Read koho Ală Kwang Cahrña 7 Bible Online

Ală Kwang Cahrña 7 - koho bible

Ală Kwang Cahrña 7

¹Gen Jerubaal, hơ̆ la Gideôn, bal mơ jơh ală mpồl ling jat guh bơh drim, lơh sàl di gah croh dà Harôt; mơ sàl cau Midian dê ơm đah đang bol khai, tòm thòng di gah dòr Môre.

²Yàng Jehôwa đơs mơ Gideôn lah: “Ală cau ơm bal mơ mê la gal ir Añ in nàng Añ jào làng bol Midian tòm tê bol khai, bơh Israel rơp ò dòn kơnòm di Añ, mơ đơs lah: ‘Tê tòm añ dê neh dong tă añ.’

³Gen tàng, tŭ do yal tơnggit tĕ jơnau do di tồr mpồl ling in lah: ‘Cau lơi rngòt rơm să gen lòi tĕ khai rê hìu!’” Behơ̆ Gideôn neh nggum bol khai. Bàr jơt bàr rbô nă cau rê hìu mơ jơt rbô nă gam wơl.

⁴Yàng Jehôwa đơs mơ Gideôn lah: “Khà cau gam oă ir, lam tĕ bol khai mù di gah dà, gen Añ rơp lòng bol khai tềng hơ̆. Dilah cau lơi Añ đơs mơ mê lah: ‘Khai lòt tĕ mơ mê,’ gen khai rơp lòt mơ mê. Ai cau lơi Añ đơs mơ mê lah: ‘Khai ò di lòt mơ mê,’ gen cau hơ̆ rơp ò geh lòt.”

⁵Behơ̆ Gideôn lam mpồl ling mù tus di gah dà. Gen Yàng Jehôwa đơs mơ Gideôn lah: “Ală cau liap dà mơ lơmpiat, be so liap, gen ơn is tĕ bol khai dô đah; ală cau cùn gơltang ai tê bơ̆ dà cèng tus di bơr nàng hùc, gen mê pal ơn is dô đah ndai.”

⁶Khà ală cau ai tê bơ̆ dà hùc la pe rhiang nă, ai jơh ală cau ndai gen cùn gơltang mơ hùc.

⁷Gen Yàng Jehôwa đơs mơ Gideôn lah: “Bơh pe rhiang nă neh ai tê bơ̆ dà liap Añ rơp dong tă mê, mơ Añ rơp jào cau Midian tòm tê mê. Lòi tĕ jơh ală cau ndai rê hìu bol khai dê.”

⁸Behơ̆ Gideôn tă ală gri, mơ ală kơlwòk bơh di tê ală cau ling, mơ sồr jơh ală cau Israel gam wơl rê hơ sàl bol khai dê; mơya pe rhiang nă cau ne gen ơm wơl. Mơ sàl cau Midian dê ơm tòm thòng hơđơm khai.

⁹Kung tòm mang hơ̆ Yàng Jehôwa đơs mơ Gideôn lah: “Guh tĕ, brồ lơh sàl Midian dê; bơh Añ neh jào gơtòm tê mê.

¹⁰Mơya dilah mê rngòt brồ lơh gơ, gen mù tĕ hơ tiah lơh sàl bal mơ Phura cau duh broă mê dê,

¹¹mơ mê rơp kơno jơnau bol khai đơs. Tơnơ̆ hơ̆ tê mê rơp geh pràn kơldang nàng brồ lơh sàl bol khai dê.” Behơ̆ khai mơ Phura cau duh broă khai dê mù hơ tiah sơnròp gơs cau ling kơp gàr sàl cau Midian dê.

¹²Làng bol Midian, làng bol Amalek bal mơ ală làng bol bơh đah mattơngai lik ơm tòm thòng gal ngan gơlơh kung be srah nting. Làkđa bol khai dê oă ò git nđò, ò rgơi kòp kung be bràs di gah dàlềng.

