Read koho I Samuel 18 Bible Online

I Samuel 18 - koho bible

I Samuel 18

¹Tơnơ̆ mơ tŭ Dabit sir tòmbơhbơr mơ Sol, gen hwềng nùs Jônathan đềt mềr mơ hwềng nùs Dabit, mơ Jônathan kòñ gơboh di Dabit be să tòm khai.

²Bơh di ngai hơ̆ Sol wă rò Dabit ơm mơ khai, ò ai khai in rê wơl hơ hìu bèp khai dê.

³Mơ Jônathan bơtào gơs dô bơta ho bal mơ Dabit tài bơh khai kòñ gơboh di Dabit be să tòm khai dê.

⁴Jônathan hồ ào jrùh khai soh mơ ai Dabit in, bal mơ ào lòs, kung ai tơn đào, àtak mơ che but khai dê sơl.

⁵Broă lơi Sol sồr Dabit lơh gen Dabit lơh gơlik cồng nha niam tian gơs Sol bơtào khai hơđang tòm mpồl ling. Bơta hơ̆ niam nùs jơh làng bol mơ niam nùs ală cau duh broă Sol sơl.

⁶Tòm tŭ bol khai rê hìu tơnơ̆ mơ tŭ Dabit neh tơnchơt cau Philistin rau, gen ală cau ùr lik bơh di jơh ală ƀòn dờng Israel dê nàng wă rò Sol. Bol khai đơs chò mơ tòmya, chò hòp bal mơ ală sơnggơr dềt mơ ală kơñi.

⁷Tòm tŭ bol khai tòmya, bol khai đơs chò lah: “Sol neh tơnchơt oă rbô, mơ Dabit neh tơnchơt oă jơt rbô.”

⁸Sol gơjrañ ngan, bơh jơnau đơs chò hơ̆ ò niam nùs khai dê. Khai kơlôi lah: “Bol khai jòng ro Dabit neh tơnchơt oă jơt rbô, đah mơ añ gen mìng oă rbô. Ñchi bơta rlau tai khai rgơi geh, mìng siơ̆u gơnoar at bồ lơgar?”

⁹Mơ bơh di ngai hơ̆ Sol sền di Dabit mơ gar mat ƀoah gơjrañ.

¹⁰Ngai tơnơ̆, gơs dô nơm hwềng iơh bơh Yàng Tom Trồ sồr tus dô bă pràn kơldang ngan hơđang Sol. Khai ơm đơs is khai dê kung be cau sơnrang tòm hìu khai dê, Dabit pĕ kơñi be òs. Sol at tà tòm tê,

¹¹mơ khai tơng gơ; tài bơh khai kơlôi lah: “Añ rơp pơng Dabit di dơrñang.” Mơya Dabit pleh klàs bơh Sol bàr dơ̆.

¹²Sol rngòt di Dabit, tài bơh Yàng Jehôwa ơm bal mơ khai, mơ Kơnràñ neh sang lòi Sol.

¹³Behơ̆ Sol sồr Dabit lòt ngài bơh di khai, ai khai in lơh gơs kwang ling at bồ dô rbô ling, mơ Dabit lik lòt mơ rê wơl lam mpồl ling.

¹⁴Dabit gơlik cồng nha dờng tòm kòp ală broă khai lơh; tài bơh Yàng Jehôwa ơm bal mơ khai.

¹⁵Tòm tŭ Sol gŏ Dabit gơlik cồng nha behơ̆, gen khai rngòt di Dabit.

¹⁶Mơya jơh Israel mơ Juda gen kòñ gơboh di Dabit. Tài bơh Dabit lam bol khai lik lòt mơ rê wơl.

¹⁷Sol đơs mơ Dabit lah: “Do la Merap kòn ùr dờng añ jê. Añ rơp ai mê in bau; mìng mê pal duh broă añ dô bă khin cha mơ tòmlơh tòm ală bơta tòmlơh Yàng Jehôwa dê.” Bơh Sol neh kơlôi lah: “Añ rơp ò ƀư tê hơđang khai, lòi cau Philistin lơh bơta hơ̆!”

