi ào mơ phan ngui sa.”

¹¹Behơ̆ cau Lebi niam nùs ơm bal mơ Mika, mơ cau pơnu hơ̆ gơwèt mơ khai be dô nă kòn klau khai dê.

¹²Behơ̆, Mika bơtào cau Lebi hơ̆ lơh gơs cau gơnoar ơn phan duh khoai khai dê, mơ ơm tòm hìu khai.

¹³Mơ Mika đơs lah: “Tŭ do añ git la Yàng Jehôwa rơp gơwèt niam mơ añ, tài bơh cau Lebi do neh gơlik gơs cau gơnoar ơn phan duh khoai añ jê.”