Read koho I Samuel 13 Bible Online

I Samuel 13 - koho bible

I Samuel 13

¹Sol gơs bơtau at bồ tŭ khai neh poan jơt sơnam, mơ khai at bồ Israel tòm poan jơt bàr nam.

²Sol sac rwah pe rbô nă cau klau Israel; bàr rbô nă ơm mơ khai tòm Mikmas mơ tòm ù tiah kơh mơnơm Betel dê, mơ dô rbô nă ơm mơ Jônathan tòm Gibea gơrê bal mơ Benjamin. Ală cau gam wơl gen khai sồr rê wơl tòm hìu bol khai dê.

³Jônathan brồ lơh dô nơm theng mpồl ling Philistin dê tòm Geba, mơ cau Philistin kơno bơh bơta hơ̆. Mơ Sol sồr uh kơlwòk tòm làm lơgar mơ đơs lah: “Yal tĕ cau Hebrơ in git!”

⁴Behơ̆ jơh Israel neh kơno jơnau yal lah: “Sol neh brồ lơh dô nơm theng mpồl ling Philistin dê, mơ tŭ do cau Israel neh gơlik gơs cù kìr di đap cau Philistin.” Mơ làng bol geh hòi pơjum bal mơ Sol tòm Gilgal.

⁵Làng bol Philistin pơjum bal nàng tòmlơh mơ Israel, bol khai gơs pe rbô nơm rơndeh lòs tòmlơh, mơ prau rbô cau ling hào ơseh, mơ mpồl cau ling oă be bràs di gah dàlềng, bol khai guh lơh sàl tòm Mikmas, đah mattơngai lik Bet Aben dê.

⁶Tòm tŭ cau Israel gŏ bol khai kòl tòm bơta sơbơng roh, mơ mpồl ling bol khai dê kòl klơn kơnjơ̆ gen bol khai pồn să tòm rgồng lŭ mơ tòm ală rlau chi digùl lŭ, tòm ală trồm jrô mơ tòm ală tơrlung dà,

⁷Gơs cau Hebrơ ƀà tiă hiòng Jordan mơ lòt tus hơ lơgar Gat mơ Galaat. Sol gam ơm tòm Gilgal mơ jơh mpồl ling jat khai rơm să rngòt ngan.

⁸Khai neh gơn poh ngai, la tŭ tơngai Samuel neh lơh nền, mơya Samuel ò tus hơ Gilgal, mơ làng bol sơntòm dô lòt nrah nring bơh di Sol.

⁹Behơ̆ khai đơs lah: “Cèng tĕ añ in phan ơn duh khoai chu pơrguc mơ ală phan ơn duh khoai ring lơngai.” Mơ Sol ơn phan duh khoai chu pơrguc.

¹⁰Di di tŭ khai neh sir ơn phan duh khoai chu pơrguc, gen Samuel tus, mơ Sol lik wă rò khai.

¹¹Samuel lùp lah: “Ñchi mê neh lơh taih?” Sol ho lah: “Tòm tŭ añ gŏ làng bol neh dô lòt nrah nring, mơ ồng ò tus jat be tơngai neh lơh nền, mơ cau Philistin neh pơjum tòm Mikmas,

¹²gen añ kơlôi lah: ‘Tŭ do cau Philistin rơp mù tòmlơh mơ añ tòm Gilgal, mơ añ òhềt jòi jat bơta nđàc Yàng Jehôwa dê.’ Behơ̆ añ bơklơn să tòm añ pal ơn phan ơn chu pơrguc.”

¹³Samuel đơs mơ Sol lah: “Mê neh lơh dô bă bơrngơl gơla. Mê ò lơh jat jơnau Jehôwa Yàng Tom Trồ neh sồr mê, dilah mê neh lơh jat gen Kơnràñ neh bơt bơtào kơ̆ gơnoar at bồ mê dê hơđang Israel jơl sùm sùm.

¹⁴Mơya tŭ do gơnoar at bồ mê dê rơp ò ơm kơ̆; Yàng Jehôwa neh jòi bàn dô nă cau jat nùs Kơnràñ dê mơ pồ bơtào khai lơh gơs cau at bồ hơđang làng bol Kơnràñ dê, tài bơh mê ò lơh jat jơnau sồr Kơnràñ dê.”

¹⁵Mơ Samuel lik lòt bơh Gilgal mơ guh hơ Gibea jat gùng khai dê. Ală cau gam wơl jat Sol pơjum wơl mpồl ling; bol khai guh bơh Gilgal tus hơ Gibea tòm tiah Benjamin dê. Sol kòp cau ơm bal mơ khai pơgap prau rhiang nă.

¹⁶Sol mơ Jônathan kòn klau khai dê mơ ală cau klau ơm bal mơ bol khai ơm wơl tòm Gibea kơnhwàl Benjamin, mơ cau Philistin lơh sàl tòm Mikmas.

¹⁷Gơs ală cau kơp òm lik bơh sàl cau Philistin dê tòm pe mpồl. Dô mpồl lòt hơ đah Ôphra tus hơ ù tiah Sual,

¹⁸dô mpồl ndai lòt hơ đah Bet Hôrôn, mơ mpồl ndai tai lòt wèt hơ đah mơnơm, bơh tềng hơ̆ sền bơh hơđang thòng Jebôim hơ đah ƀlàng ngềt ngơt.

¹⁹Tŭ hơ̆, cau jòi ò bàn dô nă cau chài tiar tòm làm lơgar Israel, bơh cau Philistin neh đơs lah: “Cau Hebrơ ò geh tiar ală đào hala ală tà bol khai in!”

²⁰Behơ̆ jơh ală cau Israel mù tus hơ cau Philistin nàng tiar ală ngal, ală jơlèng, ală sùng mơ ală mơ̆ bol khai dê.

²¹Bol khai pal tơm bàr pơnah pe sieklơ priă tòm tŭ tiar ală ngal mơ ală jơlèng, mơ tơm dô pơnah pe sieklơ priă tòm tŭ tiar ală jơlèng sề, ală sùng mơ ală gai cik kơnrồ tòm tŭ gơ troă sre.

²²Behơ̆ tòm ngai tòmlơh, ală cau ling ơm bal mơ Sol mơ Jônathan, ò gơs cau lơi gơs đào hala tà tòm tê bol khai; mơya mìng Sol mơ Jônathan kòn klau khai dê gơs.

²³Dô mpồl ling cau Philistin dê neh lik lòt tus hơ kơh Mikmas.