Read koho Ală Kwang Cahrña 20 Bible Online

Ală Kwang Cahrña 20 - koho bible

Ală Kwang Cahrña 20

¹Gen jơh làng bol Israel lik lòt bơh Dan tus hơ Beerseba, bal mơ ù tiah Galaat, mpồl làng bol pơjum bal be dô nă di đap Yàng Jehôwa tòm Mispa.

²Ală cau kwang at bồ jơh làng bol tòm jơh ală jơi bơtiàn Israel, tơlik mat bol khai tòm mpồl jơnum làng bol Yàng Tom Trồ dê; poan rhiang rbô ling lòt jơng at đào.

³(Cau Benjamin neh kơno la cau Israel neh guh hơ Mispa). Gen làng bol Israel đơs lah: “Yal tĕ bol hi in mbe broă tồi glài iơh rmơh do neh gơlik gơs taih?”

⁴Behơ̆ cau Lebi, bau klau cau ùr neh gơkòl tơnchơt, ho lah: “Añ bal mơ bau cồng añ jê neh tus hơ Gibea tòm Benjamin nàng bic mang tềng hơ̆.

⁵Tòm mang hơ̆, ală cau kwang Gibea dê tus tòmdră mơ añ mơ gơrwàng hìu. Bol khai kòñ tơnchơt añ, mơ bol khai neh bic bơklơn bau cồng añ jơl chơt.

⁶Añ neh at ƀồc bau cồng añ mơ koh oă pơnah, mơ pơyoa tus hơ kòp kơnhwàl tòm sre brê Israel dê dô pơnah; tài bơh bol khai neh tìs glài dờng mơ lơh bơta tràl sơrbil do tòm Israel.

⁷Behơ̆ tŭ do, ơ jơh oh mi la làng bol Israel, đơs tĕ jơnau bơto sơnio mơ bơyai broă tềng do.”

⁸Jơh làng bol ñă ntào bal kung be dô nă cau mơ đơs lah: “Ò gơs cau lơi tòm bol he rơp rê tòm sàl. Ò gơs cau lơi tòm bol he rơp rê tòm hìu khai dê.

⁹Mơya tŭ do, do la bơta bol he pal lơh di Gibea: bol he rơp guh tòmlơh mơ bol hơ̆ jat bơta tĕ khà.

¹⁰Tòm jơh ală jơi bơtiàn Israel dê, bol he rơp tă jơt nă cau klau tòm dô rhiang nă, dô rhiang nă cau klau tòm dô rbô nă, mơ dô rbô nă cau klau tòm dô tơlak nă, nàng cèng phan ngui sa mpồl ling tòmlơh in. La ală cau lik lòt nàng sal tê di Gibea tòm Benjamin, bơh ală bơta ƀàssìl ƀàsso mơ bol khai neh lơh tòm Israel.”

¹¹Behơ̆ jơh ală cau klau Israel dê pơjum bal mơ lơh gơs dô bă bal kung be dô nă tòmdră mơ ƀòn dờng hơ̆.

¹²Ală jơi bơtiàn Israel dê sồr cau lòt làm jơi bơtiàn Benjamin mơ đơs lah: “Bơta tồi glài iơh rmơh do neh tìs digùl oh mi la mbe lơi taih?

¹³Tŭ do jào tĕ bol hi in ală cau klau iơh bơsak ơlă ơlai Gibea dê nàng bol hi tơnchơt bol khai tồ lơh goh bơta iơh bơsak bơh Israel.” Mơya cau Benjamin ò bài iat jơnau oh mi bol khai dê la cau Israel.

¹⁴Cau Benjamin lik bal bơh di ală ƀòn dờng tus hơ Gibea nàng tòmlơh mơ cau Israel.

¹⁵Tòm ngai hơ̆, cau Benjamin pơjum tơrgòm bàr jơt prau rbô cau ling at phan tòmlơh bơh di ală ƀòn dờng bol khai dê, di gah làng bol ơm tòm ƀòn Gibea.

¹⁶Digùl jơh ală cau ling hơ̆ gơs poh rhiang nă geh sac rwah la cau mòng tê kiau; kòp nă bol hơ̆ rgơi ngui che sơrbì lŭ di di dô dang che sŏ mơ ò tŭ lơi tìs.

