Read koho Yal Tơlik 18 Bible Online

Yal Tơlik 18 - koho bible

Yal Tơlik 18

¹Tơnơ̆ mơ hơ̆, añ gŏ dô nă cau gơnrơh ndai mù bơh đang trồ, gơs gơnoar dờng ngan; bơta gơklŏ khai dê àng gơcrà làm jơh plai ù.

²Khai hòi driau dờng lah: “Babilôn dờng neh tơrlah tơrlơm, tơrlah tơrlơm rau! Gơlik gơs tiah ơm ală cà dê, rsòn jơh ală cà ƀơ̆ iơh, mơ rsòn jơh ală jơi sềm ƀơ̆ ƀơl cù kìr,

³Bơh jơh ală làng bol neh ñô tơrnòm bơta rềs àr bơrnàn khai dê. Ală cau bơtau hơđang plai ù neh tìs glài rềs àr bơrnàn mơ khai, mơ ală cau kă bro tòm ù kơnòm di bơta lơh gơlềng gơlàng oă ir khai dê mơ gơlik pas gơs.”

⁴Añ kơno dô jơnau ndai bơh đang trồ đơs lah: “Ơ làng bol añ jê, lik tĕ bơh di khai, tồ bol mê ò gơs pơnah bal tòm ală tồi glài khai dê mơ ò kòl tòm bơta rung rài khai dê;

⁵bơh ală tồi glài khai dê neh gơ ngŏ tus hơ trồ, mơ Yàng Tom Trồ neh kah ală bơta tồi glài iơh bơsak khai dê.

⁶Khai neh lơh di cau mbe lơi, gen lơh wơl tĕ di khai behơ̆ sơl, jat be ală broă khai dê gen sal wơl tĕ khai in bàr dơ̆ rlau tai; mơngàn khai neh crài ai cau in, gen crài tĕ ai khai in bàr dơ̆ rlau tai.

⁷Khai neh jòng is să he mơ lơh gơlềng gơlàng kàr lơi, gen lơh tĕ di khai jê sồt bòl glar mơ ñìm rac kàr hơ̆ sơl. Bơh tòm nùs khai kơlôi lah: ‘Añ nggui hơđang sơbàn bơtau ùr, añ ò di la cau ùr bơnrau, añ rơp ò gơs tŭ lơi gŏ bơta ñìm rac ò.’

⁸Gen tàng ală bơta rung rài khai dê tus bal tòm dô ngai, hơ̆ la bơta pluh plàng, bơta ñìm rac, mơ bơta jơgloh rung, mơ khai rơp kong ồs sa pơrguc jơh; bơh Yàng la Yàng Tom Trồ Gơnap Gơnoar pràn la Bơtau cahrña khai.”

⁹Ală cau bơtau hơđang ù, la cau neh tìs glài rềs àr bơrnàn mơ lơh gơlềng gơlàng bal mơ khai, dơ̆ bol khai gŏ ñhŭ ồs sa khai gen bol khai rơp ñìm rac mơ pơt wòl tài bơh khai.

¹⁰Mơ bơh rngòt di bơta jê sồt bol glar khai dê, gen bol khai rơp ơm ngài mơ đơs lah: “Nđàc sơngit ngan, pơlai soh ngan, ƀòn dờng Babilôn la ƀòn kơ̆ cê ne! Tòm dô jơ bơta lơh glài ai neh tus rau!”

¹¹Ală cau kă bro hơđang plai ù ñìm rac moat jrùng tài bơh khai, bơh ò gơs cau lơi rwat phan bol khai dê tai,

¹²ală phan hơ̆ la màh, priă, lŭ màng, lŭ kràng màng, bài che dơmài lơbơn, dà gur, bơteh, dà pơrhê, tơl ală bơta chi ƀô, tơl ală phan mơ bla, tơl ală phan mơ chi màng mơ kòng mơ lòs mơ lŭ sàr,

¹³kơmhò kwĕ, kơmbuh tĕ biap, kơmbuh kơlhô, cài trŭ, kơlhô, tơrnòm, mơñà, kơmbuh kòi mi, kòi mi, kơnrồ, belàt, ơseh, rơndeh ơseh, dĭ gơna, hơ̆ la hwềng soàn cau.

