Read koho Ală Kwang Cahrña 6 Bible Online

Ală Kwang Cahrña 6 - koho bible

Ală Kwang Cahrña 6

¹Làng bol Israel lơh bơta iơh bơsak tai di đap Yàng Jehôwa, gen Kơnràñ jào bol khai tòm tê làng bol Midian tòm poh nam.

²Tê cau Midian dê pha rlau mơ Israel, tài bơh cau Midian gen cau Israel lơh he in ală tiah pồn să tòm ală trồm lŭ tòm mơnơm, ală bơtô mơ ală theng kơ̆ cê.

³Tŭ lơi làng bol Israel neh sih kòi, gen làng bol Midian mơ làng bol Amalek, bal mơ ală làng bol đah mattơngai lik guh tòmlơh mơ Israel.

⁴Bol khai lơh sàl tòm lơgar mơ tơnroh jơh ală phan tùc tam, jơl tus hơ tiah ơm rềp Gaja, mơ ò lòi dô nơm phan sa lơi tòm Israel, bulah belàt, kơnrồ hala alàng.

⁵Bơh bol khai guh cèng bal phan poan jơng mơ sàl bol khai dê, tus oă kung be srah nting; bol khai mơ làkđa bol khai dê oă ngan ò jai kòp; bol khai tòmpìt lơgar mơ tơnroh.

⁶Làng bol Midian lơh Israel in gơkòl rƀah dồn sa, gen bol khai rac dan Yàng Jehôwa dong kòl.

⁷Tòm tŭ làng bol Israel rac dan mơ Yàng Jehôwa bơh làng bol Midian,

⁸gen Yàng Jehôwa sồr dô nă cau gơnoar hwơr tus mơ đơs lah: “Jehôwa Yàng Tom Trồ Israel dê đơs be do lah: ‘Añ neh lam bol mê lik bơh di lơgar Ejiptơ, lik bơh di lơgar bol mê ơm dĭ,

⁹Añ neh tă tơlik bol mê bơh tê cau Ejiptơ dê mơ bơh di tê jơh ală cau rồn bơklơn bol mê. Añ neh ting bơtrơh bol khai bơh di đap bol mê, mơ ai bol mê in lơgar bol khai dê.

¹⁰Añ neh đơs mơ bol mê lah: “Añ la Jehôwa Yàng Tom Trồ bol mê dê, bol mê bañ duh khoai ală yàng ală làng bol Amôr dê tòm lơgar lơi bol mê ơm,” mơya bol mê ò bài ơn tồr iat jơnau Añ jê.’”

¹¹Tŭ hơ̆ cau gơnrơh Yàng Jehôwa dê tus nggui di tòm cha tòm Ôphra gơrê bal mơ Jôas cau Abiejrit, kòn klau khai dê la Gideôn ơm pòng kòi tòm tiah pat tơrnòm nàng pồn gơ bơh di làng bol Midian.

¹²Cau gơnrơh Yàng Jehôwa dê tơlik mat mơ khai, mơ đơs lah: “Ơ cau ling jak pràn kơldang, Yàng Jehôwa ơm bal mơ mê.”

¹³Gideôn đơs lah: “Mơya ơ ồng, dilah Yàng Jehôwa ơm bal mơ bol hi gen ñchi bơh tài ală bơta do neh gơ tus di bol hi taih? Ntềng đah ală bơta crih crài Kơnràñ dê mơ ală ồng pàng bol hi dê neh yal wơl mơ lah: ‘Hơ̆ ò di la Yàng Jehôwa neh cèng bol hi lik bơh lơgar Ejiptơ ò ơ?’ Mơya tŭ do Yàng Jehôwa neh sang lòi bol hi mơ neh jào phi bol hi tòm tê làng bol Midian.”

¹⁴Yàng Jehôwa wơlke mơ đơs mơ khai lah: “Lòt tĕ mơ ngui bơta pràn kơldang mê gơs nàng dong tă Israel bơh di tê Midian; do Añ sồr mê lòt.”

