Read koho Ală Kwang Cahrña 3 Bible Online

Ală Kwang Cahrña 3 - koho bible

Ală Kwang Cahrña 3

¹Do la ală làng bol mơ Yàng Jehôwa neh lòi wơl nàng lòng cau Israel òhềt git làm bơta tòmlơh lơi tòm Kanaan

²(Kơnràñ mìng lơh bebơ̆ nàng kòn sau Israel in git bơta tòmlơh, la ală cau òhềt git làm bơta tòmlơh bơh lài):

³Pram nă cau kwang at bồ cau Philistin, mơ jơh ală cau Kanaan, ală cau Sidôn, mơ làng bol Hebit ơm tòm mơnơm Liban, bơh mơnơm Baal Hermôn tus hơ Lebô Hamat.

⁴Bol khai la bơta nàng lòng Israel, tồ git dilah bol khai kòñ lơh jat jơnau gơnoar sồr mơ Yàng Jehôwa neh ai ală ồng pàng bol khai in kơnòm dê Môise.

⁵Behơ̆ làng bol Israel ơm digùl làng bol Kanaan, làng bol Hetit, làng bol Amôrit, làng bol Pherijit, làng bol Hebit mơ làng bol Jebusit.

⁶Bol khai bau mơ ală kòn ùr làng bol hơ̆, mơ bol khai tòmbau ală kòn ùr bol khai dê mơ ală kòn klau làng bol hơ̆ dê, mơ duh khoai ală yàng bol hơ̆ dê.

⁷Làng bol Israel lơh bơta iơh bơsak di đap Yàng Jehôwa, hŭi Jehôwa Yàng Tom Trồ bol khai dê, mơ duh khoai ală yàng Baal mơ yàng Asera.

⁸Gen tàng, bơta gơjrañ dờng Yàng Jehôwa dê gơhào khuh tòmdră mơ Israel, mơ Kơnàñ neh tac bol khai tòm tê cau bơtau Aram Naharaim la Kusan Risathaim, mơ Israel duh broă bơtau hơ̆ tòm phàm nam.

⁹Mơya tòm tŭ bol khai rac dan mơ Yàng Jehôwa, gen Kơnràñ tơngguh Israel in dô nă cau dong tă la Ôtniel kòn klau Kenas, oh Kalep dê dong tă bol khai.

¹⁰Hwềng Yàng Jehôwa dê tus hơđang khai, khai cahrña Israel; mơ khai lik lòt tòmlơh. Yàng Jehôwa jào Kusan Risathaim bơtau Aram tòm tê Ôtniel; mơ tê khai geh pha lin rlau.

¹¹Behơ̆ lơgar ơm rlô ring lơngai tòm poan jơt nam jơl tus di tŭ Ôtniel kòn klau Kenas chơt.

¹²Làng bol Israel lơh ală bơta iơh bơsak tai di đap Yàng Jehôwa, gen Yàng Jehôwa lơh Eglôn bơtau Môap gơlik pràn kơldang tòmdră mơ Israel, tài bơh bol khai neh lơh ală bơta iơh bơsak di đap Yàng Jehôwa.

¹³Bơtau Eglôn lơh dô bă bal mơ làng bol Ammôn mơ làng bol Amalek, bol khai lòt tus brồ lơh Israel mơ tòmpìt ai ƀòn dờng Gòl tơô.

¹⁴Làng bol Israel duh broă Eglôn bơtau Môap tòm jơt phàm nam.

¹⁵Mơya tòm tŭ làng bol Israel rac dan mơ Yàng Jehôwa, gen Kơnràñ tơngguh bol khai in dô nă cau dong tă la Ehut, kòn klau Gera, cau Benjamin, mòng tê kiau. Làng bol Israel sồr khai cèng phan boh dia Eglôn bơtau Môap in.

¹⁶Ehut neh lơh să tòm khai in dô nơm đào bàr đah mat jòng dô tal; khai triau gơ di bơnô đah ma tòm dơlam ào.

