Read koho II Jang 1 Bible Online

II Jang 1 - koho bible

II Jang 1

¹Jang la kwang kra pơyoa mò in la cau geh sac rwah bal mơ ală kòn mò dê mơ añ kòñ gơboh jơh nùs, ò di mìng añ lơm ò, mơya jơh tơl nă cau git jơnau song kung kòñ gơboh sơl;

²Tài bơh jơnau song ơm tòm bol he, mơ rơp ơm bal mơ bol he sùm sùm:

³Dan bơta nđàc, bơta nđàc sơngit, bơta lơngap lơngai bơh Yàng Tom Trồ la Bèp, mơ bơh Yàng Jesu Krist la Kòn Bèp dê, rơp ơm bal mơ bol he tòm jơnau song mơ bơta kòñ gơboh.

⁴Añ gơs nùs hòn chò ngan gŏ cau ƀà tòm ală kòn mò dê lơh jat jơnau song, kung be bol he neh geh jơnau sồr bơh Yàng bèp.

⁵Ơ mò, tŭ do añ dan mò kah lah bol he pal kòñ gơboh bal mơ gơp, hơ̆ ò di be añ cih mò in dô bơta sồr lam pa, mơya la bơta bol he neh gơs bơh sơnròp.

⁶Bơta kòñ gơboh hơ̆ la bol he lơh jat ală bơta sồr lam Yàng dê; bơta sồr lam hơ̆ be oh mi neh kơno bơh sơnròp, la pal kis tòm bơta kòñ gơboh.

⁷Bơh neh gơs oă cau blac pơrlồm lik lòt tòm dunnia, la cau ò dòp Yàng Jesu Krist ai poac mhàm mơ lòt tus; hơ̆ la cau blac pơrlồm mơ la cau sòdră di Bơtau Krist.

⁸Oh mi pal kơrmap gàr tĕ să he, tồ ò roh tơngai broă bol he dê, mơya rơp dòp geh phan ƀàn wil tơl.

⁹Cau lơi lòt rlau ir mơ ò ơm sùm tòm bơta bơto sồr Bơtau Krist dê, gen cau hơ̆ ò gơs Yàng Tom Trồ. Ai cau lơi kư̆ ơm sùm tòm bơta bơto sồr hơ̆, gen cau hơ̆ gơs Yàng Bèp mơ Yàng Kòn.

¹⁰Dilah cau lơi lòt tus hơ oh mi mơ ò cèng bơta bơto sồr hơ̆, gen bañ rò khai mut tòm hìu, mơ bañ lùp còp khai;

¹¹bơh cau lơi lùp còp khai, gen gơs pơnah tòm broă iơh khai dê.

¹²Añ gam gơs oă bơta kòñ cih oh mi in mơya añ ò kòñ cih mơ sră mơ dà cih, añ kơp kòñ lòt tus hơ oh mi, tòmtìp mat mơ tòmbơhbơr bal tồ bơta hòn chò bol he dê geh wil tơl.

¹³Ală kòn oh ùr mò dê, la cau geh Yàng Tom Trồ sac rwah, còp să mò.