Read koho I Samuel 11 Bible Online

I Samuel 11 - koho bible

I Samuel 11

¹Pơgap dô kơnhai tơnơ̆, Nahas cau Ammôn guh mơ gơrwàng Jabes tòm Galaat. Jơh ală cau klau tòm Jabes đơs mơ Nahas lah: “Lơh tĕ bơta ho bal mơ bol hi, gen bol hi rơp kong duh broă mê.”

²Mơya Nahas cau Ammôn ho lah: “Tòm bơta pal càng do gen añ rơp lơh dô bơta ho bal mơ bol mê, tŭ lơi bol hi klĕ mat đah ma kòp nă bol mê dê nàng lơh ƀàssìl hơđang jơh Israel.”

³Ală cau kwang kra Jabes dê đơs mơ khai lah: “Dan ai bol hi in poh ngai tồ bol hi in pơyoa cau kong sồr bol hi dê lòt làm Israel; dilah ò gơs cau tus dong tă bol hi gen bol hi rơp kong alah di bol mê.”

⁴Tòm tŭ ală cau kong sồr lòt tus hơ Gibea ƀòn Sol dê mơ yal wơl ală jơnau hơ̆ làng bol in iat, gen jơh làng bol ñìm nggà dờng.

⁵Di tŭ hơ̆ Sol rê bơh sre, khai lòt jat bơh ngkòi kơnrồ. Khai lùp lah: “Ñchi jơnau moat jrùng neh gơlik gơs di làng bol behơ̆ taih? Ñchi bơh tài bol khai ñìm behơ̆ taih?” Gen bol khai yal wơl khai in ală jơnau cau Jabes neh đơs.

⁶Mơ Hwềng Yàng Tom Trồ dê mù hơđang Sol tòm gơnap gơnoar pràn, tòm tŭ khai kơno ală jơnau hơ̆, mơ khai gơhào gơjrañ duh ngan.

⁷Khai kup dô yô kơnrồ mơ koh bol gơ gơs oă pet, lồc behơ̆ sồr ală cau kong sồr cèng ală pet poac kơnrồ hơ̆ tòm làm Israel mơ đơs lah: “Cau lơi ò lik lòt jat Sol mơ Samuel, gen ală kơnrồ khai dê rơp gơkòl koh behơ̆.” Gen Yàng Jehôwa lơh bơta rngòt rngơt dùh hơđang làng bol, mơ bol khai lik lòt kung be dô nă cau.

⁸Tòm tŭ Sol tơrgòm bol khai tòm Bejek gen gơs pe rhiang rbô nă cau klau Israel mơ pe jơt rbô nă cau klau Juda.

⁹Bol khai đơs mơ ală cau kong sồr neh tus hơ̆ lah: “Bol mê đơs tĕ mơ cau Jabes tòm Galaat be do: ‘Di tŭ duh mattơngai tòm ngai hìng gen bol mê rơp geh dong tă.’” Tòm tŭ ală cau kong sồr lòt yal wơl ală jơnau do cau Jabes in gen bol khai hòn chò ngan.

¹⁰Làng bol ơm tòm Jabes đơs mơ cau Ammôn lah: “Ngai hìng bol hi rơp jào să tòm bol hi bol mê in, mơ bol mê rơp lơh bol hi in jat bơta lơi bol mê kơlôi la niam.”

¹¹Ngai tơnơ̆ Sol cah làng bol gơs pe mpồl, mơ di di jơ drơng àng drim, bol khai mut tòm sàl mơ tơnchơt cau Ammôn jơl tus di tŭ duh tơngai. Ală cau gam kis tòm bol khai gen gơprah gơpring tian gơs ò gam bàr nă dô bă bal.

¹²Gen làng bol đơs mơ Samuel lah: “Ñcau la cau neh lùp lah: ‘Sol rơp at bồ hơđang bol he ơ?’ Cèng tĕ ală cau hơ̆ bol hi in nàng bol hi tơnchơt.”

¹³Mơya Sol đơs lah: “Ò gơs cau lơi rơp kong tơnchơt tòm ngai do, bơh la ngai mơ Yàng Jehôwa neh dong tă Israel.”

¹⁴Gen Samuel đơs mơ làng bol lah: “Tus tĕ, bol he lòt lă hơ Gilgal nàng bơtào nền wơl gơnoar at bồ bơtau dê.”

¹⁵Behơ̆ jơh làng bol lòt tus hơ Gilgal mơ dòp Sol la cau bơtau at bồ di đap Yàng Jehôwa. Tềng hơ̆ bol khai ơn ală phan ơn duh khoai ring lơngai di đap Yàng Jehôwa, Sol mơ jơh làng bol Israel hòn chò dờng ngan ò git lơh.