Read koho Ală Kwang Cahrña 4 Bible Online

Ală Kwang Cahrña 4 - koho bible

Ală Kwang Cahrña 4

¹Tơnơ̆ mơ tŭ Ehut neh chơt, gen làng bol Israel lơh tai bơta iơh bơsak di đap Yàng Jehôwa.

²Behơ̆ Yàng Jehôwa tac bol khai tòm tê Jabin bơtau Kanaan at bồ tòm Hajor. Cau kwang at bồ mpồl ling khai dê la Sisera ơm tòm Harôset Hagôim.

³Bơtau Jabin gơs sin rhiang nơm rơndeh lòs tòmlơh mơ khai neh rồn bơklơn làng bol Israel dô bă iơh bơsak tòm bàr jơt nam, gen làng bol Israel rac dan mơ Yàng Jehôwa dong kòl.

⁴Tŭ hơ̆ Debôra, dô nă cau gơnoar hwơr ùr, bau ùr Lapidôt dê, cahrña làng bol Israel.

⁵Khai òs nggui hơđơm chi gòl tơô Debôra dê, digùl Rama mơ Betel tòm tiah kơh mơnơm Epraim dê; làng bol Israel tus hơ khai nàng khai cahrña.

⁶Debôra sồr jà Barak kòn klau Abinôam bơh Kades tòm Neptali, mơ đơs mơ khai lah: “Yàng Jehôwa la Yàng Tom Trồ Israel dê ai jơnau sồr mê lah: ‘Lòt tĕ, cèng bal mơ mê jơt rbô nă cau klau bơh jơi bơtiàn Neptali mơ bơh jơi bơtiàn Jebulun, mơ lam bol khai tus di mơnơm Thabôr.

⁷Añ rơp chồl Sisera, cau kwang at bồ ling bơtau Jabin dê, bal mơ ală rơndeh lòs tòmlơh mơ ală mpồl ling khai dê lòt tus tìp mơ mê di gah croh Kisôn mơ Añ rơp jào khai tòm tê mê.’”

⁸Barak đơs mơ Debôra lah: “Dilah mò lòt bal mơ añ gen añ rơp lòt; mơya dilah mò ò lòt bal mơ añ gen añ rơp ò lòt.”

⁹Gen Debôra đơs lah: “Di sơl, añ rơp lòt bal mơ mê, mơya tòm gùng lòt tòmlơh do, bơta gơklŏ ò gơrê mơ mê, bơh Yàng Jehôwa rơp jào Sisera tòm tê dô nă cau ùr.” Gen Debôra ñă lòt bal mơ Barak tus hơ Kades.

¹⁰Barak pơjum cau Jebulun mơ Neptali tòm Kades; jơt rbô nă cau ling jat khai, mơ Debôra kung lòt bal mơ khai sơl.

¹¹Mơ tai, Heber cau Kenit neh lik bơh làng bol Kenit la kòn sau Hôbap, po bèp Môise dê, lơh sàl ngài tus hơ Elôn Bejaananim rềp mơ Kedes.

¹²Tòm tŭ cau yal Sisera in git lah Barak kòn klau Abinôam neh guh hơđang mơnơm Thabôr,

¹³gen Sisera pơjum bal jơh sin rhiang nơm rơndeh lòs tòmlơh khai dê mơ jơh ală cau ling ơm bal mơ khai lòt bơh Harôset Hagôim tus hơ croh Kisôn.

¹⁴Debôra đơs mơ Barak lah: “Ñă tĕ! Do la ngai Yàng Jehôwa rơp jào Sisera tòm tê mê. Ngan Yàng Jehôwa lòt lài mơ mê!” Gen Barak mù bơh mơnơm Thabôr, gơs jơt rbô cau ling lòt jat.

¹⁵Tòm tŭ Barak lòt tus gen Yàng Jehôwa sơrbì Sisera mơ jơh ală rơndeh lòs tòmlơh bal mơ jơh mpồl ling khai dê tòm bơta rngòt rngơt di đap Barak; Sisera mù bơh rơndeh lòs tòmlơh khai dê mơ ntoat dô mơ jơng.

¹⁶Barak ting jat ală rơndeh lòs tòmlơh bal mơ mpồl ling tus hơ Harôset Hagôim. Jơh mpồl ling Sisera dê gơkòl tơnchơt mơ đào, ò gam dô nă cau lơi.

¹⁷Sisera ntoat dô mơ jơng tus hơ sàl Jael, bau ùr Heber cau Kenit dê; tài bơh gơs bơta ring lơngai be oh mi digùl Jabin bơtau Hajor dê mơ hìu Heber cau Kenit dê.

¹⁸Jael lik bơh sàl, wă rò Sisera mơ đơs mơ khai lah: “Dah tĕ, ơ yàng, mut tĕ tòm sàl, bañ rngòt!” Gen Sisera mut tòm sàl Jael dê, mơ Jael ai dô blah ồi tơntơ̆ khai in.

¹⁹Sisera đơs mơ khai lah: “Añ tơhìr, dan ai añ in dô êt dà hùc.” Jael pò kơldung gơltau gơs dà toh mơ ai khai in hùc, gen tơntơ̆ ồi wơl khai in.

²⁰Sisera đơs mơ khai lah: “Ntào tĕ di mpồng sàl, dilah gơs cau lơi tus lùp lah: ‘Tềng do gơs cau lơi sơl?’ gen ho tĕ: ‘Ò gơs.’”

²¹Tòm tŭ Sisera bic lơhă ngan tài bơh bòl glar, gen Jael bau Heber ai dô nơm gai jơrmơng sàl dê mơ dô nơm mut, lòt òm tus hơ khai mơ pơng jơrmơng di ping mat Sisera bluh tus tòm ù, behơ̆ khai chơt.

²²Barak ting jat Sisera tus tềng hơ̆, gen Jael lik wă rò khai mơ đơs lah: “Tus tĕ, añ rơp sơnio ồng in cau ồng jòi.” Gen Barak mut tòm sàl; mơ Sisera neh bic chơt gơs jơrmơng pơng bluh ping mat khai dê.

²³Behơ̆ tòm ngai hơ̆ Yàng Tom Trồ lơh Jabin bơtau Kanaan dê, gơkòl alah di đap làng bol Israel.

²⁴Tê làng bol Israel dê sơlo ngai sơlo pràn rlau, tòmdră mơ Jabin bơtau Kanaan, jơl tus di tŭ bol khai neh tơnroh bơtau hơ̆.