Read koho I Samuel 16 Bible Online

I Samuel 16 - koho bible

I Samuel 16

¹Yàng Jehôwa đơs mơ Samuel lah: “Nđò jŏ mê rơp ñìm rac bơh Sol taih? Añ neh sang khai ò ai khai gơs bơtau at bồ Israel tai. Tơmbềng tĕ ngke mơñà mê dê mơ ñă lòt gùng; Añ rơp sồr mê lòt tus hơ Jese cau Betlehem. Añ neh rcang Añ in dô nă bơtau digùl ală kòn klau khai dê.”

²Mơya Samuel đơs lah: “Ơ Yàng, mbe añ rgơi lòt taih? Dilah Sol kơno bơh bơta hơ̆ gen khai rơp tơnchơt añ.” Yàng Jehôwa đơs lah: “Cèng tĕ bal mơ mê dô nơm kơnrồ dra mơ đơs lah: ‘Añ neh tus nàng ơn phan duh khoai Yàng Jehôwa in.’

³Mê jà Jese lòt tus hơ bơta ơn phan duh khoai, mơ Añ rơp sơnio bơta mê pal lơh. Mê rơp bong mơñà Añ in dô nă cau Añ yal sơnđan mê in.”

⁴Samuel lơh jat be Yàng Jehôwa neh sồr, mơ khai neh tus hơ Betlehem, ală cau kwang kra ƀòn hơ̆ rơm să rngòt lòt tus tìp khai mơ đơs lah: “Ồng tus tòm bơta lơngap lơngai sơl?”

⁵Samuel ho lah: “Ơi, tòm bơta lơngap lơngai. Añ tus nàng ơn phan duh khoai Yàng Jehôwa in; lơh tĕ sàng goh să tòm bol mê mơ añ tòm bơta ơn phan duh khoai.” Gen khai lơh sàng goh Jese mơ ală kòn klau khai dê mơ jà bol khai tus hơ bơta ơn phan duh khoai.

⁶Tòm tŭ bol khai neh tus, Samuel sền di Eliap gen khai kơlôi lah: “Nền ngan la cau geh bong mơñà Yàng Jehôwa dê ơm di đap Kơnràñ.”

⁷Mơya Yàng Jehôwa đơs mơ Samuel lah: “Bañ sền di rùp să hala bơta dờng jơnhoa khai dê, tài bơh Añ neh ò dòp khai; bơh Yàng Jehôwa ò sền be kòn mơnus sền. Kòn mơnus sền đah bơdìh, mơya Yàng Jehôwa sền tòm nùs.”

⁸Gen Jese hòi Aminadap mơ sồr khai lòt gan di đap Samuel. Mơya Samuel đơs lah: “Yàng Jehôwa kung ò sac rwah cau do.”

⁹Gen Jese sồr Sama lòt gan mơya Samuel đơs lah: “Yàng Jehôwa kung ò sac rwah cau do.”

¹⁰Jese sồr poh nă kòn klau khai dê lòt gan di đap Samuel, mơya Samuel đơs mơ khai lah: “Yàng Jehôwa ò sac rwah ală cau do.”

¹¹Behơ̆ Samuel lùp Jese lah: “Jơh ală kòn klau mê dê gơs tềng do sơl?” Jese ho lah: “Gam dô nă kòn put tai, mơya khai ơm ê belàt.” Mơ Samuel đơs mơ Jese lah: “Sồr tĕ cau lòt hòi khai; bol he rơp ò nggui jơl tus di tŭ khai tus tềng do.”

¹²Behơ̆ Jese sồr cau lòt hòi khai mơ lam khai mut tòm hìu. Muh mat khai gơlơh dum dum, rùp să khai dê sền niam mơ hàng mơnĕ. Gen Yàng Jehôwa đơs lah: “Ñă tĕ bong mơñà khai in. Khai la cau Añ sac rwah.”

¹³Behơ̆ Samuel ai ngke mơñà mơ bong mơñà khai in di đap mat ală bi khai dê, mơ bơh ngai hơ̆ Hwềng Yàng Jehôwa dê mù hơđang Dabit dô bă gơs gơnoar pràn ngan. Gen Samuel rê wơl hơ Ramah.

¹⁴Tŭ hơ̆ hwềng Yàng Jehôwa dê neh sang lòi Sol, mơ Yàng Jehôwa sồr dô nơm hwềng iơh lơh bòl glar di khai.

¹⁵Ală cau duh broă Sol dê đơs mơ khai lah: “Do, Yàng Tom Trồ neh sồr dô nơm hwềng iơh lơh bòl glar di bơtau.

¹⁶Dan bơtau bol hi dê sồr ală cau duh broă bơtau dê tềng do jòi dô nă cau chài rgơi rơs kơñi; tŭ lơi Yàng Tom Trồ sồr hwềng iơh tus hơđang bơtau, gen khai rơp rơs kơñi mơ bơtau rơp geh rài bơta bòl glar.”

¹⁷Behơ̆ Sol đơs mơ ală cau duh broă khai dê lah: “Jòi tĕ dô nă cau chài rơs kơñi, mơ lam khai tus hơ añ.”

¹⁸Dô nă cau tòm mpồl cau duh broă ho lah: “Añ neh gŏ dô nă kòn klau Jese cau Betlehem git rơs kơñi. Khai la dô nă cau khin cha mơ la dô nă cau ling jak tòmlơh, git kơrhia tòm jơnau đơs, niam klau, mơ Yàng Jehôwa ơm bal mơ khai.”

¹⁹Gen Sol sồr ală cau kong sồr lòt tus mơ Jese mơ đơs lah: “Sồr kòn klau mê dê la Dabit, cau ê belàt lòt tus hơ añ.”

²⁰Behơ̆ Jese ai piang lă, dô nhồng gơltau tơrnòm, mơ dô nơm be kòn, mơ pơdiang hơđang dô nơm alàng mơ pơyoa bal mơ Dabit kòn klau khai dê tus hơ Sol.

²¹Dabit tus hơ Sol mơ lơh gơs cau duh broă khai dê. Sol kòñ gơboh ngan di Dabit, mơ bơtào khai gơs cau àñ phan tòmlơh Sol dê.

²²Gen Sol sồr cau tus hơ Jese mơ đơs lah: “Dan ai Dabit ơm duh broă añ, tài bơh añ niam nùs di khai.”

²³Tŭ lơi hwềng iơh bơsak mơ Yàng Tom Trồ sồr tus hơđang Sol, gen Dabit ai kơñi pĕ gơ mơ tê khai dê, gen Sol geh rài bơta bòl glar, mơ geh niam rlau mơ hwềng iơh lik bơh di khai.