¹⁵Gideôn lùp lah: “Mơya ơ Kơnràñ, mbe añ rgơi dong tă Israel taih? Mpồl añ la lơbơn òsô rlau jơh tòm jơi bơtiàn Manase, mơ añ la dềt rlau jơh tòm hìu nhă añ jê.”

¹⁶Yàng Jehôwa ho wơl mơ khai lah: “Añ rơp ơm bal mơ mê, mơ mê rơp lơh alah jơh ală cau Midian.”

¹⁷Gideôn ho wơl lah: “Dilah añ geh bơta nđàc di đap Kơnràñ, dan ai añ in dô nơm tềl sơnio lơh cơng la Kơnràñ neh đơs mơ añ.

¹⁸Dan Kơnràñ bañ lik lòt bơh di tiah do jơl tus di tŭ añ rê wơl mơ cèng bal phan ơn añ jê mơ ơn di đap Kơnràñ.” Yàng Jehôwa đơs lah: “Añ rơp gơn tềng do jơl tus di tŭ mê rê wơl.”

¹⁹Behơ̆, Gideôn mut tòm hìu mơ lơh poac dô nơm be kòn, ai dô thùng kơmbuh phe mơ lơh ală piang lă dềt ò gơs kañ. Khai ơn poac tòm bài mơ dà poac tòm glah, lồc behơ̆ khai cèng ơn ală phan hơ̆ Kơnràñ in di tòm cha.

²⁰Cau gơnrơh Yàng Tom Trồ dê đơs mơ khai lah: “Ai tĕ poac mơ ală piang lă ò gơs kañ mơ ơn hơđang lŭ do, lồc behơ̆ tuh dà poac hơđang gơ.” Gideôn lơh jat behơ̆.

²¹Gen cau gơnrơh Yàng Jehôwa dê yơr cồng gai jra Kơnràñ at tòm tê mơ tup di poac mơ ală piang lă ò gơs kañ. Ồs gơlik bơh di pơnai lŭ, sa pơrguc poac mơ ală piang lă ò gơs kañ; chòp cau gơnrơh Yàng Jehôwa dê roh thit bơh di đap mat khai.

²²Gideôn đal git hơ̆ la cau gơnrơh Yàng Jehôwa dê, gen khai đơs lah: “Ơ Jehôwa Yàng Tom Trồ, dan dong kòl añ! Bơh añ neh gŏ tòm toh mat cau gơnrơh Yàng Jehôwa dê.”

²³Mơya Yàng Jehôwa đơs mơ khai lah: “Kơ̆ tĕ nùs, bañ rngòt, mê rơp ò chơt.”

²⁴Gen Gideôn bơt bơtào tềng hơ̆ dô nơm cơnòng duh khoai Yàng Jehôwa in, mơ tơmoh sơnđan la Jehôwa Salom. Tòm Ôphra ƀòn cau Abiejrit dê cơnòng duh khoai hơ̆ gam tus di ngai do.

²⁵Tòm mang hơ̆, Yàng Jehôwa đơs mơ Gideôn lah: “Kup tĕ kơnrồ dam dơ̆ bàr tòm mpồl phan poan jơng bèp mê dê, hơ̆ la kơnrồ gơs poh nam, sòr tơrlah cơnòng duh khoai Baal tòm hìu bèp mê dê, mơ pòng dơrpă jrong duh khoai Asera di gah gơ.

²⁶Gen bơt tĕ dô nơm cơnòng duh khoai di pal Yàng Jehôwa in la Yàng Tom Trồ mê dê hơđang tiah jơnhoa do: lồc behơ̆ ngui jrong duh khoai Asera lơh lòng mơ mê neh pòng dơrpă nàng chu kơnrồ dam dơ̆ bàr lơh gơs phan ơn chu pơrguc duh khoai.”

²⁷Gen Gideôn ngui jơt nă cau tòm mpồl cau duh broă khai dê mơ lơh jat bơta Yàng Jehôwa neh sồr khai lơh. Mơya tài bơh rngòt di hìu nhă khai dê mơ di ală làng bol tòm ƀòn dờng, gen khai ò lơh bơta hơ̆ tòm trồ ngai mơya lơh gơs tòm trồ mang.

