Read koho Ală Kwang Cahrña 19 Bible Online

Ală Kwang Cahrña 19 - koho bible

Ală Kwang Cahrña 19

¹Tòm ală ngai hơ̆, ò gơs bơtau tòm Israel. Gơs dô nă cau Lebi ơm tòm dô bă tiah ngài tòm tiah kơh mơnơm Epraim, khai gơs bau cồng bơh Betlehem tòm Juda.

²Mơya bau cồng khai gơjrañ di khai, sang khai mơ rê wơl hơ hìu bèp khai dê hơ Betlehem tòm Juda, mơ khai neh ơm tềng hơ̆ poan kơnhai,

³gen bau klau khai lòt jòi khai, ai jơnau lơbơn niam nàng lam khai rê wơl. Khai cèng bal mơ khai dô nă cau duh broă mơ bàr nơm alàng. Tòm tŭ khai tus di hìu bèp cau ùr dê, tòm tŭ bèp cau ùr hơ̆ gŏ khai gen chò hòp mơ wă rò khai.

⁴Po bèp khai, hơ̆ la bèp cau ùr hơ̆ dê, jà khai ơm wơl, mơ khai ơm mơ po bèp khai dê tòm pe ngai, ñô sa mơ bic mang tềng hơ̆.

⁵Tòm ngai poan, bol khai guh gòñ bơh drim mơ rcang lòt gùng, mơya bèp cau ùr hơ̆ đơs mơ bơrtơu khai dê lah: “Sa tĕ dô êt phan sa nàng lơh pràn mê in, tơnơ̆ hơ̆ gen mê rơp lòt.”

⁶Behơ̆ bàr nă bol khai nggui ñô sa bal; gen bèp cau ùr hơ̆ đơs lah: “Dan ơm wơl tĕ tòm mang do mơ lơh tĕ chò hòp să tòm mê in.”

⁷Gen tòm tŭ cau klau guh mơ ñă lòt gen po bèp khai jà bơklơn khai ơm wơl mang hơ̆ tai.

⁸Tus diàng drim ngai pram, tòm tŭ khai guh nàng lik lòt, bèp cau ùr đơs lah: “Lơh tĕ pràn kơldang să tòm mê.” Behơ̆ bàr nă bol khai ơm wơl jơl tus di tơngai wèt mơ bàr nă bol khai sào bal.

⁹Gen tòm tŭ cau Lebi bal mơ bau cồng mơ cau duh broă khai dê ñă ntào nàng lòt, gen po bèp khai dê, hơ̆ la bèp cau ùr hơ̆ dê, đơs mơ khai lah: “Sền ne, trồ neh mho rau. Dan ơm wơl mang do; trồ ngai neh mòr jơh. Ơm wơl mơ lơh nùs mê geh hòn chò. Rìng àng drim hìng bol mê guh gòñ nàng lòt gùng rê hìu.”

¹⁰Mơya cau klau hơ̆ ò bài ơm wơl dô mang tai, khai ñă lòt hơ đah Jebus (hơ̆ la Jerusalem), bal mơ bàr nơm alàng neh kơt ừn mơ bau cồng khai dê.

¹¹Tòm tŭ bol khai neh tus rềp hơ Jebus mơ trồ neh mho rau, gen cau duh broă đơs mơ cau tòmlah: “Bol he ơm dơh wơl tĕ tòm ƀòn cau Jebus dê mơ bic mang.”

¹²Cau tòm khai dê ho lah: “Ò di, bol he ò mut tòm dô nơm ƀòn dờng cau làng bol bơdìh ò di la làng bol Israel. Bol he rơp lòt tơn tus hơ Gibea.”

¹³Khai đơs tai lah: “Bol he pơnđơl tĕ lòt tus hơ Gibea hala Rama mơ bic mang tòm dô bă tòm ală tiah hơ̆.”

¹⁴Behơ̆ bol khai kư̆ lòt gùng, mơ mattơngai mut tòm tŭ bol khai tus rềp hơ Gibea tòm Benjamin.

¹⁵Gen bol khai ơm dơh wơl nàng bic mang. Bol khai lòt tus nggui tòm ƀlàng ƀòn dờng dê, mơya ò gơs cau lơi wă rò bol khai mut tòm hìu nàng bic mang.

¹⁶Mơ tai, tòm mho hơ̆ gơs dô nă ồng kra rê lơh broă bơh ƀlàng sre, khai la dô nă cau bơh lơgar kơh mơnơm Epraim neh tus ơm tòm Gibea (cau ơm tềng hơ̆ la cau Benjamin).