¹⁴Bol khai rơp đơs lah: Ală phan niam mơ nùs ai hàm kòñ hơ̆ neh roh thit bơh ai rau, jơh ală phan bơkah mơ bơta pas ryŭ ai dê kung neh roh jơh bơh ai rau, ò gơs tŭ lơi jòi bàn gơ tai.

¹⁵Ală cau kă bro ală phan hơ̆, la cau neh kơnòm di Babilôn sồng gơlik pas gơs, mơ tài bơh rngòt di bơta jê sồt bòl glar khai dê, gen tàng bol khai ơm ngài mơ ñìm rac moat jrùng mơ đơs lah:

¹⁶“Nđàc sơngit ngan, pơlai soh ngan ƀòn dờng ne, la ƀòn neh soh bài che dơmài lơbơn, dà gur, dà pơrhê, sơmpô să mơ màh, lŭ màng mơ lŭ kràng màng.

¹⁷Tòm dô jơ jơh ală bơta pas gơs ne neh roh thit jơh.” Jơh ală cau at bồ ơhò mơ ală cau nac lòt tòm ơhò, ală cau lơh broă tòm ơhò mơ ală cau kă bro òs lòt hơđang dàlềng, bol khai ơm ntào ngài,

¹⁸sền gŏ ñhŭ ồs sa khai, gen driau dờng lah: “Gơs ƀòn lơi ndròm be ƀòn dờng ne sơl!”

¹⁹Bol khai rsìh thul hơđang bồ bol khai, ñìm rac moat jrùng mơ driau lah: “Nđàc sơngit ngan, pơlai soh ngan ƀòn dờng ne, ală cau gơs ơhò hơđang dàlềng kơnòm di bơta pas sơm khai dê mơ gơlik pas gơs, mơ do tòm dô jơ khai kong tơnroh lề lac jơh.

²⁰Ơ trồ, ơ ală cau sàng goh, ală cau gơnoar bơto dờng, mơ ală cau gơnoar hwơr, hòn chò tĕ bơh khai, tài bơh Yàng Tom Trồ neh sal tê di khai bol mê in rau!”

²¹Gơs dô nă cau gơnrơh pràn kơldang ai dô nơm lŭ be mpal dờng sơrbì tòm dàlềng mơ đơs lah: “Ƀòn dờng Babilôn rơp kong sơrbì pràn ngan behơ̆, ò gơs tŭ lơi gŏ gơ tai.

²²Ò gơs tŭ lơi cau kơno tai di tiah ai dê gơs jơnau ntas pĕ kơñi, uh kơwào, uh kơmboat, mơ tềng hơ̆ rơp ò gơs tŭ lơi gŏ tai cau chài lơh broă, bulah lơh broă lơi kung ò gŏ sơl; kung ò gơs tŭ lơi kơno jơnau ntas cau piah di mpal tai.

²³Bơta àng ồs đèng ò gơs tŭ lơi pơnđàng sòl tai di tiah ai dê; tềng hơ̆ ò gơs tŭ lơi kơno tai jơnau đơs cau bơrtơu mơ ƀan dê. Bơh ală cau neh kă bro di tiah ai dê la ală cau dờng ryŭ tòm ù; jơh ală làng bol neh kòl pơrlồm tài bơh bơta juh proh pơlìn ai dê.

²⁴Tòm ƀòn hơ̆ neh bàn mhàm ală cau gơnoar hwơr mơ ală cau sàng goh dê, mơ mhàm jơh ală cau neh kong sreh chơt hơđang plai ù.”