Read koho Yal Tơlik 15 Bible Online

Yal Tơlik 15 - koho bible

Yal Tơlik 15

¹Gen añ neh gŏ dô nơm tềl is tai hơđang trồ, tềl is hơ̆ dờng mơ krơi is, hơ̆ la poh nă cau gơnrơh at poh bơta rung rài lồi dut; mơ bơh ală bơta rung rài hơ̆ gen sồng bơta gơjrañ dờng Yàng Tom Trồ dê ò gam tai.

²Añ neh gŏ be dô nơm dàlềng krơh bơcă bal mơ ồs, kung gŏ ală cau neh geh pha lin rlau mơ phan poan jơng mơ rùp gơ mơ khà sơnđan gơ, ală cau hơ̆ ntào di gah dàlềng krơh hơ̆ mơ at ală kơñi pĕ Yàng Tom Trồ dê.

³Bol khai đơs chò bơta đơs chò Môise dê, la dĭ gơna Yàng Tom Trồ dê, mơ bơta đơs chò Belàt Kòn dê, mơ lah: “Ơ Yàng la Yàng Tom Trồ, Bơtau Gơnoar Dờng lam Jơh, Ală broă Kơnràñ dê la dờng ngan mơ krơi is ngan! Ơ Bơtau ală rài dê, ală gùng dà Kơnràñ dê la song ring mơ song ngan!

⁴Khoai Yàng, ñcau khin ò duh rngòt mơ ò jòng ro sơnđan Kơnràñ taih? Bơh mìng dô nă Kơnràñ la sang goh; Jơh ală làng bol rơp tus mơ duh khoai Kơnràñ, Bơh ală bơta cahrña song ring Kơnràñ dê neh geh yal tơlik.”

⁵Tơnơ̆ mơ hơ̆ añ sền gŏ hìu duh khoai, la Hìu Ing Duh Khoai cơng tàng, pò tơlik hơđang trồ.

⁶Poh nă cau gơnrơh at poh bơta rung rài lik bơh hìu duh khoai, bol khai soh ào bài che dơmài lơbơn sàng goh àng gơcrà, mơ kơt che mơ màh gùt dar ntơh.

⁷Dô nơm tòm poan nơm phan wìn kis tong poh nă cau gơnrơh in poh nơm mơngàn mơ màh ơn bềng bơta gơjrañ dờng Yàng Tom Trồ dê, la Bơtau kis sùm sùm ò lồi.

⁸Gen hìu duh khoai bềng ñhŭ gơlik bơh bơta gơklŏ Yàng Tom Trồ dê mơ gơnap gơnoar Kơnràñ dê, gen ò gơs cau lơi rgơi mut tòm hìu duh khoai jơl tus di poh bơta rung rài poh nă cau gơnrơh dê neh sir rau.