Read koho I Samuel 14 Bible Online

I Samuel 14 - koho bible

I Samuel 14

¹Gơs dô ngai Jônathan kòn klau Sol dê đơs mơ cau ling àñ phan tòmlơh khai dê lah: “Tus tĕ, bol he lòt lă tus hơ tiah ơm kơp gàr cau Philistin dê đah ne.” Mơya khai ò yal bèp khai in git.

²Sol ơm tòm tiah dô nơm tòm chi plai lừu tòm Migrôn đah bơdìh Gibea; gơs mpồl ling pơgap prau rhiang nă cau klau ơm bal mơ khai.

³Tòm hơ̆ kung gơs dô nă cau soh ephot sơnđan la Ahija kòn klau Ahitup bi klau Ikabôt, la kòn klau Phineas, sau Heli, cau gơnoar ơn phan duh khoai Yàng Jehôwa dê tòm Silô. Ò gơs cau lơi git la Jônathan neh lik lòt.

⁴Bàr đah kơh mơnơm mơ Jônathan kòñ lòt gan nàng tus hơ tiah ơm mpồl ling Philistin dê gơs cìr be dơrñang lŭ, dô nơm sơnđan la Bôjes mơ dô nơm ne sơnđan la Seneh.

⁵Dô nơm cìr gơ ơm đah đang wèt hơ Mikmas, dô nơm ne gơ ơm đah đơm wèt hơ Geba.

⁶Jônathan đơs mơ cau ling àñ phan tòmlơh khai dê lah: “Tus tĕ, bol he lòt hơ tiah ơm kơp gàr ală cau ò siat gơltau hơ̆ dê mơ lòi bol khai sền gŏ he. Digơlan Yàng Jehôwa rơp lơh broă ala bol he in. Ò gơs bơta lơi rgơi kơryan Yàng Jehôwa tòm bơta dong tă, bơh oă cau hala bơh dô êt cau.”

⁷Cau ling àñ phan tòmlơh khai dê đơs lah: “Lơh tĕ jơh ală bơta jat be ồng kơlôi kòñ, añ ơm bal mơ ồng; bơta kơlôi sơnơng ồng dê la bơta kơlôi sơnơng añ jê sơl.”

⁸Gen Jônathan đơs lah: “Tŭ do bol he rơp tiă tus hơ ală cau ne, mơ tơlik să he bol khai in gŏ.

⁹Dilah bol khai đơs mơ he lah: ‘Ơm gơn tĕ tềng hơ̆ jơl tus di tŭ bol he tus hơ bol mê,’ gen bol he rơp ơm wơl tòm tiah bol he dê, mơ ò guh hơ bol hơ̆.

¹⁰Mơya dilah bol khai đơs lah: ‘Guh tĕ hơ bol hi,’ gen bol he rơp guh, tài bơh bơta hơ̆ rơp la tềl bol he in git la Yàng Jehôwa neh jào bol khai tòm tê bol he dê.”

¹¹Behơ̆ bàr nă bol khai ai mpồl ling kơp gàr Philistin in gŏ bol khai. Cau Philistin đơs lah: “Sền ne, cau Hebrơ neh lik bơh di ală trồm la tiah bol khai ơm pồn să.”

¹²Ală cau ling tòm tiah kơp gàr hòi dờng Jônathan mơ cau ling àñ phan tòmlơh khai dê mơ đơs lah: “Guh tĕ hơ bol hi, mơ bol hi rơp sơnio bol mê ală bơta do.” Gen Jônathan đơs mơ cau ling àñ phan tòmlơh khai dê lah: “Guh tĕ jat bơh tơnơ̆ añ; Yàng Jehôwa neh jào bol khai tòm tê Israel.”

¹³Gen Jônathan hào guh ngui tê mơ jơng khai dê, mơ cau ling àñ phan tòmlơh guh jat bơh ngkòi. Cau Philistin gơpừ di đap Jônathan, mơ cau ling àñ phan tòmlơh lòt jat bơh tơnơ̆ mơ tơnchơt bol khai.

