Read koho Ală Kwang Cahrña 9 Bible Online

Ală Kwang Cahrña 9 - koho bible

Ală Kwang Cahrña 9

¹Abimelek, kòn klau Jerubaal, lòt tus hơ Sicem tus hơ ală oh mi mè khai dê mơ jơh ală mpồl hìu nhă mè khai dê, mơ đơs mơ bol khai lah:

²“Đơs tĕ di tồr jơh ală cau Sicem lah: ‘Ñchi la niam rlau bol mê in: gơs jơh poh jơt nă kòn klau Jerubaal at bồ bol mê, hala gơs mìng dô nă lơm at bồ bol mê?’ Kah tĕ añ la poac mhàm bol mê dê.”

³Behơ̆ ală oh mi đah mè khai dê yal wơl ală jơnau hơ̆ cau Sicem in mơ nùs bol khai gơsơrkềng đah Abimelek, tài bơh bol khai đơs lah: “Khai la oh mi he dê.”

⁴Bol khai ai khai in poh jơt sieklơ priă bơh di hìu duh khoai Baal Berit, Abimelek ai priă hơ̆ ơpah cau gơlềng gơlàng lòt jat khai.

⁵Gen khai lòt tus hơ hìu bèp khai dê tòm Ôphra, mơ hơđang dô nơm pơnai lŭ khai tơnchơt poh jơt nă oh mi khai dê, hơ̆ la ală kòn klau Jerubaal dê. Mơya Jôtham, kòn klau put Jerubaal dê klàs chơt tài bơh khai pồn să.

⁶Gen jơh làng bol Sicem mơ Bet Milô pơjum bal di gah tòm cha dờng, di jrong lŭ kirsơnre ƀòn Sicem dê nàng bơtào Abimelek gơs bơtau.

⁷Tòm tŭ cau yal Jôtham in jơnau hơ̆, gen khai guh ntào hơđang bồ mơnơm Gerijim mơ đơs dờng lah: “Ơ ală cau Sicem, iat tĕ añ, nàng Yàng Tom Trồ kung iat bol mê.

⁸Ală chi neh lik lòt bong mơñà dô bơtau bol gơ in, bol gơ đơs mơ chi ôlibe lah: ‘At bồ tĕ hơđang bol hi.’

⁹Mơya chi ôlibe đơs mơ bol khai lah: ‘Añ rơp sang mơñà kas màng añ jê Bơh gơ mơ ală yàng mơ kòn mơnus geh sền dờng màng nàng lòt dung dài hơđang ală chi ơ?’

¹⁰Gen ală chi đơs mơ tòm chi ƀal lah: ‘Tus tĕ at bồ hơđang bol hi!’

¹¹Mơya tòm chi ƀal đơs mơ bol gơ lah: ‘Añ rơp sang ală plai niam mơ lơngồt ngan añ jê nàng lòt lơh dơrcul hơđang ală chi ơ?’

¹²Gen ală chi đơs mơ tòm ño lah: ‘Tus tĕ at bồ hơđang bol hi!’

¹³Mơya tòm ño đơs mơ bol gơ lah: ‘Añ rơp sang lòi tơrnòm ño añ jê la bơta lơh chò hòp ală yàng mơ kòn mơnus in nàng lòt tơnwañ hơđang ală chi ơ?’

¹⁴Behơ̆, jơh ală chi đơs mơ tòm lò lah: ‘Tus tĕ at bồ hơđang bol hi!’

¹⁵Tòm lò đơs mơ ală chi lah: ‘Dilah bơh nùs dòn song bol mê kòñ bong mơñà añ nàng lơh bơtau hơđang bol mê, gen tus tĕ kìng crŭ tòm mƀur añ, mơya dilah ò gen dan ồs lik bơh tòm lò chu jơh ală nho rề Liban dê!’

¹⁶Gen tàng tŭ do, dilah bol mê neh lơh dô bă di pal mơ bơh nùs song ngan tòm tŭ bol mê pồ bơtào Abimelek gơs bơtau, mơ dilah bol mê neh gơwèt niam mơ Jerubaal mơ hìu nhă khai dê, mơ dilah bol mê neh lơh khai in jat be bơta khai pal dòp,

¹⁷bơh bèp añ neh tòmlơh bol mê in, neh phi să khai mơ dong tă bol mê bơh tê làng bol Midian.

¹⁸Mơya ngai do bol mê neh tòmdră mơ hìu nhă bèp añ jê, mơ neh tơnchơt poh jơt nă kòn klau khai dê hơđang dô pơnai lŭ, mơ neh pồ bơtào Abimelek kòn klau dĭ ùr khai dê, gơs bơtau at bồ làng bol Sicem, tài bơh khai la oh mi bol mê dê.