¹⁷Tòm tŭ ồng kra hơ̆ sền gŏ cau lòt gùng ơm tòm ƀlàng ƀòn dờng gen khai lùp lah: “Ntềng đah bol mê lòt? Mbơh bol mê neh tus taih?”

¹⁸Khai ho lah: “Bol hi rê bơh Betlehem tòm Juda, lòt tus hơ tiah ngài tòm tiah kơh mơnơm Epraim la tiah añ ơm. Añ neh lòt tus hơ Betlehem tòm Juda mơ tŭ do añ lòt tus di hìu Yàng Jehôwa. Ò gơs cau lơi wă rò añ tòm hìu khai dê.

¹⁹Bol hi gơs rhe mơ phan sa ală alàng bol hi dê, piang lă mơ tơrnòm să tòm bol hi in la ală cau duh broă ồng dê, hơ̆ la añ, bau ùr añ jê, mơ cau pơnu lòt bal mơ bol hi. Bol hi ò siơ̆u phan lơi ò.”

²⁰Ồng kra đơs mơ bol khai lah: “Lơngap lơngai mê in, añ rơp rcang jơh ală bơta pal càng mê in, mìng bañ bic mang tòm ƀlàng ƀòn dê.”

²¹Behơ̆ ồng kra lam khai mut tòm hìu mơ ai ală alàng in sa, bol khai rào jơng rau gen ñô mơ sa bal.

²²Tòm tŭ bol khai gơs bơta chò hòp bal, gen gơs ală cau klau iơh bơsak tòm ƀòn dờng tus gơrwàng gùt dar hìu. Bol khai tur di mpồng mơ đơs dờng mơ ồng kra cau tòm hìu lah: “Cèng tơlik tĕ cau klau neh mut tòm hìu mê dê nàng bol hi bic mơ khai.”

²³Cau tòm hìu lik tus hơ bol khai mơ đơs lah: “Ò di, ơ ală oh mi añ jê, bañ lơh bơta iơh behơ̆ tài bơh cau do la cau nac tòm hìu añ, bañ lơh bơta ƀàssìl ƀàsso do.

²⁴Do ală kòn ơruh añ jê, òhềt bau mơ cau lơi, mơ bau cồng cau klau ne dê. Añ rơp lam bol khai tus mơ oh mi, oh mi lơh bơta lơi dê bol khai jat nùs oh mi kòñ. Mơya gơwèt mơ cau klau do, bañ lơh bơta ƀàssìl ƀàsso behơ̆.”

²⁵Mơya ală cau klau hơ̆ ò bài iat jơnau ồng kra dê. Behơ̆ cau klau kup bau cồng khai dê, lam khai lik dê tiah ai bol hơ̆ in, bol hơ̆ bic bơklơn mơ khai mơ lơh bòl glar jê sồt dê khai mang àng; tus dê rìng àng gen bol hơ̆ ai khai in rê.

²⁶Tòm àng drim cau ùr hơ̆ rê tus hơ hìu la tiah bau klau khai ơm; khai gơpừ di bơr mpồng mơ bic tềng hơ̆ jơl tus trồ àng.

²⁷Tòm tŭ bau klau khai dê guh drim mơ pò mpồng hìu nàng lik lòt gùng; ne khai gŏ bau cồng khai dê bic blup di đap mpồng hìu, bàr đah tê ơn di bơr mpồng.

²⁸Khai đơs mơ bau cồng lah: “Ñă tĕ: bol he lòt lă!” Mơya khai ò ho wơl. Gen khai ơn bau cồng khai hơđang alàng mơ lòt gùng rê hìu.

²⁹Tòm tŭ khai tus tòm hìu khai dê, khai ai dô nơm pềs mơ koh ƀồc bau cồng khai dê jơt bàr pơnah, mơ pơyoa gơ tus hơ jơh ală kơnhwàl Israel dê.

³⁰Kòp nă cau gŏ bơta hơ̆ gen đơs lah: “Bơta behơ̆ ò tŭ lơi gŏ hala gơlik gơs bơh di tŭ làng bol Israel lik bơh lơgar Ejiptơ jơl tus di ngai do. Kơlôi sơnơng tĕ bơh bơta hơ̆! Ơn nùs kơlôi tĕ! Yal bol he in git ñchi pal lơh!”