Read koho Yal Tơlik 14 Bible Online

Yal Tơlik 14 - koho bible

Yal Tơlik 14

¹Gen añ sền gŏ tai, do, Belàt Kòn ntào hơđang mơnơm Siôn, bal mơ Kơnràñ gơs dô rhiang poan jơt poan rbô nă cau geh cih sơnđan Kơnràñ mơ sơnđan Bèp Kơnràñ hơđang bìng liang bol khai dê.

²Añ kơno bơh đang trồ dô jơnau ntas be ntas oă dà nggồr, be ntơr kơnàs dờng; jơnau añ kơno hơ̆ gơlơh be jơnau kơñi mơ cau ơm pĕ.

³Bol khai đơs chò dô bơta đơs chò pa di đap sơbàn, di đap poan nơm phan wìn kis mơ ală cau kwang kra. Ò gơs cau lơi rgơi bơtê bơta đơs chò hơ̆, mìng dô rhiang poan jơt poan rbô nă cau git lơm, hơ̆ la cau neh geh tơwài klàs bơh dunnia.

⁴Ală cau hơ̆ òhềt gơs ƀơ̆ ƀơl mơ ală cau ùr, bơh bol khai gam rlùng. Belàt Kòn lòt tiah lơi gen bol khai jat tiah hơ̆. Bol khai neh geh Yàng Tom Trồ tơwài bơh digùl jơi kòn mơnus, tồ gơlik gơs ală cau sơnròp geh ơn Yàng Tom Trồ in mơ Belàt Kòn in.

⁵Tòm bơr bol khai ò gơs dô jơnau blac chừt lơi, bơh bol khai ò gơs tềl ƀơ̆ lơi.

⁶Chòp añ gŏ dô nă cau gơnrơh ndai par digùl trồ, gơs Jơnau Niam gam sùm sùm nàng bơto yal ală cau ơm tòm plai ù, hơ̆ la jơh ală lơgar, jơi bơtiàn, jơnau đơs mơ làng bol.

⁷Khai đơs jơnau dờng lah: “Duh rngòt tĕ di Yàng Tom Trồ mơ jòng ro Kơnràñ, bơh jơ cahrña Kơnràñ dê neh di rau; duh khoai tĕ Bơtau neh crơng gơs trồ, tiah, dàlềng mơ ală croh dà.”

⁸Cau gơnrơh dơ̆ bàr lòt jat mơ đơs lah: “Babilôn dờng ne neh tơrlah rau, tơrlah rau, gơ neh lơh jơh ală làng bol in ñô tơrnòm bơta rềs àr bơrnàn gơ dê.”

⁹Cau gơnrơh dơ̆ pe lòt jat mơ đơs dờng lah: “Dilah cau lơi duh khoai phan poan jơng mơ rùp gơ, mơ dòp tềl gơ hơđang bìng liang hala di mpàng tê he,

¹⁰gen cau hơ̆ kung rơp ñô tơrnòm bơta gơjrañ dờng ò crài Yàng Tom Trồ dê mơ êt di mơngàn bơta gơjrañ Kơnràñ dê, mơ khai rơp kong jê sồt tòm ồs mơ siau di đap ală cau gơnrơh sàng goh mơ di đap Belàt Kòn.

¹¹Ñhŭ bơta jê sồt bol khai dê gơguh gam sùm sùm ò lồi. Ală cau duh khoai phan poan jơng mơ rùp gơ, mơ ală cau dòp tềl sơnđan gơ, gen ngai mơ mang bol khai ò geh tŭ lơi rlô.”

¹²Tài bơh hơ̆ tàng ală cau sàng goh pal gơs bơta kong ơt, la ală cau prap gàr ală bơta sồr lam Yàng Tom Trồ dê mơ bơta dòn di Yàng Jesu.

¹³Añ kơno bơh đang trồ gơs jơnau đơs lah: “Cih tĕ jơnau do: Bơh do jơl hìng nau lơngai ală cau in chơt la chơt tòm Yàng!” Yàng Hwềng đơs: “Ngan behơ̆, bơh bol khai geh rlô bơh ală broă bòl glar bol khai dê, bơh ală broă bol khai dê jat bal mơ bol khai.”

¹⁴Lồc behơ̆ añ sền gŏ, ne, gơs dô nơm mhwal bò, hơđang mhwal gơs dô Bơtau nggui gơlơh be kòn mơnus, bồ ndau dô nơm sơgơn bơtau mơ màh, tê at dô nơm mơ̆ sồt.

¹⁵Gơs dô nă cau gơnrơh ndai lik bơh hìu duh khoai, hòi driau dờng mơ Bơtau nggui hơđang mhwal lah: “Ai tĕ mơ̆ Kơnràñ dê mơ toès, bơh jơ toès neh di, mơ kơnhai toès ù dê neh dum jơh rau.”

¹⁶Bơtau nggui hơđang mhwal tơyơr mơ̆ Kơnràñ dê tòm ù mơ ù gơ kong toès.

¹⁷Gơs dô nă cau gơnrơh ndai lik bơh hìu duh khoai hơđang trồ, mơ khai kung at dô nơm mơ̆ sồt.

¹⁸Gen gơs dô nă cau gơnrơh ndai tai lik bơh cơnòng duh khoai, la cau gơnrơh gơs gơnoar hơđang ồs, khai ai jơnau dờng hòi cau gơnrơh at mơ̆ sồt mơ lah: “Ai tĕ mơ̆ sồt mê dê mơ siat ală dơrkum plai ño tòm ù, bơh ală plai ño neh dum rau.”

¹⁹Gen cau gơnrơh tơyơr mơ̆ khai dê tòm ù mơ siat plai ño ù dê, mơ sơrbì tòm mpal dờng pat tơrnòm bơta gơjrañ dờng Yàng Tom Trồ dê.

²⁰Cau jă plai ño tòm mpal pat tơrnòm hơ̆ hơ đah bơdìh ƀòn dờng, gen gơs mhàm hòr lik bơh di mpal, bam tus di bơr ơseh, jòng pơgap pe rhiang kơsồ.