Read koho Ală Kwang Cahrña 8 Bible Online

Ală Kwang Cahrña 8 - koho bible

Ală Kwang Cahrña 8

¹Cau Epraim đơs mơ Gideôn lah: “Ñchi bơta mê neh lơh di bol hi taih? Mê ò hòi bol hi tòm tŭ mê lòt tòmlơh mơ làng bol Midian taih?” Mơ bol khai đơs iơh di khai dô bă kơnjơ̆ ngan.

²Mơya Gideôn ho bol khai lah: “Ñchi bơta añ neh lơh tồ rgơi pơndròm mơ ală oh mi taih? Bơta dòñ plai ño Epraim dê ò di la lin rlau mơ kơnhai pic plai ño Abiejrit dê ò ơ?

³Yàng Tom Trồ neh jào tòm tê oh mi bàr nă cau at bồ Midian dê la Ôrep mơ Jeep; ñchi añ neh rgơi lơh nàng pơndròm mơ oh mi taih?” Tòm tŭ khai đơs behơ̆ gen bơta gơjrañ tòmdră bol khai dê gơ mù wơl.

⁴Gen Gideôn tus mơ tiă gan hiòng Jordan, khai bal mơ pe rhiang nă cau jat khai, bòl glar òsô tai mơ jơgloh ngan.

⁵Behơ̆ khai đơs mơ cau Sukôt lah: “Dan pà mpồl ling añ in dô êt piang lă; bol khai bòl glar òsô tai; mơ añ gam ting jat Jeba mơ Jalmuna, bàr nă cau bơtau Midian dê.”

⁶Mơya ală cau kwang ƀòn Sukôt đơs lah: “Mê neh geh Jeba mơ Jalmuna tòm tê mê rau sơl? Gen tàng bol hi pal pà piang lă mpồl ling mê in taih?”

⁷Gideôn ho bol khai lah: “Di behơ̆, tòm tŭ Yàng Jehôwa neh jào phi Jeba mơ Jalmuna tòm tê añ rau, añ rơp ai gai lò tòm ƀlàng bràs mơ pù tac poac bol mê.”

⁸Bơh tềng hơ̆ khai guh tus hơ Penuel mơ kung dan behơ̆ mơ bol hơ̆, mơya cau Penuel ho khai kung be cau Sukôt neh ho sơl.

⁹Behơ̆ khai đơs mơ cau Penuel lah: “Tòm tŭ añ geh pha lin mơ rê wơl, añ rơp lơh tơrlah theng do.”

¹⁰Tŭ hơ̆, Jeba mơ Jalmuna ơm tòm Karkôr bal mơ mpồl ling bol khai dê pơgap jơt pram rbô nă, hơ̆ la jơh ală cau gam wơl tòm mpồl ling ală cau đah mattơngai lik dê: dô rhiang bàr jơt rbô nă cau at phan tòmlơh neh kong tơnchơt.

¹¹Behơ̆, Gideôn guh jat gùng me ală cau lòt kă bro đah mattơngai lik Nôba mơ Jôkbeha dê mơ brồ lơh mpồl ling, bơh mpồl ling bol khai ò gơs cau kơp gàr.

¹²Jeba mơ Jalmuna ntoat dô, mơya Gideôn ting jat mơ kup bàr nă bơtau cau Midian dê, Jeba mơ Jalmuna bal mơ jơh mpồl ling bol khai dê gơdùh tòm bơta rngòt rngơt.

¹³Tòm tŭ Gideôn kòn klau Jôas dê rê bơh bơta tòmlơh jat gùng kơh mơnơm Heres.

¹⁴Khai kup dô nă cau pơnu ƀòn Sukôt dê, mơ khào lùp khai; mơ cau pơnu hơ̆ cih khai in sơnđan poh jơt poh nă ală cau kwang mơ ală cau kwang kra ƀòn Sukôt dê.

¹⁵Gen Gideôn tus hơ cau Sukôt mơ đơs lah: “Do la Jeba mơ Jalmuna mơ bol mê neh lah sơrpah di añ lah: ‘Mê gơs Jeba mơ Jalmuna tòm tê mê dê rau sơl? Gen tàng bol hi pal ai piang lă ală cau bòl glar òsô mê in taih?’”

¹⁶Mơ khai kup ală kwang kra ƀòn dờng dê mơ ai gai lò tòm ƀlàng ngềt ngơt pù lơh mơ bơto tơmàl làng bol tòm Sukôt.

¹⁷Khai kung lơh tơrlah theng Penuel mơ tơnchơt ală cau klau ƀòn hơ̆ dê.