¹⁷Mơ cau Israel, ò kòp cau Benjamin, pơjum tơrgòm gơs poan rhiang rbô nă cau klau at đào, jơh tơl nă la cau jak tòmlơh.

¹⁸Làng bol Israel guh hơ Betel mơ hòi lùp Yàng Tom Trồ lah: “Ơ Yàng, ñcau tòm bol hi pal guh lài nàng tòmlơh mơ cau Benjamin?” Yàng Jehôwa ho lah: “Juda rơp guh lài.”

¹⁹Àng drim hìng làng bol Israel guh mơ lòt lơh sàl rềp di Gibea.

²⁰Cau Israel lik lòt tòmlơh mơ cau Benjamin, mơ rơndap mpồl ling tòmdră mơ cau Benjamin tòm Gibea.

²¹Cau Benjamin lik lòt bơh Gibea mơ tòm ngai hơ̆ tơnchơt bàr jơt bàr rbô nă cau Israel.

²²Mơya cau Israel tòmchồl nùs bal mơ gơp mơ rơndap mpồl ling dô dơ̆ tai di tiah să tòm bol khai neh rơndap tòm ngai sơnròp.

²³Bol khai guh ñìm di đap Yàng Jehôwa jơl tus di mho mơ hòi lùp Yàng Jehôwa lah: “Bol hi pal guh tòmlơh tai mơ cau Benjamin la oh mi bol hi dê sơl?” Yàng Jehôwa ho lah: “Guh tĕ tòmlơh mơ bol khai.”

²⁴Gen cau Israel tus rềp nàng tòmlơh mơ cau Benjamin tòm ngai bàr.

²⁵Dơ̆ do, tòm tŭ cau Benjamin lik bơh Gibea nàng tòmdră mơ cau Israel, bol khai tơnchơt tai jơt phàm rbô nă cau Israel, jơh tơl nă la cau at đào tòmlơh.

²⁶Gen cau Israel, jơh tơl nă guh tus hơ Betel, nggui tềng hơ̆ mơ ñìm di đap Yàng Jehôwa. Bol khai ñìm mơ ơt sa tòm ngai hơ̆ jơl tus mho mơ ơn ală phan ơn duh khoai chu pơrguc mơ ală phan ơn duh khoai ring lơngai Yàng Jehôwa in.

²⁷Mơ cau Israel hòi lùp Yàng Jehôwa (tòm pah rài hơ̆ Đài Bơta Ho Bal Yàng Tom Trồ dê ơm tềng hơ̆,

²⁸gơs Phinea kòn Eleajar, sau Arôn duh broă di đap gơ), mơ lah: “Bol hi pal lòt tòmlơh tai mơ ală oh mi bol hi dê la cau Benjamin hala bol hi pal ơm taih?” Yàng Jehôwa ho lah: “Lòt tĕ, bơh ngai hìng añ rơp jào phi bol khai tòm tê bol mê dê.”

²⁹Behơ̆ cau Israel rơndap cau kơp òm gùt dar Gibea.

³⁰Gen bol khai guh tòmlơh mơ cau Benjamin tòm ngai dơ̆ pe, mơ rơndap mpồl ling bol khai dê tòmdră mơ Gibea kung be bol khai neh lơh lài.

³¹Tòm tŭ cau Benjamin lik tòmlơh mơ cau Israel, bol khai gơkòl pơrlồm lam lòt ngài bơh ƀòn. Kung be bol khai rơp sơntòm lơh mơ tơnchơt cau Israel be lài; behơ̆ gơs pơgap pe jơt nă cau neh kong tơnchơt tòm ƀlàng mơ tòm ală gùng, dô nơm gùng guh hơ Betel mơ dô nơm gùng ndai lòt hơ Gibea.

³²Cau Benjamin kơlôi lah: “Bol khai kòl bol he lơh alah be kung be lài,” gen cau Israel đơs lah: “Bol he ruc wơl lă nàng lam pơrlồm bol khai lòt ngài bơh ƀòn mơ tus hơ ală gùng me.”