¹⁴Tòm bơta sreh tơnchơt sơnròp, Jônathan mơ cau ling àñ phan tòmlơh khai dê neh tơnchơt pơgap bàr jơt nă cau klau tòm dô bă tiah dờng ơnàng pơgap dô lŏ sre.

¹⁵Gơs bơta nsràng rngòt tòm sàl mpồl ling tòm ƀlàng, mơ digùl jơh làng bol; ală cau ơm tòm tiah kơp gàr mơ ală mpồl kơp òm rơm să rngòt, mơ ù tiah gơlơnggơr. Hơ̆ la dô bơta rngòt rngơt mơ Yàng Tom Trồ đùh hơđang bol khai.

¹⁶Ală cau ling kơp gàr Sol dê tòm Gibea tòm Benjamin sền gŏ mpồl ling ntoat dô gơprah làm bă tiah.

¹⁷Gen Sol đơs mơ ală cau ling ơm bal mơ khai lah: “Hòi sơnđan tĕ mpồl ling nàng sền cau lơi neh lik lòt bơh di bol he.” Tòm tŭ bol khai neh lơh bơta hơ̆ gen Jônathan mơ cau ling àñ phan tòmlơh khai dê ò gơs tềng hơ̆.

¹⁸Sol đơs mơ Ahija lah: “Cèng tus tĕ Đài Yàng Tom Trồ dê tềng do.” (Tòm tŭ hơ̆ Đài Yàng Tom Trồ dê ơm bal mơ cau Israel.)

¹⁹Tòm tŭ Sol ơm tòmbơhbơr mơ cau gơnoar ơn phan duh khoai, gen jơnau nggồr nggàc tòm sàl cau Philistin sơlo gơbơtơl oă rlau tai. Behơ̆ Sol đơs mơ cau gơnoar ơn phan duh khoai lah: “Lòi tĕ tê mê dê.”

²⁰Gen Sol mơ jơh ală cau khai dê pơjum bal lik lòt tòmlơh, kòp nơm đào cau Philistin dê sreh tơnchơt bal mơ gơp, gen tàng gơs bơta sơlồng sơlàng dờng ngan.

²¹Ală cau Hebrơ bơh lài neh dô ơm mơ cau Philistin mơ neh guh bal mơ bol khai tòm sàl bol khai dê, ală cau hơ̆ rê wơl mut bal mơ cau Israel ơm bal mơ Sol mơ Jônathan.

²²Tòm tŭ jơh ală cau Israel neh ơm pồn să tòm ù tiah mơnơm Epraim dê kơno làng bol Philistin neh ntoat dô gen bol khai dô nùs bal tòm bơta tòmlơh mơ jơh pràn ting jat bol hơ̆.

²³Behơ̆ Yàng Jehôwa dong tă Israel tòm ngai hơ̆; mơ bơta tòmlơh gơ lòt gan rlau Bet Aben, mơ mpồl ling Sol dê jơh ală pơgap jơt rbô nă. Bơta tòmlơh làm tus hơ tiah kơh mơnơm Epraim dê.

²⁴Tŭ hơ̆ Sol gơtup tìs lơh dô nơm broă mhar ir tòm ngai hơ̆, khai neh ơn dô jơnau srat să hơđang mpồl ling, mơ đơs lah: “Pal srat sơntơm di cau lơi sa phan lơi lài mơ tŭ trồ mho mơ lài mơ tŭ añ sal tê hơđang cau sò tơm añ jê.” Behơ̆ ò gơs dô nă cau tòm mpồl ling liap phan lơi.

²⁵Jơh dô mpồl ling mut tòm brê, mơ tềng hơ̆ gơs dà lơwe hơđang ù.

²⁶Tòm tŭ bol khai neh mut tòm brê, bol khai gŏ dà lơwe gơhòr lik, mơya ò gơs cau lơi khin sa tài bơh bol khai rngòt di jơnau srat să.