¹⁸Mơya Dabit đơs mơ Sol lah: “Añ la ñcau, hìu nhă hala mpồl hìu nhă bèp añ jê tòm Israel la ñchi mơ añ rơp gơlik gơs bơrtơu cau bơtau dê taih?”

¹⁹Bulah behơ̆ tòm tŭ tus di tŭ Merap kòn ùr Sol dê pal ai tòmbau mơ Dabit, gen Sol ai khai in tòmbau mơ Adriel cau Mehôla.

²⁰Mơya kòn ùr Sol dê la Mikal kòñ gơboh dê Dabit, mơ tòm tŭ cau yal Sol in bơh bơta hơ̆ gen khai ai lơh niam nùs.

²¹Sol kơlôi lah: “Añ rơp ai Mikal bau mơ Dabit nàng Mikal gơs kung be dô nơm dă kup khai, mơ nàng tê cau Philistin tòmdră mơ khai.” Behơ̆ Sol đơs mơ Dabit lah: “Tŭ do mê gơs tŭ lơmpah dơ̆ bàr nàng gơlik gơs cau bơrtơu añ jê.”

²²Gen Sol ai jơnau sồr ală cau duh broă khai dê lah: “Đơs is tĕ mơ Dabit mơ lah: ‘Sền ne, cau bơtau niam nùs di mê, mơ jơh ală cau duh broă cau bơtau dê kung kòñ mê. Behơ̆ lơh gơs tĕ bơrtơu cau bơtau dê.’”

²³Bol khai yal wơl ală jơnau hơ̆ mơ Dabit, mơya Dabit đơs lah: “Ală ồng kơlôi lah lơh gơs bơrtơu cau bơtau dê la dô bơta dềt rhền ơ? Añ mìng la dô nă cau rƀah lơòi mơ ò tiơng pơnro.”

²⁴Ală cau duh broă Sol dê yal wơl khai in ală jơnau Dabit neh đơs.

²⁵Gen Sol ho lah: “Bol mê đơs tĕ mơ Dabit be do: ‘Bơtau ò kòñ phan kơt bau lơi rlau mơ dô rhiang pet gơltau cau Philistin dê nàng khai sal tê di cau sò tơm bơtau dê.’” Hơ̆ la kai gơrmơ̆i Sol dê nàng Dabit gơkòl chơt tòm tê cau Philistin dê.

²⁶Tòm tŭ ală cau duh broă yal jơnau hơ̆ Dabit in, gen khai niam nùs kòñ lơh gơs bơrtơu cau bơtau dê. Behơ̆, lài mơ tŭ jơh tŭ tơngai neh lơh nền,

²⁷Dabit bal mơ ală cau khai dê lik lòt mơ tơnchơt bàr rhiang nă cau Philistin. Khai cèng brê ală pet gơltau neh siat di bol hơ̆ mơ ơn tơl khà cau bơtau in tồ khai rgơi lơh gơs bơrtơu cau bơtau dê. Behơ̆ Sol ai khai in bau mơ Mikal la kòn ùr he dê.

²⁸Tòm tŭ Sol đal git lah Yàng Jehôwa ơm bal mơ Dabit, mơ kòn ùr khai dê kòñ gơboh di Dabit,

²⁹gen Sol sơlo rngòt rlau tai di Dabit, mơ kư̆ lơh gơs cau sò tơm di Dabit tòm jơh rài kis khai dê.

³⁰Ală cau kwang at bồ mpồl ling cau Philistin dê kư̆ pơnjat tai lik lòt tòmlơh, mơ nđò dơ̆ bol khai lik lòt tòmlơh gen Dabit geh bơtoah bơtoài rlau mơ ală cau duh broă Sol dê, tian gơs sơnđan khai geh tiơng pơnro ngan.