Read koho Ală Kwang Cahrña 18 Bible Online

Ală Kwang Cahrña 18 - koho bible

Ală Kwang Cahrña 18

¹Tòm ală ngai hơ̆ ò gơs bơtau tòm Israel. Mơ kung tòm ală ngai hơ̆ jơi bơtiàn Dan lòt jòi ù tiah bol khai in nàng ơm, tài bơh jơl tus di tŭ hơ̆ bol khai òhềt dòp geh pơnah ù tiah lơi digùl ală jơi bơtiàn Israel.

²Behơ̆ cau Dan sồr pram nă cau ling khin cha bơh jơi bơtiàn bol khai dê, bơh Jôra mơ bơh Estaôl nàng sền rwang lơgar mơ sền sơwì gơ, mơ bol khai đơs mơ bol hơ̆ lah: “Lòt tĕ sền sơwì lơgar.” Bol khai lòt tus hơ tiah kơh mơnơm Epraim, tus hơ hìu Mika mơ ơm bic mang tềng hơ̆.

³Tòm tŭ bol khai ơm tòm hìu Mika, bol khai đal git sap đơs cau pơnu Lebi dê; bol khai lòt tus mơ lùp khai lah: “Ñcau neh lam mê tus tềng do? Ñchi broă mê lơh tòm tiah do? Ñchi bơh tài mê ơm tềng do taih?”

⁴Khai yal bol hơ̆ in bơta Mika neh lơh khai in mơ đơs lah: “Khai neh ơpah añ mơ añ neh gơlik gơs cau gơnoar ơn phan duh khoai khai dê.”

⁵Gen bol hơ̆ đơs mơ khai lah: “Dan lùp Yàng Tom Trồ nàng git dilah gùng lòt bol hi dê rơp gơlik cồng nha sơl.”

⁶Cau gơnoar ơn phan duh khoai ho mơ bol khai lah: “Lòt tĕ lơngap lơngai, gùng lòt bol mê dê geh Yàng Jehôwa ơm bal.”

⁷Behơ̆ pram nă bol hơ̆ lik lòt mơ lòt tus hơ ƀòn Lais; bol khai gŏ làng bol tềng hơ̆ ơm ring lơngai kung be làng bol Sidôn, ring ngềt mơ ò kơlôi rcang. Làng bol tềng hơ̆ pas gơs ù tiah bol khai dê ò siơ̆u phan lơi; rlau mơ hơ̆ tai, bol khai kung ơm ngài bơh di làng bol Sidôn, mơ ò ring lơngai mơ dô nơm làng bol lơi.

⁸Tòm tŭ bol khai rê wơl tus hơ oh mi bol khai dê tòm Jôra mơ Estaôl, gen bol khai lùp lah: “Mbe bol mê neh sền gŏ ală bơta taih?”

⁹Bol khai ho lah: “Guh tĕ, brồ lơh bol khai! Bol hi gŏ lơgar hơ̆ ngan la ù bơkah tiah lơngồt. Oh mi rơp ò lơh bơta hơ̆ sơl ơ? Lòt tĕ, bañ lơh òbat, mut tĕ tềng hơ̆ mơ pìt ai lơgar.

¹⁰Tòm tŭ oh mi tus tềng hơ̆, oh mi rơp bàn dô nơm làng bol ò kơlôi rcang, dô nơm lơgar dờng ơnàng mơ Yàng Tom Trồ neh ơn tòm tê oh mi; hơ̆ la dô bă tiah ò siơ̆u dô nơm phan lơi hơđang ù.”

¹¹Gen prau rhiang nă cau klau bơh mpồl cau Dan at phan tòmlơh mơ lik lòt bơh Jôra mơ Estaôl.

¹²Tòm gùng lòt bol khai dê, bol khai lơh sàl rềp Kiriat Jearim tòm Juda. Tài behơ̆ tàng tiah đah mattơngai mut Kiriat Jearim geh sơnđan la Mahaneh Dan jơl tus di ngai do.

¹³Bơh tềng hơ̆, bol khai lòt tơn tus hơ tiah kơh mơnơm Epraim dê mơ tus hơ hìu Mika.

¹⁴Gen pram nă cau klau neh lòt sền rwang ù tiah Lais đơs mơ oh mi bol khai dê lah: “Oh mi git la tòm ală hìu do gơs dô nơm Ephot, rùp ràk ală yàng ndai tòm hìu, dô nơm rùp pac sềr, mơ dô nơm rùp tŏ sơl ơ? Tŭ do oh mi git bơta lơi pal lơh.”

¹⁵Behơ̆ bol khai dah tềng hơ̆ mơ tus tòm hìu cau pơnu Lebi tòm hìu nhă Mika dê mơ còp să khai.

