Read koho I Samuel 21 Bible Online

I Samuel 21 - koho bible

I Samuel 21

¹Dabit lòt hơ Nop tus hơ cau gơnoar ơn phan duh khoai Ahimelek. Ahimelek rơm să rngòt tòm tŭ tìp Dabit, mơ lùp lah: “Ñchi bơh tài ồng lòt is dô nă, mơ ò gơs dô nă cau lơi lòt mơ ồng taih?”

²Dabit ho Ahimelek la cau gơnoar ơn phan duh khoai lah: “Cau bơtau neh sồr añ lơh dô nơm broă mơ neh đơs mơ añ lah: ‘Bañ lòi dô nă cau lơi in git bơh broă añ sồr mê mơ bơh jơnau sồr mbe kòñ lơh broă hơ̆.’ Ai pơnah ală cau añ jê gen añ neh sồr bol khai tìp mat mơ añ tòm dô bă tiah ne.

³Tŭ do ñchi phan ồng gơs tềng do taih? Dan ai añ in pram nơm piang lă hala phan lơi ồng geh.”

⁴Mơya cau gơnoar ơn phan duh khoai ho Dabit lah: “Añ ò gơs piang lă òs tềng do ò, bulah behơ̆ añ gơs piang lă neh ơn hơđang cơnòng duh khoai; dilah ală cau klau ồng dê neh ò tus mơ cau ùr gen sa di.”

⁵Dabit ho lah: “Ngan la ală cau ùr neh ơm ngài mơ bol hi bơh di tŭ añ lik lòt. Să jan ală cau klau la sàng goh bulah geh sồr lơh broă òs gơ dê. Gen tàng tòm ngai do bol khai sơlo gơs sàng goh rlau tai!”

⁶Behơ̆ cau gơnoar ơn phan duh khoai ai khai in piang lă sàng goh tài bơh tềng hơ̆ ò gơs piang lă lơi ndai rlau mơ piang lă ơn pơdơng duh khoai, mơ cau neh tă bơh di đap Yàng Jehôwa nàng ơn piang lă pa tòm ngai hơ̆.

⁷Tŭ hơ̆ gơs dô nă tòm mpồl cau duh broă Sol dê ơm tềng hơ̆, gơkòl ơm wơl di đap Jehôwa, sơnđan khai la Dôek, cau Edôm, la cau at bồ ală cau ê belàt Sol dê.

⁸Dabit lùp Ahimelek lah: “Ồng gơs dô nơm tà hala dô nơm đào lơi tềng do sơl? Añ ò cèng đào añ jê hala phan tòmlơh lơi ndai tài bơh broă cau bơtau dê jal ngan.”

⁹Cau gơnoar ơn phan duh khoai ho lah: “Tềng do gơs đào Gôliat dê la cau Philistin mơ ồng neh tơnchơt tòm thòng Elah, gơ geh pùt mơ bài ơn đah ngkòi ephot. Dilah ồng kòñ ngui gơ gen ai tĕ; tềng do ò gơs đào lơi ndai rlau mơ gơ.” Dabit đơs lah: “Ò gơs đào lơi ndai ndròm be gơ, ai tĕ gơ añ in.”

¹⁰Tòm ngai hơ̆ Dabit dô pleh bơh di Sol mơ lòt tus hơ Akis bơtau Gat dê.

¹¹Mơya ală cau duh broă Akis dê đơs mơ khai lah: “Do ò di la Dabit bơtau lơgar dê ò ơ? Khai ò di la cau mơ bol khai neh đơs chò tòm tŭ tòmya lah: ‘Sol neh tơnchơt oă rbô, mơ Dabit neh tơnchơt oă jơt rbô’ ò ơ?”

¹²Dabit ơn ală jơnau hơ̆ tòm nùs khai mơ rngòt ngan di Akis bơtau Gat dê.

¹³Behơ̆ khai lơh be cau ndai di đap bol hơ̆; khai lơh tànggơ kung be cau sơnrang, tòm tŭ khai ơm di đap bol khai. Khai cih hơđang ală mpồng ƀòn dờng mơ lòi dà diau gơhòr di sơnò tềp khai dê.

¹⁴Akis đơs mơ ală cau duh broă khai dê lah: “Sền tĕ di cau ne! Khai la cau lu sơnrang! Ñchi bơh tài bol mê neh lam khai tus hơ añ taih?

¹⁵Añ siơ̆u cau sơnrang sơl ơ? Mơ bol mê cèng cau do tus tềng do nàng kơnhơl sơnrang di đap añ taih? Cau do pal mut tòm hìu añ ơ?”