¹⁹Dilah ngai do bol mê neh lơh dô bă di pal mơ bơh nùs song ngan gơwèt mơ Jerubaal mơ hìu nhă khai dê gen dan Abimelek gơlik bơta hòn chò bol mê in, mơ dan khai in kung geh hòn chò di bol mê.

²⁰Mơya dilah ò, dan ồs lik bơh Abimelek chu pơrguc làng bol Sicem mơ Bet Milô, mơ dan ồs lik bơh bol mê la làng bol Sicem mơ Bet Milô chu pơrguc Abimelek.”

²¹Gen Jôtham dô, lòt tus hơ Beer ơm wơl tềng hơ̆, bơh khai rngòt di bi khai dê la Abimelek.

²²Tơnơ̆ mơ tŭ Abimelek neh at bồ tòm Israel pe nam,

²³Yàng Tom Trồ sồr dô nơm hwềng iơh digùl Abimelek mơ cau Sicem; gen làng bol Sicem pơrlơ̆ dră di Abimelek.

²⁴Bơta do neh gơlik gơs, hơ̆ la bơh bơta neh lơh iơh di poh jơt nă kòn klau Jerubaal dê pal geh sal wơl, mơ mhàm bol khai dê tuh wơl hơđang bi bol khai dê la Abimelek la cau neh tơnchơt bol khai, mơ hơđang làng bol Sicem, la ală cau neh lơh pràn tê khai tơnchơt ală oh mi khai dê.

²⁵Behơ̆, kòñ tòmdră mơ khai, làng bol Sicem sồr cau lòt kơp òm hơđang bồ mơnơm nàng phà kơñau jơh ală cau lòt gan gùng hơ̆, mơ bơta hơ̆ geh yal tơnggit Abimelek in.

²⁶Tŭ hơ̆ Gaal kòn klau Ebet, tus bal mơ ală oh mi khai dê mơ mut ơm tòm ƀòn Sicem. Làng bol Sicem gơs nùs dòn kơnòm dê khai.

²⁷Bol khai lik lòt tòm suơn nàng pic plai ño, pat plai ño tòm suơn ño bol khai dê, mơ lơh dô bơta ñô sa. Bol khai mut tòm hìu yàng bol khai dê, sa mơ ñô mơ bơrsèl tơnhial di Abimelek.

²⁸Mơ Gaal kòn klau Ebet dê đơs lah: “Abimelek la ñcau, mơ Sicem la ñcau mơ bol he pal duh broă khai in taih? Ò di kòn klau Jerubaal, mơ Jebul la cau duh broă ală cau klau Hamor bèp Sicem dê taih? Ñchi bơh tài bol he pal duh broă Abimelek taih?

²⁹Dilah mìng gơs làng bol do ơm tòm gơnoar sồr añ jê, gen añ rơp ting bơtrơh Abimelek. Añ rơp đơs mơ Abimelek lah: ‘Hòi pơjum bơtơl tĕ mpồl ling mê dê nàng lik tòmlơh!’”

³⁰Tòm tŭ Jebul cau kwang at bồ ƀòn kơno ală jơnau Gaal kòn klau Ebet dê, gen gơhào gơjrañ ngan.

³¹Gen khai sồr cau kong sồr lòt tus hơ Abimelek mơ đơs lah: “Do Gaal kòn klau Ebet mơ ală oh mi khai dê neh tus tòm Sicem mơ bol khai chồl bơtrut ƀòn dờng bơtào tòmdră mơ ồng.

³²Behơ̆ tòm mang do, dan ồng mơ ală cau bal mơ ồng ñă lòt tus ơm kơp tòm ƀlàng.

³³Àng drim hìng, tòm tŭ mattơngai lik, ntào brồ lơh ƀòn dờng. Tòm tŭ Gaal mơ cau khai dê lik tòmlơh mơ ồng gen ồng lơh tĕ di bol khai jat be ồng rgơi lơh.”

³⁴Behơ̆ Abimelek mơ jơh mpồl ling khai dê ñă tòm mang, cah gơs poan bơnòr, mơ lòt kơp tòm ƀlàng rềp ƀòn Sicem.

³⁵Gaal kòn klau Ebet dê lik ntào dê mpồng mut tòm ƀòn di di tŭ Abimelek mơ jơh mpồl ling jat khai lik bơh tiah ơm kơp bol khai dê.

³⁶Tòm tŭ Gaal gŏ mpồl ling hơ̆, gen khai đơs mơ Jebul lah: “Sền ne gơs cau mù bơh di ală bồ mơnơm!” Jebul ho khai lah: “Mê gŏ mƀur ală mơnơm mơ tồnlah cau gơ dê.”

³⁷Mơya Gaal đơs tai lah: “Sền ne, làng bol mù bơh Tabur Eres mơ gơs dô mpồl ling mù song bơh di Elôn Meonenim.”

