Read koho Yal Tơlik 17 Bible Online

Yal Tơlik 17 - koho bible

Yal Tơlik 17

¹Gen dô nă tòm poh nă cau gơnrơh neh at poh nơm mơngàn tus đơs mơ añ lah: “Tus hơ do, añ rơp sơnio mê in bơta lơh glài cau ùr dri tơlàr dờng, khai ơm nggui hơđang ală dà.

²Ală cau bơtau hơđang ù neh tìs glài rềs àr bơrnàn mơ khai, mơ ală cau ơm tòm plai ù neh bơñul mơ tơrnòm bơta rềs àr bơrnàn khai dê.”

³Añ geh rngoh rngac bơh Yàng Hwềng, mơ cau gơnrơh hơ̆ cèng añ lòt tus tòm ƀlàng bràs; añ gŏ dô nă cau ùr hào hơđang dô nơm phan poan jơng pơrhê, gơ gơs poh nơm bồ, jơt nơm ngke, să gơ bềng ală sơnđan tràl sơrbil.

⁴Cau ùr hơ̆ soh phan dà gur mơ dà pơrhê, sơmpô să khai mơ màh, lŭ màng, lŭ kràng màng; tê khai at dô nơm mơngàn màh bềng ală phan ngkòr ngkàc, hơ̆ la ală bơta ƀơ̆ ƀơl bơta rềs àr bơrnàn khai dê.

⁵Di bìng liang khai gơs cih dô nơm sơnđan ndơp ndơr lah: “Babilôn dờng, mè ală cau ùr dri tơlàr mơ mè ală bơta ngkòr ngkàc hơđang ù.”

⁶Añ gŏ cau ùr hơ̆ bơñul bơh mhàm ală cau sàng goh mơ mhàm ală cau chơt tài bơh bơta lơh cơng bơh Yàng Jesu. Dơ̆ añ gŏ cau ùr hơ̆ gen añ ai lơh krơi ngan.

⁷Mơya cau gơnrơh đơs mơ añ lah: “Mbe mê ai lơh krơi behơ̆ taih? Añ rơp yal tơlik mê in bơta ndơp ndơr bơh cau ùr mơ bơh phan poan jơng pơdiang khai, la phan poan jơng gơs poh nơm bồ mơ jơt nơm ngke.

⁸Phan poan jơng mê neh gŏ hơ̆, lài neh gơs, tŭ do ò gơs, mơ gơ rơp guh bơh tòm brong jrô hùt hung mơ lòt tus hơ tiah roh rui. Ală cau ơm hơđang plai ù mơ sơnđan mat bol khai ò gơs cih tòm sră bơta kis bơh dê tŭ crơng gơs trồ tiah, dơ̆ bol khai gŏ phan poan jơng gen bol khai rơp ai lơh krơi, tài bơh lài gơ neh gơs, tŭ do ò gơs, mơ tơnơ̆ rơp tus tai.

⁹Behơ̆ pal gơs nùs kơlôi dô bă jak chài. Poh nơm bồ hơ̆ la poh nơm mơnơm mơ cau ùr hơ̆ nggui hơđang,

¹⁰mơ kung la poh nă cau bơtau; pram nă neh roh gơnoar, dô nă gam gơs, dô nă òhềt tus; tòm tŭ bơtau hơ̆ tus gen khai pal ơm mìng dô êt jŏ lơm.

¹¹Ai phan poan jơng lài neh gơs, tŭ do ò gơs, hơ̆ la bơtau dơ̆ phàm, kung tòm mpồl poh nă cau bơtau ne, mơ gơ lòt tus hơ tiah roh rui.

¹²Mơ jơt nơm ngke mơ mê neh gŏ hơ̆ la jơt nă cau bơtau òhềt dòp geh gơnoar at bồ, mơya bol khai rơp dòp gơnoar bơtau dê bal mơ phan poan jơng tòm dô jơ lơm.

¹³Bol khai dô nùs bal mơ jào gơnap gơnoar mơ gơnoar bol khai dê phan poan jơng in.

¹⁴Bol khai rơp tòmlơh mơ Belàt Kòn. Belàt Kòn rơp geh pha lin rlau, bơh Kơnràñ la Yàng ală yàng dê, Bơtau ală bơtau dê; mơ ală cau ơm bal mơ Kơnràñ la ală cau geh hòi sac, sac rwah mơ dòn song.”

¹⁵Cau gơnrơh đơs tai mơ añ lah: “Ală dà mơ mê neh gŏ, gơs cau ùr dri tơlàr nggui hơđang, hơ̆ la ală làng bol, ală mpồl bơnòr oă, ală lơgar mơ ală jơnau đơs.

¹⁶Jơt nơm ngke mơ mê neh gŏ hơ̆ bal mơ phan poan jơng rơp gơjrañ kơuềng di cau ùr dri tơlàr ne, lơh khai in ơm is, ơm kuh lòi rồ, sa poac khai dê mơ chu pơrguc khai tòm ồs.

¹⁷Bơh Yàng Tom Trồ neh ơn bơta hơ̆ tòm nùs bol khai tồ lơh gơlik gơs jat bơta lơh nền Kơnràñ dê, tòm tŭ bol khai dô nùs bal jào gơnoar at bồ bol khai dê phan poan jơng in, jơl tus di tŭ ală jơnau Yàng Tom Trồ dê gơlik gơs di ngan.

¹⁸Cau ùr mơ mê neh gŏ hơ̆ la ƀòn dờng gơs gơnoar at bồ hơđang ală cau bơtau tòm plai ù.”