Read koho Yal Tơlik 2 Bible Online

Yal Tơlik 2 - koho bible

Yal Tơlik 2

¹“Cih tĕ cau gơnrơh Hìu Jum Goh Ephesô in lah: Do la ală jơnau đơs Bơtau at poh nơm sơmañ tòm tê ma mơ lòt digùl poh nơm jơng ồs đèng mơ màh

²‘Añ git ală broă mê dê, bơta duh broă bòl glar mê dê, mơ bơta kong ơt mê dê; Añ git mê ò bài kong ală cau iơh bơsak, mơ mê neh lòng ală cau sơnđan is să he la cau gơnoar bơto dờng mơya ò di la cau gơnoar bơto dờng; mê neh gŏ bol khai la ală cau ma blac.

³Añ git mê òs kong ơt; mê neh kong bòl glar bơh sơnđan Añ mơ ò gơplơ̆ nùs.

⁴Mơya bơta Añ ò bài mê, la mê neh sang lòi bơta kòñ gơboh mê neh gơs bơh sơnròp.

⁵Behơ̆ kah tĕ bơh tiah lơi mê neh gơhuc, gơjrañ sang glài tĕ, mơ lơh wơl ală broă mê neh lơh bơh sơnròp. Dilah ò behơ̆, Añ rơp tus hơ mê, mơ Añ rơp tă tơlik jơng ồs đèng mê dê bơh di tiah gơ.

⁶Bulah behơ̆, mê gam gơs bơta do: hơ̆ la mê gơjrañ kơuềng di ală broă mpồl Nikôla dê, mơ Añ kung gơjrañ kơuềng di ală broă bol khai dê sơl.’

⁷Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh: ‘Cau lơi geh pha lin rlau, Añ rơp ai sa plai chi bơta kis tòm lơgar lơngap lơngai Yàng Tom Trồ dê.’”

⁸“Cih tĕ cau gơnrơh Hìu Jum Goh Simirnơ in lah: Do la ală jơnau đơs Bơtau sơnròp mơ Bơtau lồi dut, Bơtau neh chơt mơ neh kis wơl:

⁹‘Añ git bơta rung rài mơ bơta rƀah lơòi mê dê, bulah mê la cau pas gơs, mơ Añ git ală jơnau bơrsèl tơnhial ală cau sơnđan is să he la cau Juda mơya ò di la cau Juda, bol khai la bal mơ mpồl jơnum cà Satan dê.

¹⁰Mê bañ rngòt dê ală bơta bòl glar jê sồt mê mòr kong. Iat tĕ! Cà ràk mòr sơrbì dô êt cau tòm bol mê tòm hìu jàm, nàng bol mê kong lòng; bol mê rơp gơs bơta rung rài tòm jơt ngai. Dòn song tĕ jơl chơt, gen Añ rơp ai bol mê in sơgơn bơtau bơta kis.’

¹¹Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh: ‘Cau lơi geh pha lin rlau, gen rơp ò kong bơta jê sồt tòm bơta chơt dơ̆ bàr.’”

¹²“Cih tĕ cau gơnrơh Hìu Jum Goh Pergam in lah: Do la ală jơnau đơs Bơtau gơs đào sồt bàr đah mat:

¹³‘Añ git tiah mê ơm, hơ̆ la tiah gơs sơbàn cà Satan dê, mê kơrmap kơ̆ sơnđan Añ, mê neh ò pơndang sang bơta dòn di Añ, bulah tòm ală ngai hơ̆ cau lơh cơng Añ jê la Antipa, la cau dòn song Añ jê, neh kong tơnchơt digùl oh mi, la tiah cà Satan ơm.

¹⁴Mơya gơs dô êt bơta Añ ò bài mê: Hơ̆ la tềng hơ̆ mê gơs cau ƀà jat bơta bơto sồr Balaam dê, la cau neh bơto Balak ơn dô pơnai lŭ gơtup jơng di đap kòn sau Israel nàng ơniai bol khai sa poac duh khoai rùp ràk mơ tìs glài rềs àr bơrnàn.

¹⁵Mê kung gơs cau ƀà jat bơta bơto sồr mpồl Nikôla dê behơ̆ sơl.

¹⁶Behơ̆, gơjrañ sang glài tĕ; dilah ò behơ̆, Añ rơp tus mhar hơ mê, ai đào bơh di bơr Añ nàng tòmlơh mơ bol khai.’

¹⁷Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh: ‘Cau lơi geh pha lin rlau, Añ rơp ai khai in mana gam pồn ndơp, mơ Añ rơp ai khai in dô nơm pơnai lŭ bò, hơđang lŭ hơ̆ gơs cih dô nơm sơnđan pa, rlau mơ cau dòp gơ gen ò gơs cau lơi git.’”

¹⁸“Cih tĕ cau gơnrơh Hìu Jum Goh Thiatirơ in lah: Do la ală jơnau đơs Kòn Yàng Tom Trồ dê, la Bơtau gơs gar mat be lơmpiat ồs, mơ jơng Kơnràñ gơlơh be kòng àng goh:

¹⁹‘Añ git ală broă mê dê, bơta kòñ gơboh, bơta dòn, bơta duh broă, bơta kong ơt, mơ ală broă mê lơh tơnơ̆ la lin rlau mơ ală broă sơnròp sơl.

²⁰Mơya bơta Añ ò bài mê, hơ̆ la mê lòi Jesabel, cau ùr sơnđan is să he la cau gơnoar hwơr, khai bơto sồr mơ pơrlồm ơniai ală dĭ gơna Añ jê tìs glài rềs àr bơrnàn mơ sa phan duh khoai rùp ràk.

²¹Añ neh ai khai in tŭ nàng gơjrañ sang glài, mơya khai ò bài gơjrañ sang glài rềs àr bơrnàn khai dê.

²²Do, Añ rơp sơrbì khai jê sồt hơđang cơnòng bic khai dê, mơ cau lơi tìs glài bơrnàn bal mơ khai, gen Añ rơp lơh bol khai in kong bơta rung rài dờng, mìng lòi dilah bol khai git gơjrañ sang glài bơh ală broă khai dê.

²³Añ rơp tơnchơt ală kòn khai dê. Jơh ală Hìu Jum Goh rơp git Añ la Bơtau sền sơwì tòm nùs nhơm mơ tòm bơta kơlôi sơnơng, mơ Añ rơp sal wơl kòp nă bol mê in jat be ală broă bol mê dê.

²⁴Mơya đah pơnah ală cau ndai tòm bol mê ơm tòm Thiatirơ, la ală cau ò dòp bơta bơto sồr hơ̆, mơ ò git bơta gơs cau ƀà sơnđan la ală bơta jrô ndơp cà Satan dê, gen Añ đơs mơ bol mê lah Añ ò tơntui bol mê in ơnòng kơnjơ̆ lơi ndai tai ò;

²⁵mìng bol mê kơrmap kơ̆ ală bơta bol mê neh gơs jơl tus dê tŭ Añ tus.

²⁶Cau lơi geh pha lin rlau mơ lơh jat ală broă Añ jê jơl tus di lồi dut, gen Añ rơp ai khai in gơnoar at bồ ală làng bol.

²⁷Cau hơ̆ rơp at bồ mơ dô nơm gai lòs, khai gơs gơnoar pòng bơcah bol khai be ală gri mơ ù, kung be să tòm Añ neh dòp gơnoar hơ̆ bơh di Bèp Añ,

²⁸mơ Añ rơp ai khai in sơmañ àng drim.

²⁹Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh.’”