²⁸Tòm tŭ làng bol tòm ƀòn dờng guh bic àng drim, bol khai gŏ cơnòng duh khoai Baal dê neh tơrlah, jrong duh khoai Baal dê neh tơrlah, jrong duh khoai Asera di gah neh gơkòl pòng dơrpă, kơnrồ dơ̆ bàr neh ơn lơh gơs phan ơn chu pơrguc hơđang cơnòng duh khoai pa bơt bơtào.

²⁹Bol khai lùp bal lah: “Ñcau neh lơh bơta do taih?” Tơnơ̆ mơ tŭ bol khai lùp sơwì, gen cau đơs mơ bol khai lah, “Gideôn kòn klau Jôas neh lơh bơta hơ̆.”

³⁰Gen ală cau klau tòm ƀòn dờng đơs mơ Jôas lah: “Lam tơlik tĕ kòn klau mê dê, khai pal chơt tài bơh khai neh sòr tơrlah cơnòng duh khoai Baal dê mơ neh pòng dơrpă jrong duh khoai Asera ơm di gah gơ.”

³¹Mơya Jôas ho mơ mpồl ală cau tòmdră mơ khai lah: “Bol mê kòñ dong tò Baal ơ? Bol mê kòñ dong klàs gơ sơl ơ? Cau lơi bơh gơ mơ tòmlơh gen rơp kòl tơnchơt lài mơ tŭ àng drim. Dilah Baal la dô nă yàng gen lòi gơ dong is să gơtòm tŭ gơs cau lơi lơh tơrlah cơnòng duh khoai gơ dê.”

³²Behơ̆ tòm ngai hơ̆ bol khai sơnđan Gideôn la “Jerubaal” mơ đơs lah: “Lòi tĕ Baal tòmlơh mơ khai,” tài bơh Gideôn neh sòr tơrlah cơnòng duh khoai Baal dê.

³³Tŭ hơ̆ jơh ală cau Midian, cau Amalek mơ ală cau đah mattơngai lik pơjum bal, tiă hiòng Jordan mơ lơh sàl tòm thòng Jejreel.

³⁴Mơya Hwềng Yàng Jehôwa dê mù hơđang Gideôn; khai uh kơlwòk hòi pơjum cau Abiejrit lòt jat khai.

³⁵Khai sồr cau kong sồr lòt làm lơgar Manase, hòi bol hơ̆ lòt tus nàng tòmlơh. Gideôn kung sồr cau lòt tus hơ cau Aser, Jebulun mơ Neptali nàng bol hơ̆ guh tus mơ lơh gơs dô bă bal mơ bol khai.

³⁶Gen Gideôn đơs mơ Yàng Tom Trồ lah: “Nàng sền gŏ gơs Yàng rơp dong tă Israel kơnòm di tê añ, be jơnau Kơnràñ neh đơs,

³⁷gen añ rơp lòt lă dô nơm gơltau sơnò belàt di làn jă kòi; dilah gơs dà mơryuh mìng hơđang gơltau sơnò, ai ù gùt dar rañ rsơh gen añ rơp git lah Kơnràñ rơp ngui tê añ nàng dong tă Israel jat be Kơnràñ neh đơs.”

³⁸Gen gơlik gơs tòm toh behơ̆. Tòm tŭ Gideôn guh gòñ bơh àng drim mơ pat gơltau sơnò belàt, gen gơs bềng dô jơrlŭ dà mơryuh.

³⁹Gideôn đơs tai mơ Yàng Tom Trồ lah: “Dan Yàng bañ gơhào gơjrañ di añ. Dan lòi añ in dan mìng dô dơ̆ do tai. Dan ai gơnoar añ lòng dô dơ̆ tai mơ gơltau sơnò belàt do. Dơ̆ do, dan ai mìng gơltau sơnò belàt rañ rsơh, mơya dà mơryuh gen gơs làm ù gùt dar.”

⁴⁰Tòm mang hơ̆ Yàng Tom Trồ lơh behơ̆. Mìng gơltau sơnò belàt ơm rañ rsơh, mơya làm ù gùt dar gen gơs dà mơryuh.