¹⁸Gen khai đơs mơ Jeba mơ Jalmuna lah: “Ală cau bol mê neh tơnchơt tòm Thabôr la cau mbe lơi taih?” Bol khai ho lah: “Bol khai kung be mê, kòp nă tòm bol khai gơlơh be kòn klau bơtau dê.”

¹⁹Gideôn đơs lah: “Bol khai la ală oh mi añ jê, ală kòn klau mè añ jê. Di ngan be Yàng Jehôwa kis sùm, dilah bol mê neh lòi bol khai in kis, gen añ rơp ò tơnchơt bol mê.”

²⁰Gen Gideôn đơs mơ Jether kòn tơnhoa khai dê lah: “Tơnchơt tĕ bol khai.” Mơya Jether ò tă đào, khai rngòt tài bơh khai gam kơnòm dềt.

²¹Jeba mơ Jalmuna đơs lah: “Să tòm mê tus tĕ mơ tơnchơt bol hi; bơh cau be lơi gen bơta pràn kơldang khai dê la behơ̆.” Gen Gideôn cơnđòa tus hơđap mơ tơnchơt Jeba mơ Jalmuna; khai tă ai glàng rùp mat kơnhai lồi bơh di ngko làkđa bol khai dê.

²²Gen cau Israel đơs mơ Gideôn lah: “At bồ tĕ bol hi, ồng, kòn mơ sau ồng di sơl, tài bơh ồng neh dong tă bol hi klàs bơh di làng bol Midian.”

²³Gideôn đơs mơ bol khai lah: “Añ rơp ò at bồ bol mê, kòn klau añ kung ò at bồ bol mê sơl. Yàng Jehôwa rơp at bồ bol mê.”

²⁴Gen Gideôn đơs mơ bol khai lah: “Añ gơs dô bơta kòñ dan mơ bol mê; hơ̆ la dan kòp nă tòm bol mê ai tĕ añ in ală bơno tồr mơ bol mê neh phà kup geh.” (Cau Ismael gơs bơta òs mòng blo bơno mơ màh).

²⁵Bol khai ho lah: “Bol hi niam nùs ai ală bơno tồr ồng in.” Behơ̆ bol khai lă dô blah ồi mơ kòp nă sơrbì tòm ồi hơ̆ dô nơm bơno mơ bol khai neh tòmpìt geh.

²⁶Ală bơno mơ màh Gideôn neh dan hơ̆ kơr gơs dô rbô poh rhiang sieklơ màh, ò kòp ală phan bơka să, phan wan dê ngko, mơ ồi ào dà gur mơ ală cau bơtau Midian òs soh, bal mơ ală grồng yồng di ngko làkđa bol khai dê.

²⁷Gideôn ai phan hơ̆ lơh dô nơm Ephot, ơn gơtòm Ôphra, ƀòn khai dê. Tềng hơ̆ jơh Israel duh khoai gơ, mơ gơ gơlik gơs dô nơm dă Gideôn mơ hìu nhă khai in.

²⁸Behơ̆ làng bol Midian pal ơm hơđơm gơnoar at bồ làng bol Israel dê; bol khai ò geh pò bồ tai. Behơ̆ lơgar geh ơm rlô lơngai tòm poan jơt nam tòm rài Gideôn.

²⁹Jerubaal kòn klau Jôas rê ơm tòm hìu tòm khai dê.

³⁰Khai gơs poh jơt nă kòn klau, tài bơh khai gơs oă bau.

³¹Bau cồng khai dê ơm tòm Sicem kung deh khai in dô nă kòn klau, Gideôn sơnđan khai la Abimelek.

³²Gideôn kòn klau Jôas chơt kra ngan. Cau tơp khai tòm bơtô ƀồc Jôas bèp khai dê tòm ƀòn Ôphra làng bol Abiejrit dê.

³³Dô êt jŏ tơnơ̆ mơ tŭ Gideôn neh chơt, làng bol Israel duh khoai ală Baal wơl, mơ bơtào Baal Berit lơh gơs yàng bol khai dê.

³⁴Bol khai ò kah Jehôwa Yàng Tom Trồ bol khai dê la Bơtau neh dong tă bol khai bơh tê ală cau sò tơm ơm làm gùt dar.

³⁵Bol khai kung ò kah bơta nđàc gơwèt hơ hìu nhă Jerubaal dê (hơ̆ la Gideôn) bơh ală bơta niam khai neh lơh gơwèt hơ làng bol Israel.