Read koho Ală Kwang Cahrña 5 Bible Online

Ală Kwang Cahrña 5 - koho bible

Ală Kwang Cahrña 5

¹Tòm ngai hơ̆ Debôra mơ Barak kòn klau Abinôam đơs bơta đơs chò do:

²“Jòng ro Yàng Jehôwa! Tòm tŭ ală cau kwang at bồ tòm Israel lam mpồl ling lòt tòmlơh, tòm tŭ làng bol chò nùs ơn să bol khai dê.

³Iat tĕ do, ơ ală cau bơtau, ai tồr iat tĕ, ơ ală cau kwang at bồ, ơm iat tĕ! Añ rơp đơs chò Yàng Jehôwa in, añ rơp đơs chò; Añ rơp đơs chò jòng ro Jehôwa Yàng Tom Trồ Israel dê.

⁴Ơ Yàng Jehôwa, tòm tŭ Kơnràñ lik bơh Seir, tòm tŭ Kơnràñ lik lòt bơh di lơgar Edôm, gen ù tiah gơlơnggơr, ală tap trồ dùh mìu dờng, ală mhwal gơtuh dà.

⁵Ală mơnơm gơlơnggơr di đap Yàng Jehôwa, Bơtau Sinai dê, di đap Jehôwa la Yàng Tom Trồ Israel dê.

⁶Tòm ală ngai Samga kòn klau Anat dê, tòm ală ngai Jael dê, ală gùng dờng ngềt ngơt, ală cau lòt gùng lòt jat gùng ƀòn rkwet rkwe.

⁷Ală ƀòn dềt tòm Israel gơkòl sang lòi, jơl tus di tŭ añ la Debôra ñă ntào, kung be dô nă cau mè tòm Israel.

⁸Tòm tŭ bol khai sac rwah ală yàng pa, gen bơta kơlìn gơtoă tus di mpồng ƀòn, mơ cau ò gŏ dô nơm khèl hala dô nơm tà digùl poan jơt rbô nă cau tòm Israel.

⁹Nùs añ ơm bal mơ ală cau kwang dờng at bồ Israel bal mơ ală cau tòm làng bol chò nùs ơn să. Pal jòng ro Yàng Jehôwa!

¹⁰Kơlôi sơnơng tĕ! Ală bol mê la cau hào alàng kò, nggui hơđang ừn lă ồi tu ña; Ơ ală bol mê la cau lòt jơng tòm gùng me.

¹¹Bơh ală sap đơs ală cau đơs chò dê tòm ală tiah bơ̆ dà, bol khai yal wơl bơta pha lin Yàng Jehôwa dê, bơta pha lin ală cau lơh broă tùc tam tòm Israel. Gen làng bol Yàng Jehôwa dê mù tus di ală mpồng ƀòn dờng.

¹²Guh tĕ, guh tĕ, ơ Debôra! Guh tĕ, guh tĕ, đơs dô bơta đơs chò! Guh tĕ, ơ Barak! Kup tĕ ală cau kong alah mê dê, ơ kòn klau Abinôam dê.

¹³Gen ală cau màng ryŭ gam wơl mù tus, làng bol Yàng Jehôwa dê mù tus mơ añ nàng tòmdră mơ ală cau gơnoar pràn.

¹⁴Bơh Epraim gơs ală cau tòm ryas bol khai bơh Amalek, Benjamin lòt jat mê bal mơ oh mi mê. Ală kwang at bồ ling mù tus bơh Makir, ală cau at gai gơnoar at bồ tus bơh Jebulun.

¹⁵Ală cau kwang dờng at bồ Isakar dê lòt bal mơ Debôra; Isakar dòn song mơ Barak, bol khai brồ tus tòm thòng mơ kơndòl jơng, Digùl kòn sau Ruben, gơs oă bơta kơlôi sơwì tòm nùs.