¹³Tòm tŭ Gideôn tus tềng hơ̆ di di tŭ gơs dô nă cau yal bơta mpau cau bơyô khai in mơ đơs lah: “Añ neh gŏ dô bơta mpau, gơs dô nơm piang lă kòi mac gơpơrlă tus di tiah sàl Midian dê, gơ tơm mut tòm sàl dô bă pràn kơldang ngan tian gơs sàl gơpừ sơrklup mơ tơrlah.”

¹⁴Gen cau bơyô khai ho lah: “Hơ̆ ò gơs bơta lơi ndai rlau mơ đào Gideôn kòn klau Jôas dê, cau Israel. Yàng Tom Trồ neh jào làng bol Midian bal mơ jơh mpồl ling tòm tê khai dê.”

¹⁵Tòm tŭ Gideôn neh kơno bơh bơta mpau mơ jơnau gơtha gơ dê, gen khai duh khoai Yàng Tom Trồ. Lồc behơ̆ khai rê wơl hơ sàl Israel dê mơ đơs lah: “Guh tĕ! Bơh Yàng Jehôwa neh jào mpồl ling Midian tòm tê bol mê dê.”

¹⁶Tơnơ̆ mơ tŭ khai neh cah pe rhiang nă cau klau hơ̆ tòm pe mpồl, mơ ơn kơlwòk tòm tê kòp nă in, gri gòi mơ sơmpòl ồs tòm kòp nơm gri.

¹⁷Gideôn đơs mơ bol khai lah: “Sền tĕ di añ mơ lơh tòm toh be añ lơh, tòm tŭ añ tus hơ bơdìh sàl cau Midian dê gen bol mê lơh tĕ be bơta añ lơh.

¹⁸Tòm tŭ añ mơ ală cau lòt bal mơ añ uh kơlwòk gen bol mê kung uh kơlwòk làm gùt dar sàl mơ driau dờng lah: ‘Bơh Yàng Jehôwa mơ bơh Gideôn!’”

¹⁹Behơ̆ Gideôn mơ dô rhiang nă cau ling lòt bal mơ khai tus hơ bơdìh sàl cau Midian dê, di tŭ sơntòm kơp gàr nggùl mơnang, tơnơ̆ mơ tŭ pa tòmgơl cau ling kơp gàr. Bol khai uh kơlwòk mơ jan bơcah gri tòm tê bol khai dê.

²⁰Gen pe mpồl ne uh kơlwòk mơ jan bơcah gri. Tê kiau bol khai at gri ồs, mơ tê ma bol khai at kơlwòk nàng uh; bol khai driau dờng lah: “Đào Yàng Jehôwa dê mơ đào Gideôn dê!”

²¹Kòp nă ñă ntào tòm tiah he dê jơh gùt dar sàl, gen jơh ală cau ơm tòm sàl ntoat lik, cau Midian nggà driau dờng mơ ntoat dô.

²²Tòm tŭ bol khai neh uh pe rhiang nơm kơlwòk, gen Yàng Jehôwa lơh kòp nă tòm mpồl ling Midian dê ai đào tơnchơt gơp he mơ tòmdră wơl mơ jơh mpồl ling. Mpồl ling bol khai dê dô tus hơ Betsita đah Jerera jơl tus hơ nhàr Abel Mehôla di gah Tabat.

²³Cau Israel geh hòi tus bơh jơi bơtiàn Neptali, Aser mơ Manase, bol khai ting jat cau Midian.

²⁴Gen Gideôn sồr cau kong sồr lòt làm tiah lơgar kơh mơnơm Epraim dê mơ đơs lah: “Mù tĕ tòmlơh mơ làng bol Midian mơ tòmpìt ală hiòng dà nàng tòmdră mơ bol khai, jơl tus hơ Betbara mơ hiòng Jordan sơl.” Behơ̆ jơh ală cau Epraim geh hòi lik lòt ơm kơp bơh hiòng Jordan tus hơ Betbara.

²⁵Bol khai kup geh bàr nă cau kwang at bồ Midian dê la Ôrep mơ Jeep. Bol khai tơnchơt Ôrep di pơnai lŭ Ôrep mơ Jeep di tiah pat tơrnòm Jeep, bol khai ting jat làng bol Midian mơ cèng bồ Ôrep mơ Jeep tus hơ Gideôn đah ne hiòng Jordan.