Read koho Yal Tơlik 4 Bible Online

Yal Tơlik 4 - koho bible

Yal Tơlik 4

¹Tơnơ̆ mơ hơ̆ añ sền gŏ, ne, dô nơm mpồng pò hơđang trồ, mơ jơnau añ neh kơno bơh sơnròp đơs mơ añ be ntas kơlwòk, jơnau hơ̆ đơs mơ añ lah: “Guh tĕ hơ do, Añ rơp sơnio mê in ală bơta pal gơlik tus tơnơ̆.”

²Tŭ hơ̆ mo, añ gơs rngoh rngac bơh Yàng Hwềng, mơ ne, gơs dô nơm sơbàn hơđang trồ, mơ gơs dô Bơtau nggui tềng hơ̆.

³Bơtau nggui tềng hơ̆ àng gơcrà be lŭ màng gơcrà mơ lŭ màng pơrhê, mơ gùt dar sơbàn gơs dô nơm bơrlangkang sền gơlơh be lŭ màng tơlir ñhơt.

⁴Gùt dar sơbàn hơ̆ gơs bàr jơt poan nơm sơbàn ndai; hơđang ală sơbàn do gơs bàr jơt poan nă cau kwang kra nggui, bol khai soh ào bò mơ dê bồ bol khai ndau sơgơn mơ màh.

⁵Bơh dê sơbàn hơ̆ gơlik ală puhlèp, jơnau ntas mơ ntơr kơnàs; mơ di đap sơbàn gơs poh nơm sơmpòl ồs, hơ̆ la poh Hwềng Yàng Tom Trồ dê.

⁶Di đap sơbàn gơs dô nơm dàlềng krơh gơlơh be krơh àng goh; digùl kòp đah gùt dar sơbàn gơs poan nơm phan wìn kis, đah đap mơ đah ngkòi bol gơ dê gơs bềng gar mat.

⁷Phan wìn kis sơnròp gơlơh be klìu triă, phan dơ̆ bàr be kơnrồ, phan dơ̆ pe gơs mat be kòn mơnus, phan dơ̆ poan be klàng bung par.

⁸Poan nơm phan wìn kis hơ̆, kòp nơm gơs prau nơm đar, đah dơlam mơ đah bơdìh ală đar hơ̆ gơs bềng gar mat; ngai mơ mang bol gơ đơs sùm ò dơh lah: “Sàng goh, sàng goh, sàng goh Yàng la Yàng Tom Trồ, Bơtau Gơnap Gơnoar Dờng Làm Jơh, la Bơtau Neh Gơs, Gam Gơs mơ Rơp Tus.”

⁹Mơ kòp dơ̆ ală phan wìn kis ai bơta gơklŏ, bơta ryŭ ryơm, bơta ưnngài nàng ơn Bơtau in ơm nggui hơđang sơbàn, la Bơtau kis gam sùm sùm ò lồi,

¹⁰gen bàr jơt poan nă cau kwang kra tơmbic să di đap Bơtau nggui hơđang sơbàn, mơ duh khoai Kơnràñ la Bơtau kis gam sùm sùm ò lồi. Bol khai sơrbì ală sơgơn bơtau bol khai dê di đap sơbàn mơ đơs lah:

¹¹“Khoai Yàng la Yàng Tom Trồ bol he dê, Kơnràñ di pal dòp geh bơta gơklŏ, bơta ryŭ ryơm mơ gơnap gơnoar, Bơh Kơnràñ neh crơng gơs jơh ală phan, Mơ tài bơh nùs kòñ Kơnràñ dê gen ală phan hơ̆ neh gơlik gơs mơ geh crơng gơs.”