²⁷Mơya Jônathan ò kơno la bèp khai neh kơt làng bol tòm jơnau srat să, gen khai ai gai jra at tòm tê mơ iurŭ cồng gơtòm sìng lơwe. Khai sa liap dà lơwe mơ mat khai gơlik àng loh.

²⁸Gen dô nă cau ling yal khai in lah: “Bèp ồng neh kơt mpồl ling tòm dô jơnau srat să kràñ cê ngan, đơs lah: ‘Pal srat sơntơm cau lơi in sa phan lơi tòm ngai do!’ Tài bơh hơ̆ tàng ală cau klau bòl glar òsô.”

²⁹Jônathan đơs lah: “Bèp añ neh lơh bòl glar di lơgar. Sền tĕ mbe lơi gar mat añ jê neh àng loh tòm tŭ añ sa liap dô êt dà lơwe do.

³⁰Dilah tòm ngai do jơh mpồl ling neh sa dô êt tòm ală phan mơ bol khai neh tòmpìt geh bơh di ală cau sò tơm bol khai dê, gen niam rlau ò git nđò. Bơta tơnroh cau Philistin ò di neh gơlik gơs dờng rlau ò ơ.”

³¹Tơnơ̆ mơ tŭ cau Israel neh tơnchơt cau Philistin ngai hơ̆ bơh Mikmas tus hơ Aijalôn, gen mpồl ling bòl glar òsô tai.

³²Bol khai brồ tus hơđang ală phan phà geh, kup ală belàt, kơnrồ mơ kơnrồ kòn, koh poac di tiah mơ sa gơ bal mơ mhàm.

³³Gen gơs cau yal mơ Sol lah: “Sền ne, ală cau ling neh tìs glài mơ Yàng Jehôwa bơh neh sa poac gam mhàm.” Sol đơs lah: “Hơ̆ la dô bơta tìs glài tòmdră. Pơrlă tĕ dô pơnai lŭ dờng tus hơ do di đap añ.”

³⁴Gen khai đơs lah: “Lòt tus tĕ digùl ală cau ling mơ đơs mơ bol khai lah: ‘Kòp nă bol mê cèng tĕ añ in kơnrồ mơ belàt, mơ lơh poac tĕ bol gơ tềng do mơ sa. Bañ tìs glài tòmdră mơ Yàng Jehôwa bơh sa poac gam gơs mhàm.’” Behơ̆ kòp nă cèng tus kơnrồ khai dê tòm mang hơ̆ mơ lơh poac gơ tềng hơ̆.

³⁵Gen Sol bơt dô nơm cơnòng duh khoai Yàng Jehôwa in; hơ̆ la cơnòng duh khoai sơnròp mơ khai neh bơt Yàng Jehôwa in.

³⁶Sol đơs lah: “Bol he lòt lă mù jat bơh ngkòi cau Philistin tòm trồ mang mơ phà tòmpìt bol khai jơl rìng àng, mơ bol he bañ lòi dô nă cau lơi tòm bol khai gam kis.” Bol khai ho lah: “Lơh tĕ bơta lơi ồng sền la niam.” Mơya cau gơnoar ơn phan duh khoai đơs lah: “Bol he hòi lùp tĕ Yàng Tom Trồ tềng do.”

³⁷Behơ̆ Sol lùp Yàng Tom Trồ lah: “Añ pal mù jat cau Philistin sơl? Kơnràñ rơp jào phi bol khai tòm tê cau Israel sơl?” Mơya Yàng Tom Trồ ò ho wơl khai in tòm ngai hơ̆.

³⁸Gen tàng Sol đơs lah: “Tus tĕ tềng do, jơh tơl nă bol mê la cau at bồ mpồl ling, mơ bol he sơwì tĕ nàng git tồi glài lơi neh tìs tòm ngai do.

