Read koho I Samuel 20 Bible Online

I Samuel 20 - koho bible

I Samuel 20

¹Gen Dabit dô bơh Naiôt tòm Ramah, tus mơ Jônathan mơ đơs lah: “Ñchi añ neh lơh taih? Tồi glài añ la ñchi taih? Ñchi añ neh tìs mơ bèp bi mơ khai jòi tơnchơt añ taih?”

²Jônathan ho khai lah: “Ò di behơ̆! Bi rơp ò chơt. Bèp añ ò lơh bơta lơi dờng hala dềt mơ ò yal añ in git lài; ñchi bơh tài bèp añ pal pồn bơta do bơh di añ taih? Ò gơs tŭ lơi.”

³Mơya Dabit kung srat să lah: “Bèp bi git loh làng lah bi kòñ gơboh di añ, mơ khai kơlôi is lah: ‘Bañ lòi Jônathan in git bơta do nàng moat jrùng.’ Mơya di ngan kung be Yàng Jehôwa kis sùm mơ kung be bi kis, gơs mìng dô cơnđòa lơm digùl añ mơ bơta chơt.”

⁴Jônathan đơs mơ Dabit lah: “Ñchi bi kòñ añ lơh gen añ rơp lơh bi in.”

⁵Behơ̆ Dabit đơs lah: “Do, ngai hìng la ngai pơjum sa ngai Dùl Lik, añ pal nggui sa bal mơ bơtau; mơya lòi tĕ añ lòt nàng pồn să tòm ƀlàng jơl tus di mho ngai hìng nau.

⁶Dilah bèp bi gŏ ò gŏ mat añ, gen đơs tĕ mơ khai lah: ‘Dabit jơh nùs dan mơ añ ai gơnoar khai in rê hơ Betlehem la ƀòn tòm khai dê; tài bơh gơs bơta ơn phan duh khoai kòp nam jơh hìu nhă khai dê tềng hơ̆.’

⁷Dilah bơtau đơs lah: ‘Niam ngan,’ gen cau duh broă bi dê rơp geh lơngap lơngai. Mơya dilah bơtau gơhào gơjrañ gen bi rgơi git lah bơtau neh lơh nền lơh iơh di añ.

⁸Gen tàng, yal tơlik tĕ bơta niam lơnhơn cau duh broă bi in, bơh bi neh bơtào dô bơta ho bal mơ añ di đap Yàng Jehôwa. Dilah añ neh tìs glài lơi gen dan să tòm bi tơnchơt añ! Ñchi bơh tài jào añ tòm tê bèp bi taih?”

⁹Jônathan ho lah: “Ò tŭ lơi gơs behơ̆! Dilah añ git bèp añ lơh nền kòñ lơh iơh di bi gen añ ò yal bi in git ơ?”

¹⁰Dabit lùp lah: “Ñcau rơp yal añ in git dilah bèp bi ho wơl jơnau kràñ cê mơ bi taih?”

¹¹Jônathan đơs mơ Dabit lah: “Bol he lòt tĕ tus tòm ƀlàng.” Behơ̆ bàr nă bol khai lik lòt bal tus tòm ƀlàng.

¹²Gen Jônathan đơs mơ Dabit lah: “Dan Jehôwa Yàng Tom Trồ Israel dê lơh cơng lah añ lơh nền rơp jòi git nùs bèp añ jê kung tòm jơ do ngai hìng nau. Dilah khai yal tơlik niam gơwèt mơ bi gen añ rơp ò sồr cau yal bi in git.

¹³Mơya dilah bèp añ gơs nùs kòñ lơh iơh di bi, gen dan Yàng Jehôwa lơh iơh rmơh rlau jơh di añ dilah añ ò ai bi in git mơ sồr bi dô pleh lơngap lơngai. Dan Yàng Jehôwa ơm bal mơ bi kung be Kơnràñ neh ơm bal mơ bèp añ.

¹⁴Dilah añ gam kis, dan ràng tơlik añ in bơta kòñ gơboh kơ̆ dơn ò tŭ lơi tòmgơl Yàng Jehôwa dê; mơya dilah añ chơt,

¹⁵dan bañ tŭ lơi pơndut bơta kòñ gơboh kơ̆ dơn bi dê gơwèt hơ hìu nhă añ jê, hala bulah tòm tŭ Yàng Jehôwa neh pơndut jơh ală cau sò tơm Dabit dê bơh hơđang plai ù.”

¹⁶Behơ̆ Jônathan lơh dô bơta ho bal mơ hìu Dabit mơ đơs lah: “Dan Yàng Jehôwa sal tê di ală cau sò tơm Dabit dê.”

¹⁷Jônathan sồr Dabit lơh nền dô dơ̆ tai jơnau ho bal khai dê tòm bơta kòñ gơboh di khai, tài bơh khai kòñ gơboh di Dabit be să tòm he.

¹⁸Lồc behơ̆ Jônathan đơs lah: “Ngai hìng la ngai pơjum sa ngai Dùl Lik, bơta siơ̆u mat bi cau rơp gŏ tài bơh tiah nggui bi dê lòi gòi.

¹⁹Ngai hìng nau, bi lòt tus tĕ di tiah bi neh pồn să lài òr, mơ gơn añ rềp di pơnai lŭ Ejel.

²⁰Añ rơp pañ pe nơm kam hơ gah pơnai lŭ hơ̆ gơlơh kung be añ pañ di dô nơm tơnggu.

²¹Gen añ rơp sồr dô nă cau kơnòm mơ đơs lah: ‘Lòt tĕ jòi ală kam.’ Dilah añ đơs mơ khai lah: ‘Ne, ală kam gơ ơm đah do mê dê, cèng tĕ hơ do,’ gen bi tus tĕ tài bơh di ngan kung be Yàng Jehôwa kis sùm, bi geh lơngap lơngai, ò gơs bơta lơi pal rngòt.

