Read koho Ală Kwang Cahrña 21 Bible Online

Ală Kwang Cahrña 21 - koho bible

Ală Kwang Cahrña 21

¹Tŭ hơ̆ cau Israel neh srat să tòm ƀòn Mispa lah: “Ò gơs cau lơi tòm bol he rơp tòmbau kòn ùr khai dê mơ cau Benjamin.”

²Làng bol lòt tus hơ Betel mơ nggui tềng hơ̆ di đap Yàng Tom Trồ jơl tus di mho, ai jơnau dờng mơ ñìm rac sràt bơtang ngan.

³Bol khai đơs lah: “Ơ Jehôwa la Yàng Tom Trồ Israel dê, ñchi bơh tài bơta do neh gơlik ngai do pal kong siơ̆u dô jơi bơtiàn tòm Israel taih?”

⁴Ngai tơnơ̆, làng bol guh gòñ bơh drim bơt dô nơm cơnòng duh khoai tềng hơ̆ mơ ơn phan duh khoai chu pơrguc mơ phan ơn duh khoai ring lơngai.

⁵Gen cau Israel lùp lah: “Ñcau tòm jơh ală jơi bơtiàn Israel dê ò tus pơjum di đap Yàng Jehôwa taih?” Bơh neh gơs jơnau srat să kràñ cê ngan gơwèt mơ cau lơi ò tus pơjum di đap Yàng Jehôwa tòm Mispa lah: “Cau hơ̆ pal kong tơnchơt.”

⁶Mơya làng bol Israel nđàc sơngit bơh oh mi bol khai dê la cau Benjamin, mơ đơs lah: “Ngai do dô jơi bơtiàn neh gơkòl tơnroh bơh dê Israel.

⁷Mbe bol he pal lơh nàng gơs bau ùr ală cau gam kis in, bơh di tŭ bol he neh ai sơnđan Yàng Jehôwa srat să lah bol he rơp ò ai dô nă kòn ùr lơi bol he dê tòmbau mơ bol khai?”

⁸Gen bol khai lùp lah: “Jơi bơtiàn lơi tòm Israel ò tus pơjum di đap Yàng Jehôwa tòm Mispa taih?” Bol khai gŏ ò gơs cau lơi bơh Jabes Galaat tus lơh sàl nàng pơjum tềng hơ̆.

⁹Bơh tòm tŭ bol khai kòp khà làng bol, ò gŏ dô nă cau lơi tus tềng hơ̆ bơh Jabes Galaat.

¹⁰Behơ̆ mpồl jơnum sồr jơt bàr rbô nă cau ling lòt tus tềng hơ̆ mơ sồr lah: “Lòt tĕ tơnchơt jơh làng bol ơm tòm Jabes Galaat mơ đào, tơnchơt cau ùr bal mơ ală kòn dềt sơl.

¹¹Do la bơta bol mê pal lơh: ‘Jơh ală cau klau mơ ală cau ùr neh bic mơ dô nă cau klau gen bol mê tơnchơt tĕ.’”

¹²Mơ bol khai jòi bàn digùl làng bol tòm Jabes Galaat poan rhiang nă cau ơruh òhềt tŭ lơi bic mơ cau klau lơi, mơ lam bol khai tus hơ tiah lơh sàl tòm Silô, lơgar Kanaan.

¹³Gen jơh mpồl jơnum sồr cau lòt hơ cau Benjamin ơm di lŭ Rimôn mơ yal tơlik bơta gơtòmsòr bal mơ bol khai.

¹⁴Ală cau Benjamin rê wơl di tŭ hơ̆ mơ bol khai ai bol hơ̆ in bau mơ ală cau ùr gam kis digùl ală cau ùr tòm Jabes Galaat. Mơya ò tơl jơh tơl nă bol khai in.

¹⁵Làng bol nđàc sơngit di cau Benjamin, tài bơh Yàng Jehôwa neh lơh siơ̆u tòm ală jơi bơtiàn Israel dê.

¹⁶Gen ală cau kwang kra mpồl jơnum dê đơs lah: “Ñchi bơta bol he pal lơh nàng gơs bau ùr ală cau gam wơl in, bơh ò gam dô nă cau ùr lơi tòm Benjamin tai taih?”

¹⁷Bol khai đơs lah: “Pal gơs cau tơrbŏ jơi ală cau Benjamin gam wơl in nàng ò gơkòl tơnroh dô jơi bơtiàn tòm Israel.

¹⁸Bulah behơ̆, bol he ò rgơi tòmbau ală kòn ùr he dê bol khai in tài bơh bol he neh srat să lah: ‘Pal srat rma cau lơi in ai dô nă cau ùr Benjamin in bau.’”

¹⁹Behơ̆ bol khai đơs lah: “Sền tĕ, gơs dô bơta pơjum sa kòp nam Yàng Jehôwa in tòm Silô đah hơđang Betel, đah mattơngai lik gùng lòt bơh Betel tus hơ Sicem, mơ đah hơđơm Lebôna.”

²⁰Behơ̆ bol khai nting sồr ală cau Benjamin mơ đơs lah: “Lòt tĕ kơp òm tòm ală suơn ño,

²¹mơ gơn; tòm tŭ ală cau ơruh Silô lik tòmya tòm bơta tòmya, gen ală oh mi lik tĕ mhar bơh di ală suơn ño, mơ kòp nă bol mê kup tĕ dô nă cau ơruh Silô dê nàng lơh gơs bau ùr, mơ rê wơl hơ ù tiah cau Benjamin dê.

²²Gen dilah bèp hala bi bol khai dê tus tòmlah mơ bol he, gen bol he rơp đơs mơ bol khai lah: ‘Dan ai nùs dờng ơnàng mơ ai gơnoar bol hi in nàng gơs bol khai, tài bơh tòm bơta kơlìn gơtoă, bol hi ò kup dô nă bau ùr kòp nă bol khai in, mơ oh mi kung ò gơkòl glài, bơh ai kòn ùr oh mi dê bol khai in.’”

²³Gen ală cau Benjamin neh lơh behơ̆; bol khai kup bau ùr kòp nă bol khai in bơh ală cau ơruh ơm tòmya, gen bol khai rê wơl hơ ù tiah bol khai dê, bơt wơl ală ƀòn dờng mơ ơm tềng hơ̆.

²⁴Behơ̆ làng bol Israel lòt bơh tiah hơ̆ mơ rê wơl hơ jơi bơtiàn mpồl hìu nhă bol khai dê; mơ bol khai lik bơh tiah hơ̆ kòp nă rê hơ ù tiah tòm he dê.

²⁵Tòm pah rài hơ̆ ò gơs bơtau tòm Israel, kòp nă lơh jat bơta khai kơlôi la di.