³⁹Di ngan kung be Yàng Jehôwa la Bơtau kis mơ dong tă Israel, bulah kòn klau añ jê la cau tìs glài hơ̆ gen khai kung pal kong chơt.” Mơya ò gơs dô nă cau lơi đơs dô jơnau lơi.

⁴⁰Gen Sol đơs mơ jơh ală cau Israel lah: “Dan bol mê ntào tềng hơ̆, añ mơ Jônathan kòn klau añ rơp ntào tềng do.” Ală cau ho wơl: “Lơh tĕ bơta lơi ồng sền la niam.”

⁴¹Gen Sol hòi dan mơ Jehôwa Yàng Tom Trồ Israel dê mơ lah: “Ơ Jehôwa Yàng Tom Trồ Israel dê, ñchi bơh tài Kơnràñ ò ho wơl cau duh broă Kơnràñ in tòm ngai do taih? Dilah añ hala Jônathan kòn klau añ neh tìs glài, gen dan ho wơl bơh Urim, mơya dilah ală cau Israel tìs glài gen dan ho wơl bơh Thumim.” Gen Jônathan mơ Sol gơkòl sơnio bơh tă khà, ai ală cau Israel geh klàs.

⁴²Gen Sol đơs lah: “Dan tă khà tĕ digùl añ mơ kòn klau añ jê la Jônathan.” Mơ Jônathan gơkòl sơnio.

⁴³Gen Sol đơs mơ Jônathan lah: “Yal tĕ añ in ñchi bơta mê neh lơh.” Jônathan đơs mơ khai lah: “Añ mìng sa liap dô êt dà lơwe bơh di cồng gai jra añ jê, mơ tŭ do añ pal chơt sơl ơ?”

⁴⁴Sol đơs lah: “Ơ Jônathan, dilah mê ò chơt gen dan Yàng Tom Trồ lơh añ dô bă kơnjơ̆ rlau jơh!”

⁴⁵Mơya ală cau Israel đơs mơ Sol lah: “Jônathan la cau neh lơh Israel in pha lin dờng behơ̆ mơ pal kong chơt sơl ơ? Nền cê ngan la ò! Ngan be Yàng Jehôwa gam kis sùm, bulah dô dang che sŏ hơđang bồ khai kung rơp ò rung di ù, tài bơh ngai do khai neh lơh broă bal mơ Yàng Tòm Trồ.” Behơ̆ la làng bol neh dong tă Jônathan mơ khai ò pal chơt.

⁴⁶Gen Sol ơm wơl, ò ting jat tai cau Philistin, mơ bol khai rê wơl hơ tiah tòm bol khai dê.

⁴⁷Tơnơ̆ mơ tŭ Sol neh geh gơnoar at bồ hơđang Israel, khai neh tòmlơh mơ jơh ală cau sò tơm di khai tòm kòp đah, hơ̆ la Môap, Ammôn, Edôm, ală bơtau Seba mơ cau Philistin. Tiah lơi khai lòt tòmlơh gen khai kung geh pha.

⁴⁸Khai tòmlơh dô bă khin cha ngan, lơh alah cau Amalek mơ dong tă Israel bơh di tê ală cau phà kơñau bol khai.

⁴⁹Ală kòn klau Sol dê la Jônathan, Isbi mơ Malkisua. Sơnđan kòn ùr tơnhoa khai dê la Merap, mơ sơnđan kòn ùr oh la Mikal.

⁵⁰Bau ùr Sol dê sơnđan la Ahinôam kòn ùr Ahimas. Sơnđan cau at bồ mpồl ling khai dê la Apner kòn klau Ner la wa Sol dê.

⁵¹Kis bèp Sol dê mơ Ner bèp Apner dê la kòn klau Abiel dê.

⁵²Tòm jơh rài kis Sol dê gơs bơta kơlìn gơtoă dờng mơ cau Philistin, mơ tŭ lơi Sol gŏ dô nă cau klau pràn kơldang hala khin cha gen khai ngui cau hơ̆ duh broă khai dê.