²²Mơya dilah añ đơs mơ cau kơnòm hơ̆ lah: ‘Ne, ală kam ơm đah ne mê dê,’ gen bi pal lòt tĕ tài bơh Yàng Jehôwa sồr bi lòt tiah ndai.

²³Ai bơh bơta bi mơ añ neh tòmbơyai bal, dan kah tĕ lah gơs Yàng Jehôwa lơh cơng digùl bi mơ añ jơl tus sùm sùm.”

²⁴Behơ̆ Dabit pồn să tòm ƀlàng, tòm tŭ tus di ngai pơjum sa ngai Dùl Lik gen bơtau nggui nàng sào.

²⁵Bơtau nggui di cơnòng khai òs nggui di gah dơrñang, tòm toh mat mơ Jônathan, mơ Apner nggui di gah Sol, mơya cơnòng nggui Dabit dê lòi gòi.

²⁶Sol ò đơs jơnau lơi tòm ngai hơ̆ bơh khai neh kơlôi lah: “Digơlan neh gơs bơta lơi gơlik tus di Dabit lơh khai in ò goh nàng pơjum sa, ngan la khai ò goh.”

²⁷Mơya tus ngai hìng la ngai bàr tòm kơnhai, tiah Dabit gam lòi gòi. Gen Sol đơs mơ Jônathan kòn klau khai dê lah: “Ñchi bơh tài kòn klau Jese ò tus sào tòm ngai òr kung be tòm ngai do taih?”

²⁸Jônathan ho lah: “Dabit neh jơh nùs dan mơ añ ai gơnoar khai in rê hơ Betlehem.

²⁹Khai đơs lah: ‘Ai tĕ añ in lòt tài bơh hìu nhă añ gơs bơta ơn phan duh khoai tòm ƀòn hơ̆, mơ bi añ neh ai jơnau sồr añ pal gơs mat tềng hơ̆. Dilah añ geh bơta nđàc di đap bi, dan ai añ in lòt nàng tìp mat mơ ală bi añ jê.’ Tài bơh hơ̆ tàng khai ò tus hơ cơnòng sào bơtau dê.”

³⁰Sol gơhào gơjrañ ngan di Jônathan mơ đơs mơ khai lah: “Ơ kòn klau cau ùr iơh bơsak mơ jak sòdră ne! Añ ò di ò git mê neh sac rwah kòn klau Jese mơ lơh ƀàssìl să tòm mê in bal mơ mè deh mê dê ò ơ?

³¹Bơh nđò jŏ kòn klau Jese gam kis tòm ù do kàr lơi gen mê bal mơ gơnoar at bồ lơgar mê dê kung ò geh bơtào kơ̆. Behơ̆ sồr tĕ cau cèng khai tus hơ añ, bơh khai pal chơt!”

³²Jônathan lùp bèp khai lah: “Ñchi bơh tài khai pal kong tơnchơt taih? Ñchi bơta khai neh lơh taih?”

³³Mơya Sol tơng tà nàng tơnchơt Jônathan. Gen khai neh git lah bèp khai kòñ tơnchơt Dabit.

³⁴Jônathan ñă bơh di cơnòng sa mơ gơjrañ ngan, mơ ò sa tòm ngai bàr kơnhai hơ̆, bơh khai moat jrùng bơh Dabit, mơ tài bơh bèp khai neh lơh ƀàssìl ƀàsso khai in.

³⁵Àng drim hìng, Jônathan lik lòt tòm ƀlàng nàng tìp mat mơ Dabit.

³⁶Khai đơs mơ cau kơnòm hơ̆ lah: “Ntoat tĕ jòi ală kam añ pañ.” Tòm tŭ cau kơnòm ntoat gen Jônathan pañ dô nơm kam rlau hơđap cau kơnòm.

³⁷Tòm tŭ cau kơnòm neh tus di tiah gơs kam Jônathan neh pañ, gen Jônathan ai sap dờng đơs mơ cau kơnòm lah: “Kam ò di ơm đah ne mê dê ò ơ?”

³⁸Gen Jônathan đơs dờng lah: “Mhar tĕ! Lòt mhar tĕ! Bañ ơm dơh wơl!” Cau kơnòm dòñ ală kam mơ rê wơl hơ cau tòm khai dê.

³⁹Mơya cau kơnòm ò git ñchi bơh jơh ală bơta hơ̆, mìng Jônathan mơ Dabit git bơta neh rơndap hơ̆.

⁴⁰Gen Jônathan ai ală phan tòmlơh khai dê cau kơnòm hơ̆ in, mơ đơs lah: “Lòt tĕ, cèng brê ală phan do tòm ƀòn.”

⁴¹Tơnơ̆ mơ tŭ cau kơnòm neh lòt rau, Dabit ñă bơh di đah hơđơm pơnai lŭ mơ tơmbic să pe dơ̆ di đap Jônathan, blup mat tòm ù. Gen bol khai tòmkoar mơ gơp mơ ñìm bal, mơya Dabit ñìm oă rlau.

⁴²Gen Jônathan đơs mơ Dabit lah: “Lòt tĕ lơngap lơngai, bơh bol he neh ai sơnđan Yàng Jehôwa mơ srat să tòmho lơh yô bal mơ gơp lah: ‘Yàng Jehôwa lơh cơng digùl bi mơ añ, mơ digùl kòn sau añ mơ kòn sau bi dê sùm sùm.’”

⁴³Dabit ñă lòt, mơ Jônathan rê mut tòm ƀòn.