Read koho Yal Tơlik 8 Bible Online

Yal Tơlik 8 - koho bible

Yal Tơlik 8

¹Tòm tŭ Belàt Kòn tă ƀang kì dơ̆ poh, hơđang trồ gơs bơta ơm ring ngềt pơgap nggùl jơ.

²Gen añ gŏ poh nă cau gơnrơh ntào di đap Yàng Tom Trồ, mơ neh ai bol khai in poh nơm kơlwòk.

³Chòp gơs dô nă cau gơnrơh ndai tus, ntào dê gah cơnòng duh khoai, at dô nơm gri mơ màh ơn kơlhô. Khai neh geh ai oă kơlhô nàng bơcă bal mơ ală jơnau hòi dan jơh ală cau sàng goh dê, mơ ơn hơđang cơnòng duh khoai mơ màh di đap sơbàn.

⁴Ñhŭ kơlhô, bal mơ ală jơnau hòi dan ală cau sàng goh dê, bơh di tê cau gơnrơh gơguh tus di đap Yàng Tom Trồ.

⁵Cau gơnrơh ai gri kơlhô, ai ồs bơh cơnòng duh khoai mơ ơn bềng tòm hơ̆, mơ sơrbì gơtòm ù; gen gơs ală ntơr kơnàs, jơnau ntas dờng, puhlèp mơ lơnggơr ù.

⁶Poh nă cau gơnrơh at poh nơm kơlwòk neh rcang nàng uh.

⁷Cau gơnrơh sơnròp uh kơlwòk, gen gơs mìu piar, mơ ồs bơcă bal mơ mhàm dùh tòm plai ù. Dô pơnah pe chi che kong ồs sa, mơ jơh ală ñhơt tơlir kong ồs sa sơl.

⁸Cau gơnrơh dơ̆ bàr uh kơlwòk, gen gơs dô nơm phan gơlơh be dô nơm mơnơm dờng gơs ồs sa kong sơrbì tòm dàlềng. Gen dô pơnah pe dàlềng gơlik gơs mhàm,

⁹dô pơnah pe phan kis tòm dàlềng chơt jơh, mơ dô pơnah pe ală ơhò kong tơnroh.

¹⁰Cau gơnrơh dơ̆ pe uh kơlwòk, gen gơs dô nơm sơmañ dờng dùh bơh đang trồ, gơ gơs ồs sa be dô nơm sơmpòl, mơ gơrung hơđang dô pơnah pe ală hiòng mơ ală croh dà.

¹¹Sơmañ hơ̆ sơnđan la Chi Bơtang. Dô pơnah pe ală dà gơlik gơs bơtang, mơ gơs oă cau chơt tài bơh dà gơlik bơtang.

¹²Cau gơnrơh dơ̆ poan uh kơlwòk, gen dô pơnah pe mattơngai, dô pơnah pe mat kơnhai, dô pơnah pe ală sơmañ kong pòng pù, tồ dô pơnah pe ală bơta àng hơ̆ gơlik jơngo, mơ trồ ngai roh dô pơnah pe bơta àng, mơ trồ mang kung behơ̆ sơl.

¹³Añ sền gŏ mơ kơno dô nơm klàng bung par digùl trồ, hòi driau dờng lah: “Bòl glar ngan! Bòl glar ngan! Ală cau in ơm hơđang plai ù, bơh jơnau kơlwòk mơ pe nă cau gơnrơh ndai rơp uh tai.”