Read koho I Samuel 15 Bible Online

I Samuel 15 - koho bible

I Samuel 15

¹Samuel đơs mơ Sol lah: “Añ la cau mơ Yàng Jehôwa neh sồr tus bong mơñà mê in nàng gơs bơtau at bồ làng bol Israel Kơnràñ dê; gen tàng tŭ do iat tĕ jơnau Yàng Jehôwa dê.

²Yàng Jehôwa Gơnap Gơnoar Dờng Làm Jơh đơs lah: ‘Añ rơp lơh glài cau Amalek bơh ală bơta bol khai neh lơh Israel in, hơ̆ la tòmdră wơl mơ cau Israel tòm tŭ bol khai lik bơh Ejiptơ.

³Tŭ do lòt tĕ brồ lơh cau Amalek mơ tơnroh jơh hir ală phan gơrê bal mơ bol khai. Bañ pơlai phan lơi; mơya tơnchơt jơh ală cau klau mơ cau ùr, ală kòn dềt mơ oh nga, ală kơnrồ mơ belàt, ală làkđa mơ alàng.’”

⁴Behơ̆ Sol hòi làng bol mơ kòp khà bol khai tòm Telaim: gơs bàr rhiang rbô nă cau ling lòt jơng, mơ jơt rbô nă cau ling bơh Juda.

⁵Sol lòt tus hơ ƀòn dờng cau Amalek dê mơ ơm kơp mòc tòm thòng.

⁶Sol đơs mơ cau Kenit lah: “Lik lòt tĕ bơh digùl làng bol Amalek tồ añ ò tơnroh bol mê bal mơ bol khai; bơh bol mê neh yal tơlik bơta niam lơnhơn mơ jơh cau Israel tòm tŭ bol khai lik bơh di Ejiptơ.” Behơ̆ cau Kenit lik lòt bơh digùl cau Amalek.

⁷Gen Sol brồ lơh jơh ală cau Amalek bơh Abila tus hơ Sur, tus hơ đah mattơngai lik Ejiptơ dê.

⁸Mơ khai kup kis Agak la bơtau Amalek dê mơ ai đào tơnroh jơh làng bol hơ̆.

⁹Mơya Sol mơ mpồl ling lòi Agak in kis, bal mơ ală phan niam rlau jơh tòm mpồl belàt, kơnrồ, kơnrồ lơmă, belàt kòn, mơ jơh ală phan lơi niam. Bol khai ò bài tơnroh jơh ală phan hơ̆, mìng tơnroh jơh ală phan ò dờng màng mơ òsô.

¹⁰Gen gơs jơnau Yàng Jehôwa đơs mơ Samuel lah:

¹¹“Añ wòl să bơh neh bơtào Sol lơh gơs bơtau at bồ, tài bơh khai neh pơrlac sang Añ mơ ò lơh gơlik gơs jat be jơnau Añ neh sồr khai.” Samuel gơjrañ ngan, khai rac dan mơ Yàng Jehôwa jơh mang.

¹²Rìng àng drim Samuel guh gòñ mơ lòt tìp Sol, mơya gơs cau yal khai in lah: “Sol neh mù tus hơ Gilgal, tềng hơ̆ khai neh bơtào dô nơm jrong kah kirsơnre bơh bơta gơklŏ khai dê, mơ khai neh mù hơ Gilgal.”

¹³Tòm tŭ Samuel neh tus hơ Sol, gen Sol đơs lah: “Dan Yàng Jehôwa ai lơngai ồng in! Añ neh lơh gơlik gơs jat ală jơnau sồr Yàng Jehôwa dê.”

¹⁴Mơya Samuel đơs lah: “Behơ̆ gen sap belàt mƀè di tồr añ la ñchi taih? Sap kơnrồ mƀòh mơ añ kơno la ñchi taih?”

¹⁵Sol ho lah: “Ală cau ling neh cèng bol gơ bơh di cau Amalek; bol khai lòi wơl ală belàt mơ kơnrồ niam rlau jơh nàng lơh gơs phan ơn duh khoai Jehôwa Yàng Tom Trồ ồng dê; mơya ală phan gam wơl gen bol hi neh tơnroh jơh hir.”

¹⁶Gen Samuel đơs mơ Sol lah: “Ơm tĕ, lòi añ yal mê in ñchi jơnau Yàng Jehôwa neh đơs mơ añ mang ti.” Sol đơs lah: “Dan yal tĕ!”

¹⁷Samuel đơs lah: “Bulah neh gơs dô tŭ mê kơlôi să tòm mê la dềt rhền, ò di mê neh gơlik gơs bồ ală jơi bơtiàn Israel ò ơ? Yàng Jehôwa neh bong mơñà mê in nàng gơs bơtau Israel dê.

