Read koho Yal Tơlik 3 Bible Online

Yal Tơlik 3 - koho bible

Yal Tơlik 3

¹“Cih tĕ cau gơnrơh Hìu Jum Goh Sardis in lah: Do la ală jơnau đơs Bơtau gơs poh Hwềng Yàng Tom Trồ dê mơ poh nơm sơmañ: ‘Añ git ală broă mê dê, mê gơs sơnđan la kis mơya la chơt.

²Kah rngal tĕ, mơ lơh kơ̆ nền ală bơta gam gơs la ală bơta mòr chơt; bơh Añ ò gŏ broă mê dê la wil tơl di đap Yàng Tom Trồ Añ jê.

³Behơ̆ kah wơl tĕ ală jơnau mê neh dòp mơ neh iat; prap gàr tĕ ală jơnau hơ̆ mơ gơjrañ sang glài tĕ. Dilah mê ò kah rngal, Añ rơp tus be cau kơñau, mơ mê ò git jơ lơi Añ rơp lòt tus hơ mê.

⁴Mơya tòm Sardis mê gam gơs dô êt cau ò lơh ƀơ̆ wàm ồi ào bol khai dê; ală cau hơ̆ rơp soh ào bò mơ lòt bal mơ Añ, bơh bol khai la di pal.

⁵Cau lơi geh pha lin rlau gen rơp soh ào bò behơ̆ sơl. Añ rơp ò jùt sơnđan mat khai bơh di sră bơta kis, mơ Añ rơp yal tơlik sơnđan khai di đap Bèp Añ jê, mơ di đap ală cau gơnrơh Kơnràñ dê sơl.

⁶Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh.’”

⁷“Cih tĕ cau gơnrơh Hìu Jum Goh Philadelphi in lah: Do la ală jơnau đơs Bơtau sàng goh dê, Bơtau song ngan, la Bơtau gơs kai mpồng Dabit dê, la Bơtau pò gen ò gơs cau lơi rgơi til, til gen ò gơs cau lơi rgơi pò:

⁸‘Añ git ală broă mê dê. Do Añ neh pò di đap mê dô nơm mpồng ò gơs cau lơi rgơi til; Añ git mê gơs mìng dô êt pràn, bulah behơ̆ mê neh prap gàr jơnau Añ jê mơ mê ò pơndang sang sơnđan añ.

⁹Do, Añ rơp lơh ală cau in tòm mpồl jơnum cà Satan dê, la cau sơnđan is să he la cau Juda mơ ò di la cau Juda, bol khai đơs blac; do, Añ rơp lơh bol khai in lòt tus cùn khoai di jơng mê dê, mơ bol khai rơp git lah Añ neh kòñ gơboh di mê.

¹⁰Tài bơh mê neh prap gar jơnau Añ jê mơ ntào kơ̆, gen Añ kung rơp sền gàr mê tòm jơ gơlòng bòl glar, la jơ rơp gơlik tus làm jơh dunnia nàng lòng ală cau ơm tòm plai ù.

¹¹Añ rơp tus mhar; kơrmap kơ̆ tĕ bơta mê neh gơs, tồ ò gơs cau lơi tă sơgơn bơtau mê dê.

¹²Cau lơi geh pha lin rlau, gen Añ rơp lơh khai in gơlik gơs dô nơm jrong tòm hìu duh khoai Yàng Tom Trồ Añ jê, mơ khai ò gơs tŭ lơi lik bơh tềng hơ̆ tai. Añ rơp cih hơđang khai sơnđan Yàng Tom Trồ Añ jê, sơnđan ƀòn dờng Yàng Tom Trồ Añ jê, la Jerusalem pa hơđang trồ bơh Yàng Tom Trồ Añ jê mơ mù, bal mơ sơnđan pa Añ jê.

¹³Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh.’”

¹⁴“Cih tĕ cau gơnrơh Hìu Jum Goh Laodise in lah: Do la ală jơnau đơs Bơtau Amen dê, la Bơtau lơh cơng dòn song mơ song ngan, la tòm ryas bơta crơng gơs Yàng Tom Trồ dê:

¹⁵‘Añ git ală broă mê dê, mê ò ngềt mơ kung ò duh sơl. Añ kơp kòñ mê ngềt hala duh!

¹⁶Behơ̆, tài bơh mê ram ram, ò ngềt kung ò duh, gen Añ rơp gơbruh hă mê bơh di bơr Añ.’

¹⁷Bơh mê đơs: ‘Añ pas gơs, añ neh pas sơm rau, ò càng phan lơi tai;’ mơya mê ò git mê la cau bòl glar, pal nđàc sơngit, rƀah lơòi, jơngo mat mơ ơm kuh lòi rồ.

¹⁸Behơ̆ Añ bơto tơngkah mê rwat tĕ màh Añ jê neh ryă tòm ồs, tồ mê in gơlik gơs pas sơm; rwat ală ào bò, tồ mê in soh nàng jơm ndơp bơta ƀàssìl bơh bơta ơm kuh lòi rồ mê dê; mơ rwat sơnơm nàng bong di mat tồ mê gŏ.

¹⁹Ală cau lơi Añ kòñ gơboh, gen Añ lah pơrhơng mơ lơh glài tơmàl sơl; behơ̆ gơs tĕ nùs ngac ngar mơ gơjrañ sang glài tĕ.

²⁰Do, Añ ntào di mpồng mơ teh; dilah cau lơi kơno jơnau Añ mơ pò mpồng, gen Añ rơp mut mơ sào bal mơ khai, khai bal mơ Añ.

²¹Cau lơi geh pha lin rlau, gen Añ rơp ai khai in nggui bal mơ Añ hơđang sơbàn Añ jê, be să tòm Añ neh geh pha lin rlau mơ nggui bal mơ Bèp Añ di sơbàn Kơnràñ dê sơl.

²²Cau lơi gơs tồr, iat tĕ jơnau Yàng Hwềng đơs mơ ală Hìu Jum Goh.”