³³Jơh ală cau Israel sang tiah bol khai dê mơ rơndap mpồl ling tus hơ Baal Thama, tòm tŭ ală cau Israel neh kơp òm lik bơh di tiah bol khai dê mơ brồ lơh bơh đah mattơngai mut Gibea dê.

³⁴Gen jơt rbô nă cau ling jak tòmlơh Israel dê brồ tus mơ tòmlơh đah hơđap Gibea. Bơta kơlìn tòmlơh dờng ngan, mơya ală cau Benjamin ò git đal la bơta tơnroh rơp gơdùh hơđang bol khai.

³⁵Yàng Jehôwa lơh alah cau Benjamin di đap cau Israel; mơ cau Israel neh tơnchơt bàr jơt pram rbô dô rhiang nă cau Benjamin tòm ngai hơ̆, jơh tơl nă la cau at đào tòmlơh.

³⁶Behơ̆ cau Benjamin neh gŏ la bol khai neh kong alah. Cau Israel neh ruc wơl di đap cau Benjamin tài bơh bol khai kơnòm di mpồl ling kơp òm mơ bol khai neh rơndap rềp di Gibea.

³⁷Mpồl ling kơp òm hơ̆ nisơna brồ tus mơ lơh Gibea. Bol khai lòt làm mơ ngui đào tơnchơt jơh ală cau tòm ƀòn.

³⁸Tŭ do bơta gơs dô nùs bal digùl cau Israel mơ ală cau ơm kơp òm, hơ̆ la tòm tŭ bol khai tơlik dô puk ñhŭ guh boh di ƀòn dờng,

³⁹gen cau Israel neh tơrwơl mut tòm bơta tòmlơh. Mơya cau Benjamin neh sơntòm lơh nisơna hơđang cau Israel mơ tơnchơt pơgap pe jơt nă cau tòm bol khai. Behơ̆ tàng bol khai kơlôi lah: “Ngan bol khai rơp kòl lơh alah di đap bol he, kung be tòm bơta tòmlơh dơ̆ lài.”

⁴⁰Mơya tòm tŭ jrong ñhŭ sơntòm guh bơh di ƀòn, cau Benjamin wèt sền bơh ngkòi bol khai, mơ gŏ jơh dô ƀòn gơs ñhŭ ồs guh hơ trồ.

⁴¹Gen cau Israel tơrwơl lơh bol khai mơ cau Benjamin nrơt nrơl bơh bol khai gŏ bơta tơnroh neh tus rềp hơđang bol khai rau.

⁴²Gen tàng bol khai tơrwơl ngkòi bơh di cau Israel song hơ đah ƀlàng ngềt ngơt, mơya bol khai gơkòl tòm bơta tòmlơh, mơ ală cau Israel lik bơh di ƀòn tơnchơt bol khai digùl tềng hơ̆.

⁴³Cau Israel gơrwàng gùt dar cau Benjamin, ting jat bol khai bơh Noha mơ tơnroh bol khai sơlo tus hơ đah mattơngai lik Gibea dê.

⁴⁴Jơt phàm rbô nă cau Benjamin kong tơnchơt, jơh tơl nă bol khai la cau jak tòmlơh.

⁴⁵Tòm tŭ bol khai wơlke mơ dô hơ ƀlàng ngềt ngơt tus hơ lŭ Rimôn, cau Israel tơnchơt pram rbô nă rò gah ală gùng me. Bol khai kư̆ ting jat cau Benjamin tus hơ Gidôm mơ tơnchơt bàr rbô nă cau tai.

⁴⁶Behơ̆ jơh ală cau Benjamin neh gơplơ̆ chơt tòm ngai hơ̆ la bàr jơt pram rbô nă cau at đào tòmlơh, jơh tơl nă bol khai la cau jak tòmlơh.

⁴⁷Mơya prau rhiang nă cau pleh mơ dô hơ tiah ƀlàng ngềt ngơt tus hơ lŭ Rimôn mơ ơm tềng hơ̆ poan kơnhai.

⁴⁸Gen cau Israel rê wơl hơ cau Benjamin, ai đào tơnchơt jơh ală cau tòm ƀòn bal mơ ală phan poan jơng mơ jơh ală phan lơi gam wơl. Bol khai kung chu jơh ală ƀòn dờng mơ ồs.