¹⁸Mơ Kơnràñ neh sồr mê lòt mơ đơs lah: ‘Lòt tĕ, mơ tơnroh jơh hir làng bol iơh bơsak ne la cau Amalek, tòmlơh mơ bol khai jơl tus di tŭ mê tơnroh jơh hir.’

¹⁹Ñchi bơh tài mê ò dòn bơr Yàng Jehôwa taih? Ñchi bơh tài mê neh brồ kup ală phan tòmpìt geh mơ lơh bơta iơh di đap Yàng Jehôwa taih?”

²⁰Sol đơs mơ Samuel lah: “Mơya añ neh dòn bơr Yàng Jehôwa. Añ neh lòt lơh bơta mơ Yàng Jehôwa neh sồr añ lơh. Añ neh tơnroh jơh hir cau Amalek mơ cèng brê Agak la bơtau bol khai dê.

²¹Ală cau ling neh kup cèng belàt mơ kơnrồ bơh di ală phan kup geh, la phan niam rlau jơh Yàng Tom Trồ in, tồ lơh gơs phan ơn duh khoai Jehôwa Yàng Tom Trồ ồng dê tòm Gilgal.”

²²Mơya Samuel đơs lah: “Yàng Jehôwa niam nùs di ală phan ơn chu pơrguc mơ ală phan ơn duh khoai kung be niam nùs di bơta lơh jat jơnau đơs Yàng Jehôwa dê sơl ơ? Bơta dòn bơr la niam rlau mơ phan ơn duh khoai, mơ bơta iat jơnau la niam rlau mơ dơngi ală belàt dam.

²³Bơta tòmdră la kung be tồi glài juh proh, bơta kơldang bồ la iơh kung be bơta duh rùp ràk. Tài bơh mê neh sang lòi jơnau Yàng Jehôwa dê, gen Kơnràñ kung neh sang lòi mê, ò ai mê gơs bơtau at bồ tai.”

²⁴Gen Sol đơs mơ Samuel lah: “Añ neh tìs glài. Añ neh lơh tìs mơ jơnau sồr Yàng Jehôwa dê mơ jơnau bơto sồr ồng dê. Añ neh rngòt di làng bol mơ lơh jat jơnau bol khai dê.

²⁵Tŭ do añ dan ồng toh glài añ in mơ rê wơl mơ añ, nàng añ in duh khoai Yàng Jehôwa.”

²⁶Samuel đơs mơ Sol lah: “Añ rơp ò rê wơl mơ mê; bơh mê neh sang lòi jơnau Yàng Jehôwa dê, mơ Yàng Jehôwa neh sang lòi mê, ò lòi mê gơs bơtau at bồ Israel tai.”

²⁷Tòm tŭ Samuel wơlke nàng lòt gen Sol kup di tiang ào jrùh khai dê mơ gơcrè.

²⁸Samuel đơs mơ khai lah: “Ngai do Yàng Jehôwa neh crè lơgar Israel bơh di mê mơ neh ai gơ dô nă cau tòm ală cau gơp ƀòn mê dê, la cau niam rlau mơ mê.

²⁹Rlau mơ hơ̆ tai bơta Gơklŏ Israel dê ò ruc wơl mơ tòmgơl nùs Kơnràñ dê, bơh Kơnràñ ò di la kòn mơnus nàng Kơnràñ tòmgơl nùs Kơnràñ dê.”

³⁰Gen Sol đơs lah: “Añ neh tìs glài, mơya tŭ do dan sền dờng màng añ di đap ală cau kwang kra làng bol añ jê mơ di đap Israel, mơ rê wơl tĕ mơ añ nàng añ duh khoai Jehôwa Yàng Tom Trồ ồng dê.”

³¹Behơ̆ Samuel rê wơl mơ Sol; gen Sol duh khoai Yàng Jehôwa.

³²Gen Samuel đơs lah: “Cèng tĕ Agak bơtau cau Amalek tus hơ añ tềng do.” Agak hòn chò lòt tus hơ khai, mơ kơlôi lah; “Di ngan do la bơta sràt bơtang bơta chơt dê neh rlau rau.”

³³Mơya Samuel đơs lah: “Kung be đào mê dê neh lơh ală cau ùr ò gam kòn, Behơ̆, mè mê kung rơp ò gam kòn digùl ală cau ùr sơl.” Gen Samuel tơnchơt Agak di đap Yàng Jehôwa tòm Gilgal.

³⁴Gen Samuel rê wơl hơ Rama, mơ Sol rê hơ hìu khai dê tòm Gibea.

³⁵Samuel ò tìp Sol tai jơl tus di ngai khai chơt, mơya Samuel ñìm rac bơh Sol. Mơ Yàng Jehôwa moat jrùng bơh neh bơtào Sol gơs bơtau at bồ Israel.