Read koho Ală Kwang Cahrña 2 Bible Online

Ală Kwang Cahrña 2 - koho bible

Ală Kwang Cahrña 2

¹Cau gơnrơh Yàng Jehôwa dê guh bơh Gilgal tus hơ Bôkim mơ đơs lah: “Añ neh tă cèng bol mê lik bơh Ejiptơ mơ lam bol mê mut tòm lơgar Añ neh ho ai ồng pàng bol mê in. Añ neh đơs ‘Añ rơp ò tŭ lơi sang lòi bơta ho bal mơ bol mê.

²Đah mơ bol mê bañ lơh bơta ho bal mơ ală cau ơm tòm lơgar do, sòr tơrlah tĕ ală cơnòng duh khoai bol khai dê.’ Mơya bol mê ò dòn bơr Añ. Sền tĕ ñchi bơta bol mê neh lơh!

³Behơ̆ tàng Añ đơs lah Añ rơp ò ting bơtrơh bol khai bơh di đap bol mê; mơya bol khai rơp gơlik gơs cau sò tơm bol mê dê, ală yàng bol khai dê rơp be dô nơm dă bol mê in.”

⁴Tòm tŭ cau gơnrơh Yàng Jehôwa dê neh sir đơs ală jơnau hơ̆ mơ jơh cau Israel gen làng bol nggà ñìm dờng,

⁵behơ̆ bol khai sơnđan tiah hơ̆ la Bôkim. Tềng hơ̆ bol khai ơn phan duh khoai Yàng Jehôwa in.

⁶Tòm tŭ Jôsue neh ai làng bol in rê; Jơh ală cau Israel lòt tus hơ sre brê tòm bol khai dê nàng ai ù tiah lơh gơs phan tòm.

⁷Làng bol duh khoai Yàng Jehôwa jơl jơh rài kis Jôsue dê, mơ jơh ală cau kwang kra gam kis tơnơ̆ mơ Jôsue, la ală cau neh gŏ jơh ală broă dờng mơ Yàng Jehôwa neh lơh Israel in.

⁸Jôsue kòn klau Nun, cau duh broă Yàng Jehôwa dê chơt tòm tŭ khai neh dô rhiang jơt nam.

⁹Cau tơp khai tòm ù tiah sre brê khai dê tòm Thimnat Heres, tòm tiah kơh mơnơm Epraim, đah đang mơnơm Gaas.

¹⁰Tơnơ̆ mơ tŭ jơh ală cau tòm rài hơ̆ neh chơt rê hơ ồng pàng bol khai dê rau; gen dô rài ndai geh tơngguh, bol khai ò git Yàng Jehôwa mơ kung ò git ală broă Kơnràñ neh lơh Israel in.

¹¹Behơ̆ làng bol Israel lơh bơta iơh bơsak di đap Yàng Jehôwa mơ duh broă ală yàng Baal.

¹²Bol khai sang Jehôwa Yàng Tom Trồ ală ồng pàng bol khai dê, la Bơtau neh cèng bol khai lik bơh Ejiptơ. Bol khai lòt jat mơ duh khoai ală yàng ndai la yàng ală làng bol ơm gùt dar bol khai. Bol khai lơh Yàng Jehôwa in gơjrañ.

¹³Bol khai neh sang lòi Yàng Jehôwa mơ duh broă ală yàng Baal mơ Astarte.

¹⁴Behơ̆, bơta gơjrañ Yàng Jehôwa dê neh gơhào khuh tòmdră mơ Israel, Kơnràñ lòi bol khai gơkòl phà kơñau tòm tê ală cau phà kơñau bol khai, mơ tac bol khai tòm gơnoar ală cau sò tơm ai phan mơna bol khai dê. Kơnràñ tac bol khai tòm gơnoar ală cau sò tơm ơm gùt dar bol khai; gen tàng bol khai ò rgơi ntào jai tòmdră mơ ală cau sò tơm bol khai dê.

¹⁵Tŭ lơi bol khai lik lòt tòmlơh, gen tê Yàng Jehôwa tòmdră mơ bol khai mơ cèng bơta rung rài hơđang bol khai, jat be jơnau Yàng Jehôwa neh yal tơnggit mơ neh srat să mơ bol khai; gen bol khai gơtìp tòm bơta bòl glar dờng ngan.

¹⁶Gen Yàng Jehôwa bơtào tơngguh ală cau kwang cahrña nàng dong tă bol khai bơh di tê ală cau phà kơñau bol khai.

¹⁷Bulah behơ̆, bol khai ò iat ală cau kwang cahrña bol khai dê, bơh bol khai hàm kòñ jat ală yàng ndai mơ cùn khoai bol gơ. Bol khai mhar ngan sang gùng ală ồng pàng bol khai neh lòt, la ală cau lơh jat ală jơnau gơnoar sồr Yàng Jehôwa dê, bol khai ò đòm krơh ală ồng pàng bol khai dê.

¹⁸Tŭ lơi Yàng Jehôwa bơtào tơngguh bol khai in dô nă cau kwang cahrña, Kơnràñ ơm bal mơ cau kwang cahrña hơ̆ tòm jơh rài kis khai dê nàng dong Israel lik bơh di tê cau sò tơm bol khai dê; bơh Yàng Jehôwa gơs nùs nđàc sơngit di bol khai tòm tŭ bol khai rơnđơh, bơh ală cau kup kơryan mơ rồn bơklơn bol khai.

¹⁹Mơya tòm tŭ cau kwang cahrña chơt gen làng bol rê wơl tòm ală gùng iơh rlau mơ gùng ală ồng pàng bol khai dê, lòt jat ală yàng ndai, duh broă mơ duh khoai bol gơ. Bol khai ò bài sang lòi broă iơh bol khai dê mơ gùng kră kơldang.

²⁰Tài bơh hơ̆ tàng Yàng Jehôwa gơjrañ ngan di Israel mơ đơs lah: “Tài bơh làng bol do neh tìs mơ bơta ho bal mơ Añ neh lơh mơ ală ồng pàng bol khai dê, mơ ò iat jơnau Añ;

²¹gen Añ rơp ò tai bơtrơh bơh di đap bol khai ală làng bol lơi mơ Jôsue neh lòi wơl tòm tŭ khai neh chơt.

²²Añ rơp ngui ală làng bol hơ̆ nàng lòng Israel, tồ sền gŏ dilah bol khai prap gàr gùng dà Yàng Jehôwa dê mơ lòt tòm gùng hơ̆ kung be ală ồng pàng bol khai dê hala ò.”

²³Yàng Jehôwa lòi ală làng bol hơ̆ gam wơl, Kơnràñ ò ting bơtrơh bol khai tòm dô dơ̆ lĕ mơ ò jào phi bol khai tòm tê Jôsue dê.