¹⁷Gen khai cèng phan boh dia ơn Eglôn in la bơtau Môap, Eglôn la dô nă cau lơmă ngan.

¹⁸Tơnơ̆ mơ tŭ Ehut neh sir ơn phan boh dia, gen khai sồr ală cau tùng phan boh dia hơ̆ lik lòt.

¹⁹Mơya să tòm khai tòm tŭ neh tus di rùp lŭ pac sềr rềp Gilgal, gen khai rê wơl mơ đơs lah: “Ơ bơtau, añ gơs dô jơnau ndơp ndơr kòñ yal is bơtau in.” Bơtau sồr: “Ơm tĕ mŏ mŏ!” Gen jơh ală cau duh broă bơtau lik jơh di tiah.

²⁰Ehut tus hơ bơtau, tŭ hơ̆ khai ơm nggui is tòm ơdŭ mrềt hơđang rkàng hìu ơm rlô khai dê. Ehut đơs lah: “Añ gơs dô jơnau bơh Yàng Tom Trồ nàng yal bơtau in.” Eglôn ntào bơh di tiah nggui khai dê.

²¹Gen Ehut pò tê kiau ai đào bơh di bơnô đah ma mơ srơp di kơndul bơtau dê.

²²Mat đào gơsrơp bluh tus di ngkòi, ngkơr đào gơ mut bal tòm kơndul. Ehut ò tă đào, mơ dơngi gơlềt wơl tiah srơp, mơ phan ƀơ̆ ƀơl gơlik hơ bơdìh.

²³Gen Ehut lik lòt bơh mpồng rơng hìu, khai til ală mpồng ơdŭ hơđang rkàng hìu mơ kal wơl.

²⁴Tơnơ̆ mơ tŭ Ehut neh lik lòt rau, gen ală cau duh broă tus gŏ ală mpồng ơdŭ hơđang rkàng hìu neh kal. Bol khai đơs lah: “Digơlan bơtau neh lòt rlô bòl tòm ơdŭ hơđang rkàng hìu.”

²⁵Bol khai gơn jơl tus di tŭ ò suk ơm; mơya cau bơtau kung òhềt pò ală mpồng ơdŭ hơđang rkàng hìu, gen bol khai ai kai mơ pò jơh ală mpồng; ne cau tòm bol khai dê neh bic chơt di tiah.

²⁶Tòm tŭ bol khai ơm gơn gen Ehut neh dô klàs gan đah ne ală trồm ai lŭ mơ tus hơ Seirah.

²⁷Tòm tŭ khai neh tus tềng hơ̆ rau gen khai uh kơlwòk tòm lơgar mơnơm Epraim; làng bol Israel mù bal mơ khai bơh mơnơm mơ khai lơh gơs cau lam bồ.

²⁸Ehut ai jơnau sồr lah: “Jat tĕ añ, bơh Yàng Jehôwa neh jào tòm tê bol mê ală cau sò tơm bol mê dê la làng bol Môap.” Gen bol khai lòt jat Ehut mơ tòmpìt ai ală tiah thòl hiòng Jordan dê la gùng lòt hơ Môap, mơ bơkơ̆u ò ai cau lơi lòt gan tềng hơ̆.

²⁹Tŭ hơ̆ làng bol Israel tơnchơt pơgap jơt rbô nă cau Môap, jơh bol hơ̆ la cau pràn kơldang, ò gơs dô nă cau klau lơi geh klàs.

³⁰Tòm ngai hơ̆ làng bol Môap gơkòl ơm hơđơm gơnoar at bồ làng bol Israel dê, mơ lơgar geh ơm rlô ring lơngai tòm phàm jơt nam.

³¹Tơnơ̆ mơ Ehut gen gơs Samgar, kòn klau Anat dê; khai ngui dô nơm gai cok kơnrồ mơ tơnchơt prau rhiang nă cau Philistin, mơ khai kung dong tă làng bol Israel sơl.