³⁸Gen Jebul đơs mơ khai lah: “Ntềng đah bơta jòng să mê dê, la cau neh đơs lah: ‘Abimelek la ñcau mơ bol he pal duh broă khai in taih?’ Mpồl cau do ò di la cau mơ mê neh dơñŏ tơnhial ò ơ? Lik tĕ tòmlơh mơ bol khai!”

³⁹Gen Gaal lam làng bol Sicem lik lòt tòmlơh mơ Abimelek.

⁴⁰Abimelek ting jat Gaal, mơ khai dô bơh di đap Abimelek, gơs oă cau kong sồt gơplơ̆ tòm gùng guh hơ mpồng ƀòn dờng.

⁴¹Behơ̆ Abimelek ơm tòm Aruma, ai Jebul ting bơtrơh Gaal bal mơ ală oh mi khai dê, gen tàng bol khai ò rgơi ơm tòm ƀòn dờng Sicem tai.

⁴²Ngai hìng làng bol Sicem lik lòt tòm ƀlàng; gơs cau lòt yal Abimelek in git.

⁴³Behơ̆ khai pơjum mpồl ling khai dê mơ cah gơs pe bơnòr mơ lòt kơp òm tòm ƀlàng. Tòm tŭ khai gŏ làng bol lik bơh ƀòn dờng gen khai ñă brồ lơh bol khai.

⁴⁴Abimelek mơ ală mpồl ling bal mơ khai lòt tus hơđap mơ ntào di mpồng mut tòm ƀòn dờng; ai bàr mpồl ne tòmlơh mơ ală cau tòm ƀlàng mơ tơnchơt bol khai.

⁴⁵Tòm jơh dô ngai hơ̆, Abimelek brồ lơh ƀòn dờng tus di tŭ pìt geh gơ mơ tơnchơt làng bol ơm tòm hơ̆, lồc behơ̆ khai lơh tơrlah ƀòn dờng mơ rsìh boh hơđang gơ.

⁴⁶Kơno bơta hơ̆, làng bol ơm tòm theng Sicem mut tòm theng kơ̆ cê hìu duh khoai yàng El Berit dê.

⁴⁷Tòm tŭ Abimelek neh kơno lah làng bol neh pơjum tơrgòm tềng hơ̆,

⁴⁸gen khai mơ jơh ală cau bal mơ khai guh hơđang mơnơm Jalmôn. Khai at dô nơm sùng mơ koh dô êt ntê chi mơ tui gơ di pơnì. Khai ai jơnau gơnoar sồr cau bal mơ khai lah: “Mhar! Lơh jat tĕ bơta bol mê neh gŏ añ lơh.”

⁴⁹Behơ̆ jơh tơl nă koh ntê chi mơ lòt jat Abimelek. Bol khai rơndap ntê chi hơ̆ di jơng theng kơ̆ cê mơ ai ồs chu bal mơ ală cau ơm tòm hơ̆. Behơ̆ jơh ală cau ơm tòm theng Sicem chơt jơh, pơgap dô rbô nă cau klau mơ cau ùr.

⁵⁰Tơnơ̆ mơ hơ̆ Abimelek lòt tus hơ Thebes, sơntơp sàl tòmdră mơ pìt geh gơ.

⁵¹Mơya tòm ƀòn dờng gơs dô nơm theng jơnhoa kơ̆ cê, mơ jơh ală cau klau mơ cau ùr tòm ƀòn dờng dô mut tềng hơ̆. Bol khai kal mpồng theng hơ̆ mơ guh hơđang rkàng theng.

⁵²Abimelek tus hơ theng nàng tòmlơh. Mơya tòm tŭ khai tus rềp dê mpồng nàng chu gơ,

⁵³mơya nisơna gơs dô nă cau ùr sơrbì dô nơm mpal lŭ di di bồ Abimelek, bơcah ntìng bồ khai dê.

⁵⁴Tŭ hơ̆ mo, khai hòi cau ling at pềs tà khai dê mơ đơs lah: “Tă tĕ đào mê mơ tơnchơt añ, nàng cau ò rgơi đơs lah: ‘Dô nă cau ùr neh tơnchơt khai.’” Behơ̆ cau duh broă khai dê srơp khai mơ khai chơt.

⁵⁵Tòm tŭ cau Israel gŏ Abimelek neh chơt rau gen kòp nă bol khai rê hìu he dê.

⁵⁶Behơ̆ Yàng Tom Trồ sal wơl bơta iơh bơsak mơ Abimelek bơh bơta tìs glài khai neh tòmdră mơ bèp khai dê, hơ̆ la tơnchơt poh jơt nă oh mi khai dê.

⁵⁷Yàng Tom Trồ kung lơh jơh ală bơta iơh bơsak làng bol Sicem dê gơtuh wơl hơđang bồ bol khai dê. Bơta srat rma Jôtham kòn klau Jerubaal dê neh gơlik di ngan hơđang bol khai.