Read koho Yal Tơlik 20 Bible Online

Yal Tơlik 20 - koho bible

Yal Tơlik 20

¹Chòp añ gŏ dô nă cau gơnrơh mù bơh đang trồ, tê at kai mpồng brong jrô hùt hung mơ dô nơm che sreng dờng.

²Khai kup nagrài, hơ̆ la bơs yau, la Cà ràk, la cà Satan, mơ kơt gơtòm dô rbô nam.

³Mơ sơrbì gơtòm brong jrô hùt hung, til mpồng, mơ tap ƀang kì, tồ gơ in ò geh lòt pơrlồm ală làng bol tai, jơl tus di dô rbô nam neh lồi rau. Tơnơ̆ mơ hơ̆ pal hồ gơtòm dô êt jŏ.

⁴Gen añ gŏ ală sơbàn, mơ ală cau nggui tềng hơ̆ la cau neh geh gơnoar cahrña. Añ kung gŏ hwềng soàn ală cau neh kong koh bồ tài bơh jơnau lơh cơng bơh Yàng Jesu, mơ tài bơh jơnau Yàng Tom Trồ dê, hơ̆ la ală cau ò duh khoai phan poan jơng mơ rùp gơ, mơ ò dòp tềl gơ di bìng liang mơ di mpàng tê he. Bol khai geh kis wơl mơ at bồ bal mơ Bơtau Krist tòm dô rbô nam.

⁵Hơ̆ la bơta kis wơl dơ̆ sơnròp. Ai ală cau ndai neh chơt gen ò geh kis wơl jơl tus di dô rbô nam neh lồi rau.

⁶Lơngai mơ sàng goh cau lơi in geh pơnah tòm bơta kis wơl dơ̆ sơnròp! Bơta chơt dơ̆ bàr ò gơs gơnoar hơđang bol khai, mơya bol khai rơp lơh gơs cau gơnoar ơn phan duh khoai Yàng Tom Trồ mơ Bơtau Krist dê, mơ bol khai rơp at bồ bal mơ Kơnràñ tòm dô rbô nam.

⁷Tòm tŭ dô rbô nam neh lồi rau, cà Satan rơp geh hồ toh bơh tiah jàm,

⁸gen gơlik lòt nàng pơrlồm ală làng bol ơm tòm poan đah plai ù, hơ̆ la Got mơ Magot, nàng pơjum bol khai tồ tòmlơh; ntum khà bol khai dê be bràs dàlềng.

⁹Bol khai guh làm ù tiah, gơrwàng theng ală cau sàng goh dê mơ ƀòn dờng kòñ gơboh. Mơya gơs ồs dùh bơh đang trồ mơ chu pơrguc bol khai.

¹⁰Ai cà ràk la cau neh pơrlồm bol khai gen kong sơrbì tòm brong ồs hơng mơ siau; tềng hơ̆ neh gơs phan poan jơng mơ cau gơnoar hwơr ma blac rau. Bol khai rơp kong jê sồt bòl glar ngai mơ mang jơl sùm sùm ò lồi.

¹¹Chòp añ gŏ dô nơm sơbàn dờng mơ bò bal mơ Bơtau nggui hơđang sơbàn; trồ tiah dô jơh bơh di đap Kơnràñ, ò gơs tiah lơi bol gơ in tai.

¹²Añ gŏ ală cau chơt, dờng mơ dềt, ơm ntào di đap sơbàn mơ ală sră geh pò tơlik. Kung gơs dô dap sră ndai geh pò tơlik sơl la sră bơta kis. Ală cau chơt kong cahrña jat be ală bơta neh cih tòm ală sră hơ̆, jat be ală broă bol khai neh lơh.

¹³Dàlềng jào wơl ală cau neh chơt tòm gơ, bơta chơt mơ lơgar làng ƀồc kung jào wơl ală cau chơt tòm bol gơ, jơh ală bol khai kong cahrña jat be ală broă bol khai neh lơh.

¹⁴Gen bơta chơt mơ lơgar làng ƀồc kong sơrbì tòm brong ồs. Brong ồs la bơta chơt dơ̆ bàr.

¹⁵Dilah cau lơi ò geh cih sơnđan mat tòm sră bơta kis gen kong sơrbì tòm brong ồs hơ̆ sơl.