¹⁶Ñchi bơh tài mê ơm dơh wơl digùl wàng belàt, nàng iat sap tơliă hòi mpồl belàt sơl ơ? Digùl jơi bơtiàn Ruben dê, gơs oă bơta kơlôi sơwì tòm nùs.

¹⁷Galaat ơm đah ne hiòng Jordan; mơ Dan, ñchi bơh tài khai ơm wơl bal mơ ală ơhò? Aser ơm nggui wơl di gah dàlềng, ơm tòm ală ù tiah khai dê.

¹⁸Làng bol Jebulun sền òsơp di bơta chơt, Làng bol Neptali kung lơh behơ̆ hơđang ală tiah jơnhoa ƀlàng sre dê.

¹⁹Ală cau bơtau neh tus, bol khai neh tòmlơh; gen ală cau bơtau Kanaan dê tòmlơh tòm Thaanak di gah dà Megidô; bol khai ò tòmpìt geh priă hala phan ndai.

²⁰Ală sơmañ bơh hơđang trồ neh tòmlơh bơh di ală gùng lòt bol gơ dê, bol gơtòmlơh mơ Sisera.

²¹Hiòng dà Kisôn neh cèng pơrdô bol khai, hơ̆ la hiòng dà Kisôn bơh yau. Ơ hwềng soàn añ jê, gơs tĕ bơta pràn kơldang mơ lòt tus tĕ!

²²Gen jơng ơseh nggồr ntoat mhar, ală ơseh jak tòmlơh khai dê ơkhok mhar ngan.

²³Cau gơnrơh Yàng Jehôwa dê đơs lah: ‘Srat rma tĕ Merô, srat rma tĕ làng bol gơ dê dô bă sràt bơtang, tài bơh bol khai ò tus dong Yàng Jehôwa, dong Yàng Jehôwa tòmlơh mơ ală cau pràn kơldang.’

²⁴Lơngai rlau jơh digùl ală cau ùr la Jael, bau Heber cau Kenit, digùl ală cau ùr ơm tòm sàl, khai gơs lơngai rlau jơh.

²⁵Sisera dan dà, Jael ai khai in dà toh; khai ngui jơrlŭ màng mơ ai khai in dơngi dà toh.

²⁶Tê khai at gai sơntơp sàl, tê ma khai at mut cau chài lơh broă, khai pơng Sisera, khai pơng bơcah bồ Sisera dê, Khai pơng bluh ping mat khai dê.

²⁷Sisera gơplơ̆ di jơng Jael; khai gơpừ, ơm bic tềng hơ̆. Di jơng Jael, khai gơplơ̆, khai gơpừ; Di tiah khai gơplơ̆, khai gơpừ chơt.

²⁸Mè Sisera ơm sền bơh di mpồng dềt, bơh đah ngkòi kơrnìng mpồng khai hòi dờng lah: ‘Ñchi bơh tài rơndeh ơseh tòmlơh khai dê òbat tus?’ Ñchi bơh tài ntas ală rơndeh ơseh tòmlơh khai dê òbat tus taih?

²⁹Ală cau jak chài rlau jơh tòm ală cau ùr khai dê ho wơl, ngan khai kung ho wơl să tòm khai in lah:

³⁰‘Ò di bol khai tòmpìt geh mơ tòmpà phan tòmpìt geh ò ơ? Dô nă bàr nă cau ơruh kòp nă cau klau in, Phan tòmpìt geh mơ bài ñòm Sisera in, phan tòmpìt geh mơ bài ñòm jing bơka bàr pang bài ñòm jing bơka nàng war di ngko añ in be phan tòmpìt geh?’

³¹Ơ Yàng Jehôwa, dan jơh ală cau sò tơm di Kơnràñ gơkòl tơnroh behơ̆. Mơya dan ală cau kòñ gơboh di Kơnràñ gen gơlơh kung be mattơngai tòm tŭ gơ àng gơcrà!” Gen lơgar gơs ring lơngai tòm poan jơt nam.