¹⁶Prau rhiang nă cau Dan at phan tòmlơh mơ ntào di gùng mut mpồng dờng.

¹⁷Pram nă neh lòt sền rwang mut tòm hìu mơ pìt ai rùp pac sềr Ephot mơ ală rùp ràk yàng ndai tòm hìu mơ rùp tŏ tòm tŭ cau gơnoar ơn phan duh khoai ntào di gùng mut mpồng dờng bal mơ prau rhiang nă cau klau at phan tòmlơh.

¹⁸Tòm tŭ pram nă cau hơ̆ mut tòm hìu Mika pìt ai rùp pac sềr, Ephot, rùp ală yàng ndai tòm hìu mơ rùp tŏ, gen cau gơnoar ơn phan duh khoai đơs mơ bol khai lah: “Ñchi bol mê lơh taih?”

¹⁹Bol khai đơs lah: “Ơm tĕ mŏ mŏ, bañ đơs jơnau lơi! Lòt tĕ bal mơ bol hi mơ lơh gơs bèp mơ cau gơnoar ơn phan duh khoai bol hi dê. Lơh gơs cau gơnoar ơn phan duh khoai dô jơi bơtiàn mơ dô mpồl tòm Israel dê, hala lơh gơs cau gơnoar ơn phan duh khoai mìng dô hìu nhă dô nă cau dê lơm, bơta lơi la niam rlau mê in taih?”

²⁰Gen cau gơnoar ơn phan duh khoai dòp jơnau jà. Khai ai Ephot, rùp ală yàng ndai tòm hìu mơ rùp pac sềr mơ lòt jat mpồl hơ̆.

²¹Behơ̆ bol khai tơrwơl mơ lik lòt, ơn ală cau kơnòm, ală phan poan jơng mơ ală phan mơna lòt lài.

²²Tòm tŭ bol khai neh lòt ngài dô êt bơh di hìu Mika, gen ală cau klau ơm rềp mơ Mika geh hòi pơjum bal mơ ting jat bàn ală cau Dan.

²³Bol khai hòi driau mơ ală cau Dan, bol hơ̆ wơlke mơ đơs mơ Mika lah: “Ñchi bơta gơlik di mê mơ mê pơjum cau mê dê nàng tòmlơh taih?”

²⁴Mika ho lah: “Bol mê pìt ai ală yàng añ neh lơh gơs bal mơ cau gơnoar ơn phan duh khoai añ jê, mơ cèng lòt. Ñchi phan lơi gam mơ añ taih? Mbe bol mê rgơi lùp lah: Ñchi gơlik gơs di mê taih?”

²⁵Ală cau Dan ho lah: “Niam rlau bañ lòi kơno jơnau đơs mê dê digùl bol hi, rngòt gơs cau tòm bol hi gơhào nùs brồ lơh mê, gen mê bal mơ hìu nhă mê dê rơp roh bơta kis mòn!”

²⁶Gen ală cau Dan lòt gùng bol khai dê, tŭ Mika gŏ bol hơ̆ la pràn rlau ir mơ khai gen khai tơrwơl mơ rê hìu khai dê.

²⁷Gen cau Dan ai phan Mika neh lơh gơs bal mơ cau gơnoar ơn phan duh khoai khai dê, mơ lòt tus hơ Lais, tòmsò mơ dô nơm làng bol ơm ring ngềt mơ ò pin kơlôi bơta lơi. Bol khai ai đào tơnchơt làng bol hơ̆ mơ chu ƀòn dờng bol khai dê.

²⁸Ò gơs cau lơi dong kòl làng bol Lais, tài bơh bol khai ơm ngài bơh ƀòn dờng Sidôn, mơ bol khai ò ring lơngai mơ dô nơm làng bol lơi. Ƀòn dờng hơ̆ ơm tòm thòng gơrê bal mơ Bet Rehôp. Bol khai bơt wơl ƀòn dờng mơ ơm tềng hơ̆.

²⁹Bol khai tơmoh sơnđan ƀòn hơ̆ la Dan jat sơnđan ồng pàng bol khai dê la kòn Israel dê; bulah bơh lài ƀòn hơ̆ sơnđan la Lais.

³⁰Tềng hơ̆ cau Dan bơtào rùp ràk bol khai in. Jônathan kòn klau Gersôn, sau Môise dê mơ jơh ală kòn klau khai dê lơh gơs cau gơnoar ơn phan duh khoai jơi bơtiàn Dan in, jơl tus dê tŭ bol khai gơkòl kup cèng gơs dĭ.

³¹Bol khai kư̆ pơnjat ngui rùp ràk mơ Mika neh lơh tòm jơh ală ngai hìu duh khoai Yàng Tom Trồ dê ơm tòm Silô.