Read koho Rutơ 2 Bible Online

Rutơ 2 - koho bible

Rutơ 2

¹Tŭ hơ̆, Naômi gơs dô nă cau gơp bơtiàn đah bau klau khai dê, la dô nă cau pas sơm mơ geh pơnro niam, tòm hìu nhă Elimelek sơnđan khai la Bôô.

²Rutơ cau Môap đơs mơ Naômi lah: “Dan ai añ in lòt tòm sre nàng dòñ ală sơnyùr kòi, bơh ngkòi cau lơi gơs nùs nđàc di añ.” Naômi đơs mơ khai lah: “Lòt tĕ! Ơ kòn ùr añ jê.”

³Behơ̆ khai lòt mơ khai neh tus dòñ kòi tòm ƀlàng sre, jat bơh ngkòi ală cau toès. Tŭ hơ̆ khai dòñ kòi tòm sre gơrê bal mơ Bôô, tòm mpồl hìu nhă Elimelek dê.

⁴Di di tŭ hơ̆, Bôô pa tus bơh Betlehem. Khai đơs mơ ală cau toès lah: “Dan Yàng Jehôwa ơm bal mơ oh mi!” Bol khai ho lah: “Dan Yàng Jehôwa ai lơngai ồng in!”

⁵Gen Bôô lùp cau at bồ cau toès lah: “Cau ơruh hơ̆ la gơrê bal mơ ñcau taih?”

⁶Cau at bồ cau toès ho lah: “Khai la cau Môap neh rê bal mơ Naômi bơh lơgar Môap.

⁷Khai neh đơs mơ bol hi lah: ‘Dan ai añ in dòñ kòi rung bơh digùl ală cap kòi đah ngkòi ală cau toès.’ Khai tus tòm sre mơ lơh broă ò dơh bơh àng drim tus di tŭ do, ò rlô dô êt lơi.”

⁸Behơ̆ Bôô đơs mơ Rutơ lah: “Ơ kòn ùr añ jê, iat tĕ añ. Bañ lòt dòñ kòi tòm dô nơm sre ndai mơ bañ lik bơh sre do, mơya kư̆ ơm tĕ rềp bal mơ ală dĭ ùr añ jê.

⁹Sền tĕ di sre lơi gơs ală cau ơm toès kòi, mơ lòt jat bơh ngkòi bol khai. Añ neh sồr ală cau pơnu ò di lơh pơnjê ai. Dilah ai tơhìr dà gen lòt hùc tĕ bơh di gri mơ ală cau pơnu neh bơ̆.”

¹⁰Kơno behơ̆, Rutơ tơmbic să blup mat di ù mơ đơs lah: “Ñchi bơh tài añ geh bơta nđàc di đap ồng, tian gơs ồng ơn nùs sền añ la dô nă cau làng bol bơdìh?”

¹¹Bôô ho lah: “Cau neh yal añ in jơh ală bơta mơ ai neh lơh po me ai in bơh di tŭ bau ai neh chơt, mbe ai neh sang mè bèp mơ lơgar tòm ai dê mơ tus hơ dô nơm làng bol mơ ai òhềt git lài.

¹²Dan Yàng Jehôwa tơm wơl ai in jat ală bơta ai neh lơh. Dan ai in dòp geh phan ƀàn dờng tus bơh Jehôwa la Yàng Tom Trồ Israel dê, hơđơm pơnđar Bơtau hơ̆ ai neh tus kìng crŭ.”

¹³Gen Rutơ đơs lah: “Dan añ in pơnjat sùm geh bơta nđàc di đap ồng, bơh ồng neh pơndòm pơniang añ mơ đơs jơnau lơbơn niam mơ añ la cau dĭ ùr ồng dê, bulah añ ò di la dô nă tòm ală cau dĭ ùr ồng dê.”

¹⁴Tòm tŭ sào gen Bôô đơs mơ Rutơ lah: “Tus tĕ tềng do, sa tĕ piang lă do mơ iurŭ gơtòm tơrnòm sràt.” Behơ̆ Rutơ nggui bal mơ ală cau toès, Bôô ai khai in gar ceh. Khai sa jơl tus di tŭ hòm mơ khai gam tơngkah ƀà.

¹⁵Tòm tŭ Rutơ ñă lòt dòñ kòi, Bôô ai jơnau sồr ală cau pơnu khai dê lah: “Lòi tĕ khai dòñ digùl ală cap kòi mơ bañ lah pơrhơng khai.

¹⁶Bol mê kung tă dô êt sơnyùr bơh di cap mơ lòi khai dòñ; bañ lah khai.”

¹⁷Behơ̆, Rutơ dòñ kòi tòm sre hơ̆ jơl tus di mho. Khai jă rlai kòi khai neh dòñ mơ geh pơgap dô epha kòi mac.

¹⁸Gen khai àñ kòi mơ rê wơl tòm ƀòn dờng mơ po me khai gŏ kòi khai neh dòñ geh oă ngan. Gen Rutơ tă ai po me khai in phan sa gam tơngkah tơnơ̆ mơ tŭ khai neh sa hòm.

¹⁹Po me khai lùp lah: “Ntềng đah ai neh dòñ kòi ngai do taih? Ntềng đah ai neh lơh broă taih? Lơngai cau lơi in neh ơn nùs wèt sền ai.” Gen khai yal po me khai in git bơh cau khai neh lơh broă, mơ đơs lah: “Sơnđan cau tòm tiah añ lơh broă ngai do la Bôô.”

²⁰Gen Naômi đơs mơ ƀan khai dê lah: “Dan Yàng Jehôwa ai lơngai khai in! Kơnràñ ò sang lòi mơ ai bơta nđàc cau kis mơ cau chơt in sơl.” Khai đơs bơtơl tai lah: “Cau hơ̆ la gơp bơtiàn rềp he dê, dô nă cau gơp bơtiàn rềp rlau jơh bol he dê.”

²¹Gen Rutơ cau Môap đơs lah: “Khai kung đơs mơ añ lah: ‘Ơm tĕ bal mơ ală cau lơh broă añ jơl tus di tŭ bol khai toès jơh kòi añ jê.’”

²²Naômi đơs mơ Rutơ ƀan khai dê lah: “Ơ kòn ùr añ jê, hơ̆ la niam rlau ai in nàng ơm bal mơ ală dĭ ùr khai dê, bơh tòm sre cau ndai dê, gen ai gơtìp cau lơh pơnjê.”

²³Behơ̆ Rutơ ơm rềp mơ ală dĭ ùr Bôô dê mơ dòñ kòi jơl tus di lồi kơnhai toès kòi màc mơ kòi mi. Khai ơm bal mơ po me khai dê.